ސަރުކާރުގެ ޔުޓިލިޓީ ކުންފުނި ކަމަށްވާ ފެނަކަ ކޯޕްރޭޝަނުން ޑޮލަރު ގަތުމަށް ކަމަށްބުނެ، ޝަރޫ ލޯންޗްސް ސަރވިސްއަށް ދިން 17 މިލިއަން ރުފިޔާ އަނބުރާ ދިނުމަށް ސިވިލް ކޯޓުން ކުރި ހުކުމް ހައިކޯޓުން ވެސް ދަމަހައްޓައިފި އެވެ.

މި ފައިސާ އަނބުރާ ދެއްކުމަށް ސިވިލް ކޯޓުން ހުކުމް ކޮށްފައިވަނީ 2017 ވަނަ އަހަރުގެ އޮގަސްޓް މަހުގެ 22 ވަނަ ދުވަހު އެވެ. އަދި އެ ހުކުމުގައި ބުނެފައިވަނީ އެ ފައިސާ ހަތަރު މަސް ތެރޭގައި ދެއްކުމަށެވެ.

އެ މައްސަލަ ޝަރޫ ލޯންޗް ސަރވިސްއިން އިސްތިއުނާފު ކުރުމުން ހައި ކޯޓުން ކުރި ހުކުމުގައި ބުނެފައިވަނީ ޝަރޫ ލޯންޗް ސަރވިސްއަށް 17 މިލިއަން ރުފިޔާ ފެނަކައިން ދިން ކަމަށާއި، އަދި ޝަރޫ ލޯންޗް ސަރވިސްއިން ފެނަކައަށް ދޫކުރިި ޑޮލަރު ޗެކުތައް ބައުންސްވުމާއި ގުޅިގެން އެ ފައިސާ ފެނަކައަށް ލިބިފައިނުވާ ކަމަށެވެ. އަދި އެކަމާ މެދު ދެ ފަރާތުގެ ދެމެދުގައި އެއްވެސް ސުވާލެއް ނެތް ކަމަށާއި އެ ފައިސާ އަކީ ޝަރޫ ލޯންޗް ސަރވިސްއިން ފެނަކައަށް އަނބުރާ ދައްކަން ޖެހޭ ފައިސާކަމަށް ހައި ކޯޓުގެ ހުކުމްގައި ބުނެފައިވެއެވެ.

ހައިކޯޓުގެ ހުކުމުގައި ބުނެފަައި ވަނީ، ސިވިލް ކޯޓުގެ ހުކުމަށް ބަދަލެއް ގެންނަންޖެހޭ ޝަރުއީ ގާނޫނީ ސަބަބެއް ނެތްކަމަށެވެ.

ޑޮލަރު ގަތުމަށް ކަމަށްބުނެ، ޝަރޫ ލޯންޗް ސަރވިސްއަށް 17 މިލިއަން ރުފިޔާ ފެނަކަ ކޯޕަރޭޝަނުން ދީފައިވަނީ، ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ. މިމައްސަލައިގެ އިތުރުންވެސް ވަރަށް ގިނަ ކޮރަޕްޝަނުގެ އަމަލުތަކެއް ސަރުކާރުގެ ކުންފުނިތައް މެދުވެރިކޮށް، ރައީސް ޔާމީންގެ ސަރުކާރުން ހިންގިއިރު، ފެނަކަ ކޯޕަރޭޝަނަކީ އޭގެތެރެއިންވެސް ފާހަގަ ކޮށްލެވޭ ކުންފުންޏެކެވެ. އޭރު ފެނަަކަ ކޯޕަރޭޝަންގެ މެނޭޖިންގ ޑިރެކްޓަރއަށް ހުންނެވީ، އިދިކޮޅު ޕީޕީއެމްގެ ހަރަކާތްތަކުގައި އިސްކޮށް އުޅުއްވާ މުހައްމަދު ނިމާލް އެވެ.