އައު މުއައްސަސާއެއް ނުއުފައްދާ އެންބީއެސްގެ ނަން ބަދަލު ކުރަން މަޝްވަރާ ކޮށްފި
24 އޮކްޓޯބަރު 2020 | ހޮނިހިރު 08:28މިގޮތަށް މަޝްވަރާ ކުރެވެނީ ދައުލަތުގެ ހަރަދުކުޑަކުރުމުގެ ގޮތުން
ގައުމީ ތަރައްގީއާއި ތަރިކައިގެ ކޮމިޓީ: ކަމާ ބެހޭ އިދާރާތަކާއި އެކު މަޝްވަރާކުރަނީ
ދިވެހިރާއްޖޭގެ ތަފާސް ހިސާބުގެ ގާނޫނުގެ ދަށުން އައު މުއައްސަސާއެއް އުފެއްދުމުގެ ބަދަލުގައި މިހާރު އޮތް ނެޝަނަލް ބިއުރޯ އޮފް ސްޓެޓިސްޓިކްސްގެ ނަން މޯލްޑިވްސް ބިއުރޯ އޮފް ސްޓެޓިސްޓިކްސްއަށް ބަދަލުކުރުމަށް މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީގައި މަޝްވަރާކޮށްފިއެވެ.
މިގޮތަށް މަޝްވަރާ ކުރެވެމުން ދަނީ އިތުރު މުއައްސަސާއެއް އުފައްދައިފި ނަމަ ހަރަދު ބޮޑު ވެދާނެ ކަމަށް ބެލެވޭތީއެވެ. ސަރުކާރުން ވަނީ ކޮވިޑާއި ގުޅިގެން ރާއްޖޭގެ އިގްތިސާދަށް އައި ހީނަރު ކަމާއި ގުޅިގެން ހަރަދުތައް ކުޑަކުރަން ނިންމާފައެވެ.
އެގޮތުން ކޮމިޓީގެ މުގައްރިރު އަދި ބާރަށު ދާއިރާގެ މެމްބަރު އަހުމަދު އަބްދުﷲ ވިދާޅުވީ މި ބިލު ކޮމިޓީއަށް ލިބުނު އިރު ބިލުގައި ވަނީ މޯލްޑިވްސް ބިއުރޯ އޮފް ސްޓެޓިސްޓިކްސްގެ ނަމުގައި ވަކި މިނިވަން މުއައްސަސާއެއް އުފެއްދުމަށް ކަމަށެވެ.
އެހެން ނަމަވެސް، ސަރުކާރުގެ ހަރަދު ކުޑަ ކުރުމުގެ ސިޔާސަތުގެ ދަށުން އެ މަސައްކަތާއި ގުޅުން ހުރި މިނިސްޓްރީއެއްގެ ދަށުން ޔުނިޓެއްގެ ގޮތުގައި ގާއިމު ކުރުމަކީ މިހާރު އެންމެ ރަނގަޅު ގޮތް ކަމަށެވެ.
ކޮމިޓީގައި ވާހަކަ ދައްކަވަމުން ފިނޭންސް މިނިސްޓްރީގެ ޗީފް ފައިނޭންޝަލް ބަޖެޓް އެގްޒެކެޓިވް ސަރުވަޝް އާދަމް ވިދާޅުވީ ކުރިއަށް އޮތް އަހަރަކީ ދައުލަތަށް މާލީ ގޮތުން ވަރަށް ދަތި އަހަރެއް ކަމަށާއި އެހެން ކަމުން ހަރަދު ކުޑަ ކުރެވޭނެ ގޮތަކަށް ބިލު ފަރުމާ ކުރެވިގެން ދިއުމަކީ ވަރަށް މުހިއްމު ކަމެއް ކަމަށެވެ.
ތަފާސް ހިސާބުގެ ބިލުގައިވާ ގޮތުން މި ބިއުރޯގެ މަސްއޫލިއްޔަތަކީ ދިމިގްރާތި މުޖުތަމައެއް ތަރައްގީ ކުރުމުގައި ލާޒިމު ވަސީލަތެއް ކަމަށް ބަލައި ދިވެހިރާއްޖޭގެ އިގްތިސާދީ، އިޖުތިމާއީ އަދި ތިމާވެއްޓާއި އާބާދީއާ ބެހޭ ތަފާސް ހިސާބުގެ އަލީގައި ގައުމުގެ ހާލަތު ވަޒަންކުރުމަށް އެހީތެރިވެ ދިނުމުގެ ގޮތުން ތަފާސް ހިސާބު އެކުލަވާލާ، ފަސޭހައިން ބޭނުން ހިފޭނެ ގޮތަކަށް އެ މައުލޫމާތު ވަކި ފަރާތަކަށް ނުޖެހި އެއް ހަމައެއްގައި އާއްމުކޮށް ފޯރު ކޮށްދިނުމެވެ.
