ގާސިމް މިނިވަންކުރަން ގޮވާލައި މާމިގިލީގައި މުޒާހަރާކޮށްފި
ގާސިމް ހައްޔަރުކޮށްގެން ސަރުކާރަށް ލިބޭނެ އެއްވެސް ފައިދާއެއް ނޯންނާނެ: މާމިގިލި ކައުންސިލް
މާމިގިލީގައި ގާސިމް ދޫކޮށްލަން ގޮވާލާ ކުރި މުޒާހަރާ
ޖުމްހޫރީ ޕާޓީގެ ލީޑަރ އަދި މާމިގިލީ ދާއިރާގެ މެމްބަރު ގާސިމް އިބްރާހިމް މިނިވަންކުރުމަށް ގޮވާލައި މާމިގިލީގައި ހޮނިހިރު ދުވަހު މުޒާހަރާކޮށްފި އެވެ. ގާތްގަނޑަކަށް ތިން ހާސް މީހުންގެ އާބާދީއެއް އޮންނަ، ގާސިމް ނިސްބަތްވާ މާމިގިލީގައި ކުރި ބޮޑު މުޒާހަރާގައި، އެ ރަށުގެ ހުރިހާ ރައްޔިތުން ކަހަލަ ގޮތަކަށް ބައިވެރިވި ކަމަށް މާމިގިލީ ކައުންސިލްގެ ނައިބު ރައީސް އަބްދުﷲ މުފީދު ވިދާޅުވި އެވެ. އެއާޕޯޓެއް އަދި ވަށައިގެން ޓޫރިސްޓް ރިސޯޓްތައް އޮންނަ މާމިގިލީގައި ފަށާފައިވާ މުޒާހަރާ ހުއްޓާލާނީ، މުފީދު ވިދާޅުވި ގޮތުގައި ގާސިމް ދޫކޮށްލުމުންނެވެ.
ގާސިމްގެ މައްޗަށް ގިނަ ތުހްމަތުތަކެއްކޮށް، އަދި އޭނާއަކީ މުޖުތަމައަށް ހުރި ނުރައްކަލެއް ކަމަށް ބުނެ 15 ދުވަހަށް ދޫނިދޫގައި ހައްޔަރުކޮށްފައިވާއިރު، މާމިގިލީގައި ކުރި މުޒާހަރާގެ ބައިވެރިން ގޮވާލާފައިވަނީ އެއީ އެއްވެސް އަސްލެއް ނެތް ސިޔާސީ ތުހްމަތުތަކެއް ކަމަށެވެ. އެހެންވެ، ވަގުތުން ވަގުތަށް ގާސިމް ދޫކޮށްލަން ގޮވާލި އެވެ.
"ގާސިމް ހައްޔަރުކޮށްގެން ސަރުކާރަށް ލިބޭނެ އެއްވެސް ފައިދާއެއް ނޯންނާނެ،" މުފީދު ވިދާޅުވި އެވެ.
ކުރިއަށްއޮތް ލޯކަލް ކައުންސިލް އިންތިޚާބުގައިވެސް މާމިގިލީ ދާއިރާއިން ސަރުކާރަށް އެއްވެސް ތާއީދެއް ނޯންނާނެ ކަމަށާއި، އިންތިޚާބުންވެސް ސަރުކާރަށް ލިބޭނީ ނާކާމިޔާބީ ކަމަށް އޭނާ ވިދާޅުވި އެވެ.
ގާސިމް ހައްޔަރުކުރަން ކްރިމިނަލް ކޯޓުގެ އިސް ގާޒީ ނެރުއްވި އަމުރުގައި ވަނީ ރައްޔިތުންގެ މަޖިލިހުގެ ރައީސާއި ނައިބު ރައީސްގެ އިތުބާރު ނެތްކަމަށް ހުށަހެޅޭނީ 42 މެމްބަރުންގެ ސޮޔާއެކު ކަމަށް މި މަހުގެ 10 ގައި ފާސްކުރުމާ ގުޅިގެން، މަޖިލިހުގެ ރައީސް އަބްދުﷲ މަސީހްގެ އިތުބާރު ނެތްކަމަށް ހުށަހެޅުމަށްޓަކައި 42 މެމްބަރުންގެ ސޮއި ހޯއްދެވުމަށް މެމްބަރުންނަށް ގާސިމް އެކި ގޮތްގޮތުން ނުފޫޒު ފޯރުވަމުންދާ ކަމަށެވެ. އަދި ސަލާމަތީ ބާރުތަކުގައި މަސައްކަތް ކުރާ ފަރާތްތަކާއި ފަނޑިޔާރުންނަށް ނުފޫޒު ފޯރުވަން މަސައްކަތް ކޮށް އަދި ރައްޔިތުންގެ މެދުގައި ފިތުނަ އާއި ބިރުވެރިކަން އުފެއްދުމަށް ގާސިމް މަސައްކަތް ކުރާ ކަމުގެ ތުހުމަތު ވެސް ކޯޓު އަމުރުގައި ކޮށްފައިވެ އެވެ.
ގާސިމް އިބްރާހިމް އިސްވެ ހުންނަވައިގެން މ. ކުނޫޒްގައި ސިލްސިލާކޮށް ބާއްވަމުންދާ ޖަލްސާތަކުގައި އެ ކަންކަމަށް ބާރު ލިބޭ ފަދަ މޭރުމަކުން ވާހަކަ ދައްކަމުން ދާތީ އާއި މި ކަންތައްތަކަކީ މިހާރު ތަހުގީގު ކުރަމުންދާ ކަންތައްތަކެއް ކަމަށް ވާތީ، ގާސިމް އިބްރާހިމް މުޖުތަމައު އަށް ދޫކޮށްފައި ބެހެއްޓުމަކީ މައްސަަލައިގެ ތަހުގީގަށް ބޮޑެތި ހުރަސްތަކެއް އެޅި އަދި މި ކަންކަމާ ގުޅޭ ގޮތުން ލިބެން ހުރި ހެކި ފޮރުވާ އަދި ހެކިބަސް ދޭން ތިބި ފަރާތްތަކަށް ނުފޫޒު ފޯރުވާ، އެ ހެކި ނައްތާލުމަށް ފުރުސަތު ތަނަވަސް ވެގެން ދާނެ ކަމެއް ކަމެއް ކަމަށާއި، އަދި ގާސިމް އިބްރާހިމް މުޖުތަމައު އަށް ދޫކޮށްފައި ބެހެއްޓުމަކީ މުޖުތަމައުގެ ސަލާމަތަށް ހުރި ނުރައްކަލެއް ކަމުގައި ފެނުމަކީ ވެސް އޭނާ ހައްޔަރު ކުރަންޖެހޭ ސަބަބެއް ކަމަށް ކޯޓް އަމުރުގައިވެ އެވެ.
ގާސިމް ހައްޔަރުކުރުން ގިނަ ބަޔަކު އަންނަނީ ކުށްވެރިކުރަމުންނެވެ.
