އަތޮޅުތެރޭގެ ރަށްތަކުން ކޮވިޑް-19 އަށް މިވަގުތު ފަރުވާ ހޯދަމުން ދަނީ 21 ދިވެހިން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭ އިން އެންމެ ފަހުން އާންމު ކޮށްފައިވާ މައުލޫމާތުތައް ދައްކާގޮތުން އަތޮޅުތަކުން ކޮވިޑްގެ ކޭސްތައް ފެނިފައިވާ 21 ރަށުގެ ތެރެއިން 12 ރަށެއްގައި ދިވެހިން ދަނީ ކޮވިޑަށް ފަރުވާ ހޯދަމުންނެވެ. އަދި 16 ބިދޭސީއަކު ދަނީ ކޮވިޑަށް ފަރުވާހޯދަމުންނެވެ.

އެގޮތުން މާލެ ފިޔަވައި އެންމެ ގިނަ އަދަދަކަށް މިވަގުތު އެކްޓިވް ކޭސްތައް ފެނިފައިވާ، ހދ. ކުޅުދުއްފުށިން 9 މީހުން ދަނީ ކޮވިޑަށް ފަރުވާ ހޯދަމުންނެވެ. އެއީ ހަ ކޮންޓެކްޓުންނާއި ރެންޑަމް ސާމްޕްލިންގ ގެ ތެރެއިން ޕޮޒިޓިވްވި ދެ މީހެއްގެ އިތުރުން އަލާމާތް ހުރެގެން ޓެސްޓުކުރި މީހެކެވެ. އޭގެ ތެރޭގައި ހިމެނެނީ 6 ދިވެހިންނާއި ތިން ބިދޭސީންނެވެ.

މީގެއިތުރުން ސ. ހިތަދޫއިން ތިން މީހަކު ކޮވިޑަށް ފަރުވާ ހޯދަމުންދާއިރު ލ. ކައްދޫއިން ވެސް ތިން މީހުން ދަނީ ކޮވިޑަށް ފަރުވާހޯދަމުންނެވެ.

ކޮވިޑުގެ ފެސިލިޓީތަކުގައި ފަރުވާހޯދަމުންދާ މީހުންނަށް ބަލާލާއިރު، ބ. އަތޮޅު ކޮވިޑް ފެސިލިޓީގައި ހަ މީހަކަށް ދަނީ ފަރުވާދެމުންނެވެ.

ރާއްޖެ އިން މިވަގުތު 862 މީހުން ކޮވިޑަށް ފަރުވާ ހޯދަމުންދާ އިރު، އައިސޮލޭޝަން ފެސިލިޓީތަކުގައި ފަރުވާ ހޯދަމުން ދަނީ 277 މީހުންނެވެ. އަދި ހޮސްޕިޓަލްގައި ފަރުވާ ހޯދަމުން ދަނީ 52 މީހުންނެވެ.