މާލެ ސަރަހައްދުގައި ކޮވިޑް-19 ފެތުރިފައިވާ މިންވަރު ދެނެގަތުމަށްޓަކައި މިހާރު ކުރިއަށްގެންދާ ޕްރިވިލެންސް ސަރވޭ ނުވަތަ އެންޓިބޮޑީ ސަރވޭއަށްފަހު، ލިބޭ ނަތީޖާއިން އިތުރު ލުއި ތަކެއް ދިނުމަށް މަގުފަހިވެގެން ގޮސްދާނެ ކަމަށް ޑރ. ރަހީމާ އަބްދުއްރަހީމް ވިދާޅުވެއްޖެ އެވެ.
ރާއްޖެޓީވީގެ "ނިއު ނޯމަލް" ކަވަރޭޖަށް މައުލޫމާތުދެއްވަމުން ރަހީމާ ވިދާޅުވީ ސަރވޭއަށް އެއްބާރުލުން ލިބޭ މިންވަރު ކުޑަކަމަށާއި ހުރިހާ ފަރާތްތަކުންވެސް މިސަރވޭގައި ބައިވެރިވެ މިސްޓަޑީ ފުރިހަމަކުރުމަށް އެއްބާރުލުން ދިނުމަށް އެދޭ ކަމަށެވެ.
ގުރުއަތުން މީހުން ހޮވައިގެން ސާރވޭ ކުރިއަށްގެންދިއުމުގެ ބޭނުމަކީ ސައިންޓިފިކް ގޮތެއްގައި އެންމެ ރަނގަޅު ނަތީޖާއާއި ހަމައަށް ވާސިލްވުމަށް ކުރާ މަސައްކަތެއް ކަމަށާއި އެހެންނަމަވެސް މިހާތަނަށް އައި އިރުވެސް ސާމްޕަލް ނެގިފައިވަނީ 1000 އާއި ގާތަށް ކަމަށް ރަހީމާ ވިދާޅުވި އެވެ.
ރަހީމާ ވިދާޅުވީ އެޗްޕީއޭއިން މިގޮތަށް އެސްއެމްއެސް އެއް ލިބުމުން އެކަމަށް ފުރިހަމަ އެއްބާރުލުން ދިނުމަށް އިލްތިމާސް ކުރާ ކަމަށާއި މިސާރވޭގެ ނަތީޖާގެ ސަބަބުން ކޮވިޑް19 ފެތުރިފައިވާ މިންވަރު ދެނެގެނެވި ލުއި ތަކެއް ދިނުމަށް އަވަސްވެގެންދާނެ ކަމަށެވެ.
އަދި މިހާރު ނިންމާފައިވާ ގޮތަށް ގުރުއަތުން މީހުން ހޮވައިގެން ސަރވޭ ކުރިއަށް ނުގެންދެވިއްޖެ ނަމަ މާލެ އޭރިއާތަކަކަށް ބަހާލައިގެން ސާރވޭ ކުރިއަށް ގެންދާނެ އިތުރު ޕްލޭންތަކެއްވެސް ހަދާފައިވާ ކަމަށް އޭނާ ވިދާޅުވި އެވެ. އެހެންނަމަވެސް އެންމެ އެދެވިގެންވަނީ ގުރުއަތުން ހޮވޭ ފަރާތްތައް އެސްއެމްއެސް ލިބުމާއި އެކު ވީހާވެސް އަވަހަށް އެންމެ ކައިރީގައި ހުރި ސެންޓަރަކަށް ވަޑައިގެން ސާމްޕަލް ދިނުމަށް ކަމަށް ރަހީމާ ތަކުރާރު ކުރެއްވި އެވެ.
ކޯވިޑް 19 ފެތުރިގެން އައި އިރު މިކަމުގެ މައުލޫމާތު ހޯދުމަށް މީހުންގެ ޝައުގުވެރިކަން ވަރަށް ބޮޑުވިކަން ފާހަގަކުރެވުނު. ނަމަވެސް މިހާރު އެކަން އެގޮތަށް ނުދާކަން ފާހަގަކުރެވޭ. އަދި މިސާރވޭއަށް ދިމާވާ އެންމެ ބޮޑު މައްސަލައަކީވެސް ފޯނު ނަންބަރު ބަދަލު ވުމާއި ގުރުއަތުން ހޮވޭމީހާއާއި ދިމާނުވުން. މިއީ ވަރަށް މުހިއްމު ސަރވޭއެއް. ހުރިހާ ފަރާތްތަކުންވެސް ފުރިހަމައަށް އެއްބާރުލުން ދިނުމަށް އިލްތިމާސްކުރަން.~ ޑރ. ރަހީމާ އަބްދުއްރަހީމް
މިއީ ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) އާއި ގުޅިގެން އެޗްޕީއޭއިން ކުރިއަށް ގެންދާ ސަރވޭ އެކެވެ. މި ސަރވޭގައި ޖުމްލަ 4098 މީހެއްގެ ސާމްޕަލް ނަގައި ޓެސްޓު ކުރުމަށް ވަނީ ހަމަޖެހިފައެވެ.
މި ސަރވޭ ކުރިއަށްދަނީ ހަތަރު އުމުރުފުރައަކަށް ބަހާލައިގެންނެވެ. އެއީ 17 އަހަރުން ދަށުގެ ކުދިންނާއި 18 އަހަރާއި 34 އަހަރާ ދެމެދުގެ މީހުންނާއި 35 އަހަރާއި 59 އަހަރާ ދެމެދުގެ މީހުން އަދި އުމުރުން 60 އަހަރުން މަތީގެ އުމުރުފުރާތަކެވެ. މީގެތެރެއިން 17 އަހަރުން ދަށުގެ ކުދިންގެ ސާމްޕަލް ނެގުމުގެ މަސައްކަތް ކުރަމުންދާއިރު މިހާރު އަންނަނީ 18 އަހަރާއި 34 އަހަރާ ދެެމެދުގެ މީހުންގެ ސާމްޕަލް ނެގުމުގެ މަސައްކަތް ކުރަމުންނެވެ.
މި ސަރވޭގެ އެންމެ މުހިންމު ބޭނުމަކީ މާލެ ސަރަހައްދުގެ އާބާދީގެ ތެރެއިން ކުރިން ކޮވިޑް-19 އަށް ހުށަހެޅިފައިވަނީ އާބާދީގެ ކިތައް އިންސައްތަތޯ ބެލުމެވެ. މީގެ ސަބަބުން ކޮވިޑް ފެތުރިފައިވާ ބާރުމިން ދެނެގަނެވި، ސިޔާސަތުތަކަށް އިތުރަށް ގެންނަންވީ ކޮން ބަދަލުތަކެއްތޯ ބެލިގެންދާނެއެވެ. މި ދިރާސާ ކުރަން ބޭނުންކުރަނީ ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން އެކުލަވާލާފައިވާ މެތޮޑޮލަޖީއެވެ.
