ޤައުމަށްވުރެ ޕާޓީ އިސްވާން ޖެހޭ އެއްވެސް ސަބަބެއް ނެތް: މަހުލޫފް

ދިވެހި ޤައުމަށްވުރެ އަމިއްލަ ޕާޓީ އިސްކުރަން ޖެހޭ އެއްވެސް ސަބަބެއް ނެތް ކަމަށް މިނިސްޓަރ އޮފް ޔޫތް، ސްޕޯރޓްސް އެންޑް ކޮމިއުނިޓީ އެމްޕަވަރމަންޓް އަހުމަދު މަހުލޫފް ވިދާޅުވެއްޖެއެވެ.

އަންގާރަ ދުވަހު ރާއްޖެޓީވީގެ "ފަށާއިރު" ޕްރޮގްރާމްގައި ބައިވެރިވެވަޑައިގެން ވާހަކަފުޅު ދައްކަވަމުން މިނިސްޓަރ ވިދާޅުވީ، އެއްވެސް ބަޔަކު އެބައެއްގެ އަމިއްލަ ޤައުމަށްވުރެ އަމިއްލަ ޕާޓީ އިސްކުރަން ޖެހޭ އެއްވެސް ސަބަބެއް ނެތް ކަމަށެވެ. އެގޮތުން ޤައުމީ ވާހަކަތަކަކީ ޕޯޑިއަމްތަކުގައި ތިއްބަވައިގެން "ލޭ ކެއްކުމަށް" ދައްކާ ވާހަކައަކަށްވުރެ، އޭގެ ޙަޤީޤީ މާނައިގައި ދައްކާ ވާހަކަތަކަކަށް ވާން ޖެހޭނެ ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، ސުކޫލުތަކުގައި ވެސް ނަސްރުގެ ދުވަސް ފާހަގަ ކުރަމުންދާއިރު، ޤައުމީ ބަތަލުންގެ ވާހަކަތަކާއި، ތާރީޚުގެ ވާހަކަތައް ދަރިވަރުންނަށް ވެސް މިހާރަށްވުރެ ބޮޑަށް އަންގައި، ޤައުމީ ލޯބި އާލާވާނެ ގޮތަކަށް އެ ދުވަސް ފާހަގަ ކުރަން ޖެހޭ ކަމަށެވެ.

އޭގެ އިތުރުން، މިނިސްޓްރީގެ މަސައްކަތްތަކަށް އަލިއަޅުވާލައްވާ ދެއްކެވި ވާހަކައިގައި މިނިސްޓަރ ވިދާޅުވީ، އެކި މިނިސްޓްރީތަކާއި ގުޅިގެން މަސައްކަތް ކުރަމުންދާއިރު، ނޮވެމްބަރު 11 އަށް ތައްޔާރުވުމަށް ވެސް ލަވަ މުބާރާތެއް ބޭއްވުމަށް ރާވަމުންދާ ކަމަށެވެ. އަދި އެފަދަ ކަންކަމަކީ ވެރިންނަށް "ސަނާ ކިއުމަށް" ކުރާ ކަމެއް ކަމަށް ދޭހަވާ ގޮތަށް ދައްކަވާ ވާހަކަތަކަށް ރައްދު ދެއްވައި މިނިސްޓަރ ވިދާޅުވީ، ޤައުމީ ލަވައާއި، ޤައުމީ ކަންކަމަކީ ވަކި ބަޔަކަށް ސަނާ ކިއުމަށް ކުރާ ކަމެއް ކަމަށް ހީކޮށްގެން ނުވާނެ ކަމަށެވެ.

ޕްރޮގްރާމްގައި އިތުރަށް ވާހަކަ ދައްކަވަމުން މިނިސްޓަރ އިތުރަށް ވިދާޅުވީ، ވަކި ކުލައަކީ ވަކި ޕާޓީއަކަށް ނިސްބަތްވާ ކުލައެއް ކަމަށް ދެކި، ހުރިހާ ކަމެއް ސިޔާސީ ކުރުމުގެ ވިސްނުން ދޫކޮށްލަން ޖެހޭ ކަމަށެވެ. އަދި ޤައުމު ދެކެ ލޯބިވާ ޤައުމަށް ހެޔޮ އެދޭ ޒުވާނުންތަކަކަށް ވުމަށް ދިވެހި ޒުވާނުންނަށްވެސް މިނިސްޓަރ ވަނީ އިލްތިމާސް ކުރައްވާފައެވެ. އެގޮތުން ކޮވިޑް-19 ގެ ޕެންޑެމިކް ތެރޭގައި ކުރީ ސަފުގައި މަސައްކަތް ކުރެއްވި މަސައްކަތްތެރިންނާއި، ވޮލަންޓިޔަރ ކޮށް މަސައްކަތް ކުރަން ނުކުތް ޒުވާނުންނަށްވެސް މިނިސްޓަރ ވަނީ ތައުރީފް ކުރައްވާފައެވެ.