ތުރުކީއަށް އައި ބިންހެލުމުގައި 24 މީހަކު މަރުވެ، 800ށް ވުރެ ގިނަ މީހުންނަށް އަނިޔާވި: ޑިޒާސްޓަރ މެނޭޖްމަންޓް
31 އޮކްޓޯބަރު 2020 | ހޮނިހިރު 04:09ބިންހެލުން އައިސްފައިވަނީ ރެކްޓަރ މިންގަނޑުން 7.0 މެގްނެޓިއުޑް ބާރުމިނުގައި
ތުރުކީއަށް އައި ބިންހެލުމާއިއެކު ގިނަ އިމާރާތްތަކަށް ގެއްލުންވި
ތުރުކީއަށް އައި ބިންހެލުމުގައި މިހާތަނަށް 24 މީހަކު މަރުވެފައިވާކަން ކަށަވަރު ކުރެވިފައިވާ ކަމަށާއި އަދިވެސް އިތުރަށް ބަލަމުން އަންނަކަމަށް އެ ގައުމުގެ ޑިޒާސްޓަރ އެންޑް އިމަރޖެންސީ މެނޭޖްމަންޓް ޕްރެސިޑެންސީ (އޭ.އެފް.އޭ.ޑީ)ން ބުނެފިއެވެ.
އޭ.އެފް.އޭ.ޑީއާއި ހަވާލާދީ ބައިނަލްއަގްވާމީ މީޑިއާތަކުގައި ރިޕޯޓުކުރާގޮތުން، އެ ގައުމުގެ ކަމާއި ގުޅުންހުރި ވުޒާރާތައް ގުޅިގެން ކުރިއަށްގެންދާ ރެސްކިއު އޮޕަރޭޝަންގައި 17 އިމާރާތެއް ވެއްޓިފައިވާ ސަރަހައްދުތައް ބަލައި، މީހުން ސަލާމަތްކުރުމުގެ މަސައްކަތް ހުއްޓުމެއްނެތި ދަނީ ކުރަމުންނެވެ. އެގޮތުން، މިހާތަނަށް 24މީހަކު މަރުވެފައިވާކަމަށް ކަށަވަރު ކުރެވިފައިވާ ކަމަށާއި 804 މީހަކަށް އެކިވަރުގެ އަނިޔާވެފައިވާކަމަށް އޭ.އެފް.އޭ.ޑީން ވަނީ ހާމަކޮށްފައެވެ.
އަދި، ބިންހެލުމަށް ފަހު 194 އާފްޓަރޝޮކް ރިކޯޑްކުރެވިފައިވާއިރު އޭގެތެރެއިން 23 އާފްޓަރޝޮކް 4.0 މެގްނެޓިއުޑްގައި އައިކަމަށް ރެކޯޑް ކުރެވިފައިވާ ކަމަށް ޑިސާސްޓަރ މެނޭޖްމަންޓުން ބުނެއެވެ. މި ހާދިސާގައި 20 އިމާރާތެއް ބިމާއި ހަމަވެފައިވެއެވެ.
އެޖީއަން ކަނޑަށް އައި 7.0 މެގްނިޓިއުޑްގެ މި ބިންހެލުމުގައި ގްރީސް އާއި ތުރުކީ އަށް ވަނީ ބޮޑެތި ގެއްލުން ވެފައެވެ. އެގޮތުން، ގިނަ އިމާރާތްތައް ހަލާކުވެ، ވެއްޓިފައިވާއިރު އެތައް ބައެއް މި އިމާރާތްތަކުގެ ދަށުވެފައިވާ ކަމަށް ބައިނަލްއަގްވާމީ ރިޕޯޓުތަކުން ބުނެއެވެ.
ބިންހެލުމަށް ފަހު ސުނާމީއެއްވެސް އަރައިފައިވާއިރު، ތުރުކީގެ ރެސްކިއު ޓީމުގައި ހަރަކާތްތެރިވާ އޮފިޝަލަކު ވަނީ، ސުނާމީގެ ސަބަބުން ވެއްޓިފައިވާ އިމާރާތްތަކުން މީހުން ސަލާމަތް ކުރުމުގެ މަސައްކަތައް ކޮންމެސް ވަރަކަށް ހުރަސް އެޅިފައިވާކަމަށް ބުނެފައެވެ
މިކަމާއި ގުޅޭ އިތުރު މައުލޫމާތު ލިބުމާއި އެކު ހިއްސާކުރާނެކަމަށް އޭ.އެފް.އޭ.ޑީން ވަނީ ބުނެފައެވެ.
