ކާށިދޫއިން އެއްވެސް ތަނަކަށް ކޭބަލް ކާރު އެޅުމަކީ ކުރަން ހެޔޮވާ ވަރުގެ ކަމެއް ނޫން: އަސްލަމް
26 އޮކްޓޯބަރު 2020 | ހޯމަ 06:44އަސްލަމް ވިދާޅުވީ ކޭބަލް ކާރު އެޅުމަކީ 'ފީސިބަލް' ކަމެއް ކަމަށް ގަބޫލުނުކުރައްވާ ކަމަށް
މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް އަދި ކާށިދޫ ދާއިރާގެ މެމްބަރު އަބްދުﷲ ޖާބިރު
ކ. ކާށިދޫއިން އެއްވެސް ތަނަކަށް ކޭބަލް ކާރު އެޅުމަކީ ކުރަން ހެޔޮވާ ވަރުކަމެއް ނޫން ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައިވަނީ ކ.ކާށިދޫ އަދި ކ.ގާފަރު ކޭބަލް ކާރުން ގުޅާލުމުގެ މަސައްކަތް ސަރުކާރުގެ ޕްލޭންގައި ހިމަނާފައި ނުވަނީ ކީއްވެެގެންތޯ، ކާށިދޫ ދާއިރާގެ މެންބަރު އަބްދުﷲ ޖާބިރު ކުރެއްވި ސުވާލަށް ޖަވާބުދެއްވަމުންނެވެ.
އަސްލަމް ވިދާޅުވީ ކާށިދޫއިން އެއްވެސް ތަނަކަށް ކޭބަލް ކާރު އެޅުމަކީ 'ފީސިބަލް' ކަމެއް ކަމަށް ގަބޫލުނުކުރައްވާ ކަމަށެވެ. އަދި މި ވާހަކަ ކިތަންމެ ވަރަކަށް ދެއްކެވިނަމަވެސް، އެއީ ވާނެ ކަމެއް ނޫންކަން އެނގެން ޖެހޭ ކަމަށާއި އެއީ ކުރަން ހެޔޮވާވަރުގެ ކަމެއް ވެސް ނޫން ކަމަށް ވިދާޅުވިއެވެ.
މިހެން ވިދާޅުވުމުން ޖާބިރު ވަނީ ނުރުހުން ފާޅުކުރާއްވާ ތަޅުމުގައި އަޑުގަދަކުރައްވާފައެވެ.
މިނިސްޓަރގެ ޖަވާބާއި ގުޅޭގޮތުން ވާހަކަދައްކަވަމުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ މިހާރު ރައްޔިތުންނަށް ދެމުންދާ އުއްމީދަކީ ރާއްޖޭގައި އެބާވަތުގެ ބޮޑެތި އުމްރާނީ ތަރައްގީ ހިންގާ ކޮންމެ ރަށަކީ ގައުމެއްގެ ގޮތުގައި ސިފަވާ ގޮތަށް އެރަށެއް ތަރައްގީ ކުރުން ކަމަށެވެ. އަދި އެފަދަ އުއްމީދު ދެއްވާއިރު، އެއީ ކުރެވޭނެ ކަމެއްތޯ ވިސްނެވުން ވަރަށް މުހިއްމު ކަމަށެވެ.
ކާށިދޫ އަދި ގާފަރު ކޭބަލް ކާރުން ގުޅާލުމަކީ ކާށިދޫ ދާއިރާގެ މެމްބަރު އަބްދުﷲ ޖާބިރު، އެ ދާއިރާގެ ރައްޔިތުންނަށް ވެފައިވާ ވައުދެކެވެ.
