ޖޭއެސްސީގެ ފޯމޭޝަނާ ގުޅޭ ބިލުގެ މަސައްކަތް އަންގާރަ ދުވަހުގެ ޖަލްސާއަށް އެޖެންޑާކޮށްފި
ފްލާސްވުމާ އިފްލާސްކުރުމުގެ ބިލުގެ ބަހުސް ކުރިއަށް ގެންދިއުމަށް ވެސް ވަނީ ނިންމާފަ
ޖުޑިޝަލް ސަރވިސް ކޮމިޝަން (ޖޭއެސްސީ)
ޖުޑިޝަލް ސަރވިސް ކޮމިޝަން (ޖޭއެސްސީ)ގެ ފޯމޭޝަން ބަދަލުކުރުމަށް ގާނޫނު އަސާސީއަށް ހުށައަޅާފައިވާ އިސްލާހުގެ ބިލު އަންގާރަ ދުވަހުގެ މަޖިލީހުގެ ޖަލްސާއަށް އެޖެންޑާ ކޮށްފިއެވެ.
އަންގާރަ ދުވަހުގެ ޖަލްސާއަށް ދެ ބިލެއްގެ މަސައްކަތް އެޖެންޑާ ކުރެވިފައިވެއެވެ. އެއީ މަހިބަދޫ ދާއިރާގެ ޕީޕީއެމް މެމްބަރު ހުށައަޅުއްވާފައިވާ ޖޭއެސްސީގެ ފޯމޭޝަނާ ގުޅޭ ބިލާ ފުވައްމުލަކު ދާއިރާގެ މެމްބަރު ހުށައަޅުއްވާފައިވާ އިފްލާސްވުމާ އިފްލާސްކުރުމުގެ ބިލުގެ މަސައްކަތެވެ.
މި ދެ ބިލަށް ބަހުސްކޮށް ނިމިއްޖެނަމަ މި ބިލުތައް ބަލައިގަތުމަށް ވޯޓަށް އަހާ، ކަމާގުޅޭ ކޮމިޓީއަށް ދިރާސާ ކުރުމަށް ފޮނުވާނެއެވެ.
މީގެ އިތުރުން ދިވެހި ދައުލަތުގެ ދަރަނި އަނބުރާ ދެއްކުމާއި ގުޅޭ ގޮތުން މުޅި މަޖިލީހުގެ ކޮމިޓީން އެކުލަވާލި ރިޕޯޓު ހުށައަޅާ، ރިޕޯޓުގެ ބަހުސް ކުރިއަށް ގެންދިއުމަށް ވެސް ވަނީ ނިންމާފައެވެ.
މި ރިޕޯޓަކީ 2013 ވަނަ އަހަރާއި 2018 ވަނަ އަހަރާ ދެމެދު ދައުލަތް ދަރަނިވެރިވެފައިވާ މިންވަރާއި އެދަރަނި ބެހެއްޓިފައިވާ ގޮތާއި އަދި ކުރިޔަށް އޮތް ތިން އަހަރުގައި އެ ދަރަނި އަނބުރާ ދެއްކުމަށް ދައުލަތުގެ އާމްދަނީ ޖާގަ ދޭނެ މިންވަރު ދެނެގަތުމުގައި އަމަލު ކުރާނެ ގޮތުގެ އިރުޝާދަކަށް ހުށަހެޅި މައްސަލައަކާއި ގުޅިގެން މުޅި މަޖިލީހުގެ ކޮމިޓީން ދިރާސާކޮށް ނިންމި ގޮތުގެ ރިޕޯޓެކެވެ.
