ދެކުނު ކޮރިއާގެ ޒުވާނުން އަސްކަރީީއާ އާއި ގުޅެން ޖެހޭނެ ކަމަށް އޮންނަ ގާނޫނަށް ލުއިތަކެއް ގެނެސްފިއެވެ.
ދެކުނު ކޮރިއާގެ ޒުވާން ކޮންމެ ފިރިހެނެއްވެސް އުމުރުން 21 އަހަރުވުމުން 21 މަސް ދުވަހަށް އަސްކަރިއްޔާ އަށް ހިދުމަތް ކުރަން އެގައުމުގެ ގާނޫނު މަޖުބޫރު ކުރާ އިރު، ދެކުނު ކޮރިއާ އަކީ އެގައުމުގެ ޒުވާނުން އަސްކަރިއްޔާ އާއި ގުޅުން މަޖުބޫރުކުރާ މަދު ގައުމުތަކުގެ ތެރޭގައި ހިމެނޭ ގައުމެކެވެ.
އެގޮތުން އެގައުމުގެ ޒުވާނުން އަސްކަރިއްޔާ އަށް ހިދުމަތް ކުރަން ނުގޮސްފިނަމަ، ނުވަތަ އަސްކަރިއްޔާ އާއި ނުގުޅިއްޖެ ނަމަ އެ ޒުވާނުން ހިމެނިގެން ދާނީ ކުއްވެރިގެން ތެރޭގައެވެ. މިހާތަނަށް އައި އިރު، އަސްކަރިއްޔާ އާއި ގުޅެން ދެކޮޅު ހެދި 20،000 އަށް ވުރެ ގިނަ މީހުން ވަނީ ޖަލަށް ލާފައެވެ.
އެހެން ނަމަވެސް އަސްކަރިއްޔާ އާއި ގުޅެން މަޖުބޫރުކޮށްފައިވާ ގާނޫނަށް ގެނައި ބަދަލާއި އެކު އަސްކަރިއްޔާ އާއި ގުޅި ހިދުމަތްކުރަން ބޭނުން ނުވާ މީހުންނަށް އެގައުމުގެ ޖަލުތަކުގައި މަސައްކަތްކުރުމުގެ ފުރުސަތު ލިބެއެވެ. ޖަލުތަކުގައި އެ މީހުންނަށް ޖަލުތައް ސާފުކުރުމުގެ މަސައްކަތުގެ އިތުރުން ޖަލުތަކުގައި ކެެއްކުމާއި ޖަލުގެ ޑޮކްޓަރުންގެ އެހީތެރިންގެ ގޮތުގައި ހަރަކާތްތެރިވެވޭނެއެވެ.
ގާނޫނަށް މިގެނައި ބަދަލާއި އެކު ހަމަ އެކަނި ޖަލުތަކުގައު މަސައްކަތްކުރުމުގެ ފުރުސަތު އަދި ހުޅުވާލާފައި އޮތް ނަމަވެސް ކުރިއަށް އޮތް ތަނުގައި، ނަރސިން ހޯމް ތަކުގައި ނުވަތަ ފަޔަރފައިޓަރުންގެ ގޮތުގައި ހިދުމަތްކުރުމުގެ ފުރުސަތު ހުޅުވާލެވިގެން ދާނެ ކަމަށް ދެކުނު ކޮރިއާގެ މީޑިއާތަކުން ރިޕޯޓްކުރެއެވެ.
