ކަރަންޓު ކެނޑުނީ ހުރިހާ ޖެނެރޭޓަރެއް ޝަޓްޑައުން ވެގެން: މުޣުނީ

ހުކުރު ދުވަހު މުޅި މާލެއިން ކަރަންޓު ކެނޑެން ދިމާވި ސަބަބަކީ، ނެޓްވޯކްގެ މައި ކޭބަލް އަކަށް ދިމާވި މައްސަލައަކާއި ގުޅިގެން އޮޓޮމެޓިކުން ހުރިހާ ހުރިހާ ޖެނެރޭޓަރުތައް ކެނޑުމުން ކަމަށް ސްޓެލްކޯގެ މެނޭޖިން ޑިރެކްޓަރު ހަސަން މުޢުނީ ވިދާޅުވެއްޖެއެވެ.

ދައުލަތުގެ މީޑިއާގެ ޕްރޮގްރާމެއްގައި ހޮނިހިރު ދުވަހުގެރޭ ވާހަކަ ދައްކަވަމުން މުޢުނީ ވިދާޅުވީ، ކޭބަލަށް މައްސަލައެއް ދިމާވެއްޖެއްޔާ ޖެނެރޭޓަރުތައް އާއްމު ކޮށް ވެސް ކެނޑޭނެ ކަމަށެވެ. ނަމަވެސް އެއީ މަދު ހާލަތެއްގައި ނޫނީ ދިމާނުވަ ކަމެއް ކަމަށް ވިދާޅުވިއެވެ.

އޭނާ ވިދާޅުވީ، ކަރަންޓު ކެނޑުނު ހިސާބުން ފެށިގެން މައްސަލަ ހައްލު ކުރުމުގެ މަސައްކަތް ކުރިޔަށް ދަނިކޮށް އަނެއްކާ ވެސް ދެވަނަ ފަހަރަށް ޖަނަރޭޓަރު ނިވުނު ކަމަށެވެ. ކަރަންޓު ފޯރުކޮށް ދިނުމުގައި ލަސްތަކެއް ދިމާވި އެންމެ ބޮޑު ސަބަބަކީ ދެވަނަ ފަހަރަށް ޖެނެރޭޓަރުތައް ކެނޑިގެން ދިޔުމުން ކަމަށް ވިދާޅުވިއެވެ.

މުޣުނީ ވިދާޅުވީ، ކަރަންޓު ކެނޑުން ފަދަ ހާދިސާއެއް ދިމާވިޔަ ނުދޭނެ ގޮތަށް މަސައްކަތް އަބަދު ވެސް ކުރައްވަމުން ގެންދަވާ ކަމަށެވެ. އެގޮތުން މައިގަނޑު ދެ ބަޔަކަށް މަސައްކަތްތައް ވަނީ ބެހިފައެވެ. އެއީ ހަކަތަ އުފެއްދުމާއި، ޑިސްޓްރިބިއުޓް ކުރުން އަދި ނެޓްވޯކެއް ބޭނުން ކޮށްގެން ކަސްޓަމަރުންނަށް ހިދުމަތް ދިނުމެވެ.

އެ ދެ ބަޔަށް ވެސް އެއް ބަޔަކަށް މައްސަލަ ޖެހިއްޖެ ނަމަ ހިދުމަތް ދިނުމުގައި ބުރޫތަކެއް އަރާ ކަމަށް ވިދާޅުވިއެވެ، ނަމަވެސް ދެބައި މެއިންޓެއިން ކުރުމުގެ މަސައްކަތް 24 ގަޑިއިރު ކުރިޔަށް ގެންދާކަން މުޣުނީ ވަނީ ފާހަގަކުރައްވާފައެވެ.