ޖެންޑަރ ޑިސްޕެރިޓީ ނައްތާލުމަށް ސަރުކާރުން ދަނީ ގިނަ މަސައްކަތްތަކެއް ކުރަމުން: ޖެންޑަރ މިނިސްޓަރ
4 ނޮވެމްބަރު 2020 | ބުދަ 19:03ދެ ޖިންސުގެ ހަމަހަމަކަމާ ބެހޭ ސިޔާސަތެއް މިދިޔަ އަހަރު ވަނީ އެކުލަވާލާފައި
މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސާވިސަސް އާއިޝަތު މުހައްމަދު ދީދީ
ދައުލަތުގެ މަޤާމުތަކުގެ ތެރެއިން ގޮތް ނިންމާ ފަންތީގެ މަޤާމުތަކުގައި އޮތް ޖެންޑަރ ޑިސްޕެރިޓީ ނައްތާލުމުގެ މަސަައްކަތް ހުއްޓާނުލާ ކުރަމުން އަންނަ ކަމަށް ޖެންޑަރ މިނިސްޓަރ އައިޝަތު މުހައްމަދު ދީދީ ވިދާޅުވެއްޖެއެވެ.
ޔުނިވަރސަލް ޕީރިއޮޑިކް ރިވިއު (ޔޫ.ޕީ.އާރު.) ގެ ތިންވަނަ ސައިކަލްގައި ދިވެހިރާއްޖޭގެ ރިވިއު ސެޝަންގައި ވާހަކަފުޅު ދައްކަވަމުން ޖެންޑަރ މިނިސްޓަރ ވިދާޅުވީ، ރާއްޖޭގައި ޖެންޑާގެ ހަމަހަަމަކަން ގާއިމުކުރުމަށްޓަކައި ދެ ޖިންސުގެ ހަމަހަމަކަމުގެ ގާނޫނެއް ހަދާފައިވާ ކަމަށެވެ. އެގޮތުން އެ ގާނޫނުގެ ތެރެއިން ޖެންޑާގެ ތަފާތަށް ބަލައި ބޭއިންސާފު ކުރުމުގެ ހުރިހާ އަމަލަކާއި، ޚިޔާލާތެއް މަނާކޮށްފައިވާ ކަމަށް ވެސް މިނިސްޓަރު ވިދާޅުވިއެވެ.
ދެ ޖިންސުގެ ހަމަހަމަކަމާ ބެހޭ ސިޔާސަތެއް މިދިޔަ އަހަރު އެކުލަވާލާފައިވާ ކަމަށާއި އެ ސިޔާސަތާ ގުޅޭ އެކްޝަން ޕްލޭންގެ މަސައްކަތް މިހާރު ކުރަމުން އަންނަ ކަމަށް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ، ސިވިލް ސާވިސް ވަޒީފާތަކުގައާއި އެ ދާއިރާގެ ހިންގުމުގެ ލެވެލްގައި އަންހެނުންގެ ދައުރު ބޮޑު ކަމަށާއި ޚާރިޖީ ދާއިރާގައި ވެސް މަސައްކަތްކުރާ އަންހެނުން ގިނަ ކަމަށެވެ.
މިނިސްޓަރު ވަނީ އަންހެނުންނަށް ދީފައިވާ ފުރުސަތުތަކުގެ ތެރެއިން ލޯކަލް ކައުންސިލްތަކުގައި އަންހެނުންނަށް ގޮނޑިތަކެއް ހާއްސަކުރާ ގޮތަށް ގާނޫނަށް ގެނައި ބަދަލު ފާހަގަކުރައްވާ، އެކަމަކީ ކުރިއެރުމެއްގެ ގޮތުގައި ސިފަކުރައްވާފައެވެ.
މިނިސްޓަރު ވިދާޅުވިގޮތުގައި އަންހެނުންނާއި ކުޑަކުދިންގެ ހައްޤުތައް ރައްކާތެރި ކުރުމަށް ކުރާ މަަސައްކަތްތަކުގެ އިތުރުން އުމުރުން ދުވަސްވީ މީހުންނަށް ރައްކާތެރިކަން ދޭން ވެސް ރާއްޖެ އިން އަންނަނީ ގިނަ މަަސައްކަތްތަކެއް ކުރަމުންނެވެ. އެގޮތުން އުމުރުން ދުވަސްމީ މީހުން ބަލަހައްޓާ މަރުކަޒުތައް ރާއްޖޭގެ އެކި ސަރަހައްދުތަކުގައި ގާއިމުކުރުމުގެ މަސައްކަތް ކުރަމުން އަންނަކަން ވެސް މިނިސްޓަރުގެ ވާހަކަައިގައި ވަނީ ފާހަގަކުރައްވާފައެވެ.
