ޕޮލެންޑްގެ ރައީސް ޑުޑާ ކޮވިޑަށް ޕޮޒިޓިވް ވެއްޖެ

ޕޮލެންޑްގެ ރައީސް އަންޑްރޭ ޑުޑާ ކޮވިޑް-19 އަށް ޕޮޒިޓިވް ވެއްޖެއެވެ.

އުމުރުފުޅުން 48 އަހަރުގެ ޑުޑާ ކޮވިޑަށް ޓެސްޓު ކޮށްފައިވަނީ ހުކުރު ދުވަހުއެވެ. ކޮވިޑަށް ޕޮޒިޓިވް ވެފައިވާ ކަން ހާމަ ކުރައްވާ ޑުޑާ ޕޮލެންޑްގެ ރައްޔިތުންނަށް ދެއްވި މެސެޖުގައި އެމަނިކުފާނު ވިދާޅުވީ ހާލު ރަނގަޅު ކަމަށާއި، ކޮވިޑްގެ އެއްވެސް އަލާމާތެއް ނުފެންނަ ކަމަށެވެ.

ޑުޑާ އިތުރަށް ވިދާޅުވީ ކޮވިޑުން ސަލާމަތްވެ އެނބުރި އަންނާނީ މިހާރު ހުންނެވި ހާލަށް ވުރެ ރަނގަޅު ކޮށް ކަމަށާއި، ކުރިޔަށް އޮތް ދުވަސްތަކުގައި ހުންނަވާނީ ސެލްފް އައިސޮލޭޝަންގައި ކަމަށެވެ.

ފާއިތުވެ ދިޔަ ހަފްތާތަކުގައި ޑުޑާ ވަނީ އެމެރިކާގެ ރައީސް ޑޮނާލްޑް ޓްރަމްޕާއި، އިނގިރޭސިވިލާތުގެ ބޮޑުވަޒީރު ބޯރިސް ޖޯންސަންއާ ބައްދަލު ކުރައްވާފައެވެ. ނަމަވެސް މި ދެ ބޭފުޅުންނަކީ ކޮވިޑަށް ޕޮޒިޓިވްވެ ބަލީގެ ފަރުވާ ހޯއްދަވާފައި ތިއްބެވި ދެ ބޭފުޅުންނެވެ. އެހެންކަމުން ޑުޑާ ކޮވިޑަށް ޕޮޒިޓިވްވި ސަބަބެއް އެނގިފައި ނުވާ ކަމަށް ރިޕޯޓްތައް ބުނެއެވެ.

ޕޮލެންޑަކީ މުޅި ދުނިޔެއިން 29 ވަނައަށް އެންމެ ގިނަ މީހުން ކޮވިޑަށް ޕޮޒިޓިވްވެފައިވާ ގައުމެވެ. އެގައުމުން މިހާތަނަށް 241،946 މީހުން ކޮވިޑަށް ޕޮޒިޓިވް ވެފައިވާ އިރު، ފާއިތުވެދިޔަ 24 ގަޑިއިރު އެކަނިވެސް އެގައުމުން 13،628 މީހުން ވަނީ ކޮވިޑަށް ޕޮޒިޓިވްވެފައެވެ. އަދި މިބަލީގައި އެގައުމުން މިހާތަނަށް 4،351 މީހުން ވަނީ މަރުވެފައެވެ.