ކޮވިޑް-19 އަށް އިތުރު 36 މީހަކު ޕޮޒިޓިވްވެ 33 މީހަކު ބަލިން ރަނގަޅުވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އާދިއްތަ ދުވަހުގެ އިރުއޮއްސި 6:00 އިން ހޯމަ ދުވަހުގެ އިރުއޮއްސި 6:00 އަށް 36 މީހަކު ޕޮޒިޓިވްވެފައިވާ ކަމަށެވެ. މީގެ ތެރެއިން 31 މީހަކު މާލެ ސަރަހައްދުން 5 މީހަކު އަތޮޅުތެރެއިން ޕޮޒިޓިވްވެފައިވާ ކަމަށެވެ.

ފާއިތުވެދިޔަ 24 ގަޑިއިރުގެ ތެރޭގައި 1318 ސާމްޕަލެއް ޓެސްޓްކޮށްފައިވާއިރު، 33 މީހަކު ބަލިން ވަނީ ރަނގަޅުވެފައެވެ. މި ވަގުތު 776 މީހަކަށް ފަރުވާދެމުން އަންނައިރު، އައިސޮލޭޝަން ފެސިލިޓީތަކުގައި 228 މީހަކު އެބަތިއްބެވެ. އަދި 56 މީހަކަށް ފަރުވާދެމުން އަންނަނީ ހޮސްޕިޓަލްގައެވެ.

ރާއްޖެއިން މިހާތަނަށް 11،737 މީހަކު ބައްޔަށް ޕޮޒިޓިވްވެފައިވާއިރު، 10،916 މީހަކު ވަނީ ބަލިން ރަނގަޅުވެފައެވެ. އަދި 38 މީހަކު ވަނީ ނިޔާވެފައެވެ.

ކޮވިޑް-19 އަށް ޕޮޒިޓިވްވާ މީހުން މަދުވި ކަމުގައިވީ ނަމަވެސް ބަލީގެ ނުރައްކާ ކުޑަ ނުވާ ކަމަށް ހެލްތު އެމަރޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނެއެވެ. އެހެންކަމުން ރައްކާތެރިވުމަށް އަޅާފައިވާ ފިޔަވަޅުތަކަށް ފަރުވާ ކުޑަ ނުކުރުމަށް ވަނީ އިލްތިމާސްކޮށްފައެވެ.

ކޮވިޑް-19 ކޮންޓްރޯލް ކުރުމަށް ގިނަ މަސައްކަތްތައް ކުރަމުންދާއިރު، މާލެ ސަރަހައްދުގައި ކޮވިޑް-19 ފެތުރިފައިވާ މިންވަރު ދެނެގަތުމަށް މިހާރު ވަނީ ޕްރިވިލެންސް ސަރވޭ ނުވަތަ އެންޓިބޮޑީ ސަރވޭގެ މަސައްކަތް ފަށާފައެވެ. މި ސަރވޭއަށް އާންމު ރައްޔިތުންގެ އެއްބާރުލުން ލިބޭލެއް ކުޑަކަން ފާހަގަކޮށް އެއްބާރުލުން ދިނުމަށް ވެސް އެޗްއީއޯސީން ވަނީ އެދިފައެވެ.