ބާސާގެ އިންތިޚާބު އަހަރުގެ ފަހުކޮޅު ބާއްވަން މަސައްކަތް ކުރަނީ

ބާސެލޯނާގެ އިންތިޚާބު މި އަހަރުގެ ފަހުކޮޅު ބޭއްވުމަށް މަސައްކަތް ކުރަމުންދާ ކަމަށް އެ ކުލަބުގެ ވަގުތީ ރައީސް ކާލެސް ޓުސްކެޓްސް ވިދާޅުވެއްޖެއެވެ.

ބާސާގެ އިންތިޚާބު އަންނަ އަހަރުގެ މާޗު މަހު ބޭއްވުމަށް މީގެ ކުރިން ތާވަލުކުރި ނަމަވެސް، އޭގެ ކުރިން އިންތިޚާބު ބާއްވަން ޖެހުނީ ބާސާގެ ރައީސްގެ މަގާމުން ޖޯސެފް މާރިއާ ބާޓޮމެއޫ އިސްތިއުފާ ދެއްވުމާ ގުޅިގެންނެވެ. ބާޓޮމެއޫ އާއި އެ ކުލަބުގެ ހުރިހާ ބޯޑު މެންބަރުން މަގާމުން އިސްތިއުފާ ދެއްވުމަށް ނިންމެވީ މިދިޔަ ހަފުތާގެ އަންގާރަ ދުވަހުގެރޭ ބޭއްވި ބޯޑު މެންބަރުންގެ ބައްދަލުވުމުގައެވެ.

ބާޓޮމެއޫ މަގާމުން އިސްތިއުފާ ދެއްވީ މިދިޔަ ސެޕްޓެމްބަރު މަހުގެ 17 ވަނަ ދުވަހު ބާސާގެ މެންބަރުން 20,687 މީހުންގެ ސޮޔާއެކު ބާޓޮމެއޫގެ އިތުބާރު ނެތްކަމުގެ ވޯޓެއް ނަގަން ހުށަހަޅާފައި ވަނިކޮށެވެ. ބާސާގެ ގަވާއިދު ބުނާ ގޮތުން އިތުބާރު ނެތްކަމުގެ ވޯޓެއް ނެގުމަށް ބޭނުންވަނީ 16,520 މީހުންގެ ސޮޔެވެ. އެހެންކަމުން ބާޓޮމެއޫގެ އިތުބާރު ނެތްކަމުގެ ވޯޓެއް ނަގަން ބޭނުންވާ ވަރަށް ސޮއި ހަމަވިކަން ބާސާއިން މީގެ ކުރިން ހާމަކުރިއެވެ.

ބާސާގެ ރައީސްގެ މަގާމުން ބާޓޮމެއޫ އިސްތިއުފާ ދެއްވުމާ ގުޅިގެން އެ ކުލަބުގެ އައު އިންތިޚާބު ކުރިއަށް އޮތް ތިން މަހުގެ މުއްދަތުގެ ތެރޭގައި ބާއްވަން ޖެހޭނެއެވެ. އިންތިޚާބާ ގުޅޭ ގޮތުން ބާސާގެ ވަގުތީ ރައީސް ކާލެސް ޓުސްކެޓްސް ވިދާޅުވީ ވީ އެންމެ އަވަހަކަށް އައު އިންތިޚާބު ބޭއްވުމަށް މިހާރު މަސައްކަތް ކުރަމުން އަންނަ ކަމަށާއި، އެގޮތުން މި އަހަރުގެ ފަހުކޮޅު އިންތިޚާބު ބޭއްވުމަށް މިހާރު އަމާޒުހިފާފައިވާ ކަމަށެވެ.

ރައީސްގެ މަގާމުން އިސްތިއުފާ ދެއްވުމުގެ ކުރިން ބާޓޮމެއޫ ވަނީ އެ ކުލަބުގެ ކުޅުންތެރިންނާއި މުވައްޒަފުންގެ މުސާރައިން 30 އިންސައްތަ އުނިކުރަން ހުށަހަޅާފައެވެ. އެކަމަށް އިޝާރާތް ކުރައްވާ ޓުސްކެޓްސް ވިދާޅުވީ މި ވަގުތު ކުޅުންތެރިންނާއި މުވައްޒަފުންގެ މުސާރަ ކުޑަކުރުމުގެ ކަންކަން މަޑުޖައްސާލާފައިވާ ކަމަށެވެ.

ބާސާގެ ރައީސްގެ މަގާމުން ބާޓޮމެއޫ އިސްތިއުފާ ދެއްވިއިރު، މީގެ ކުރިން ބާޓޮމެއޫ ކުލަބު ހިންގާ ގޮތާ މެދު ހިތްހަމަނުޖުން ފާޅުކޮށް، ބާސާގެ ޑިރެކްޓަރުންގެ ބޯޑުގެ ހަ މެންބަރަކު ވަނީ މި އަހަރުގެ އޭޕްރީލް މަހުގެ ތެރޭގައި އިސްތިއުފާ ދެއްވާފައެވެ.

ބާޓޮމެއޫ އަކީ އެ ކުލަބުގެ 40 ވަނަ ރައީސެވެ. އޭނާ އެންމެ ފުރަތަމަ ބާސާގެ ރައީސްގެ މަގާމާ ހަވާލުވީ 2014 ވަނަ އަހަރު އޭރުގެ ރައީސް ސަންޑްރޯ ރޮސެލް މަގާމުން އިސްތިއުފާ ދެއްވުމުންނެވެ. އޭގެ ފަހުން 2015 ވަނަ އަހަރު ބޭއްވި އިންތިޚާބު ބާޓޮމެއޫ ކާމިޔާބުކުރެއްވިއެވެ.