ކޮވިޑް-19 ގެ ސަބަބުން ރާއްޖޭގެ ވިޔަފާރިތަކަށާއި، އަމިއްލަ މަސައްކަތް ކުރާ ފަރާތްތަކަށް ދިމާވި މާލީ ގޮންޖެހުންތަކުން އަރައި ގަތުމަށް ސަރުކާރުން ދޫކުރާ ރިކަވަރީ ލޯންތަކުގެ ގޮތުގައި 850 މިލިއަނަށް ވުރެ ގިނަ ރުފިޔާ ދޫކޮށްފިއެވެ.

ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން އޮކްޓޫބަރ މަހުގެ 22 ވަނަ ދުވަހުގެ ނިޔަލަށް ރިކަވަރީ ސްކީމްގެ ދަށުން 854.3 މިލިއަން ރުފިޔާ ވަނީ ދޫކޮށްފައެވެ. އެއީ ރިސޯޓް ތަކަށާއި ބޮޑެތި ވިޔަފާރިތަކަށް ބޭންކް އޮފް މޯލްޑިވްސް (ބީއެމްއެލް) އިން ދޫކޮށްފައިވާ 545.8 މިލިއަން ރުފިޔާ އާއި ކުދި އަދި މެދު ފަންތީގެ ވިޔަފާރިތަކަށާއި އަމިއްލަ މަސައްކަތް ކުރާ ފަރާތްތަކަށް އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) މެދުވެރިކޮށް ދޫކޮށްފައިވާ 308.5 މިލިއަން ރުފިޔާއެވެ.

އެގޮތުން ބީއެމްއެލްއިން އޮކްޓޫބަރ 22 ވަނަ ދުވަހުގެ ނިޔަލަށް 385 ވިޔަފާރިއަކަށް 545.8 މިލިއަން ރުފިޔާ އަދި އަށް މިލިއަން އެމެރިކާ ޑޮލަރު ވަނީ ދޫކޮށްފައެވެ.

ފިނޭންސް މިނިސްޓްރީގެ ތަފާސްހިސާބުތައް ދައްކާގޮތުން 580 ވިޔަފާރިއަކުން ވަނީ ރިކަވަރީ ސްކީމްގެ ލޯނަށް އެދި ބީއެމްއެލްއަށް ހުށައަޅާފައެވެ. މީގެ ތެރެއިން 416 އެޕްލިކޭޝަނެއް އެޕްރޫވްކޮށްފައިވާ އިރު، 18 އެޕްލިކޭޝަނެއް ވަނީ ރިޖެކްޓްކޮށްފައެވެ. މިވަގުތު ޕްރޮސެސިންގައި 10 އެޕްލިކޭޝަނެއް އޮތް އިރު، 136 އެޕްލިކޭޝަނެއްގައި ބޭނުންވާ ހުރިހާ މައުލޫމާތެއް ފުރިހަމަ ނުވާކަމަށް ފިނޭންސްއިން ބުނެއެވެ.

މީގެ އިތުރުން އެސްޑީއެފްސީއިން ދޫކުރާ ލޯނަށް 3،795 ފަރާތަކުން އެޕްލިކޭޝަން ހުށައަޅާފައިވާ އިރު، މިއީ 574.5 މިލިއަން ރުފިޔާއެވެ. މި އެޕްލިކޭޝަންތަކުގެ ތެރެއިން 2,080 އެޕްލިކޭޝަނެއް އެޕްރޫވްކޮށްފައިވާ އިރު، 632 އެޕްލިކޭޝަނެއް ވަނީ ރިޖެކްޓް ކޮށްފައެވެ. އަދި 2,029 އެޕްލިކޭޝަނެއް ސޭންކްޝަން ކޮށްފައިވާ އިރު، މިހާތަނަށް 1,858 ފަރާތަކަށް ލޯން ދޫކޮށްފައިވާ ކަމަށް ފިނޭންސްއިން ބުނެއެވެ.

މި ލޯނުތަކަކީ ރަހުނަކާއި ނުލައި ހަ އިންސައްތައިގެ އިންޓްރެސްޓް ރޭޓެއްގައި ތިން އަހަރު ދުވަހުން ދައްކައި ހަލާސް ކުރާ ގޮތަށް ދޫކުރާ ލޯނުތަކެކެވެ. މި ލޯނުތަކަށް ހަ މަސް ދުވަހުގެ ގްރޭސް ޕީރިއަޑަށް ލިބިގެންދާއިރު، މި ހަ މަސް ދުވަހަށް އިންޓްރެސްޓް އަދި ޕްރިންސިޕަލް ޕޭމަންޓް ނުހިނގާނެއެވެ.