ކޮވިޑް-19 އަށް އިތުރު 33 މީހަކު ޕޮޒިޓިވްވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން ބުނީ އަންގާރަ ދުވަހުގެ އިރުއޮއްސި 6:00 އިން ބުދަ ދުވަހުގެ އިރުއޮއްސި 6:00 ގެ ނިޔަލަށް ޕޮޒިޓިވްވީ މީހުންގެ ތެރެއިން 20 މީހުންނަކީ ދިވެހިންނެވެ. އަނެއް 13 މީހުންނަކީ އެކި ގައުމުތަކަށް ނިސްބަވްތާ މީހުންނެވެ.
އެންމެ ފަހުން ފެނުނު ކޭސްތަކުގެ ތެރެއިން 24 މީހަކު ދިރިއުޅެމުން އަންނަނީ ގްރޭޓަރ މާލެ ސަރަހައްދުގައެވެ. އަދި އަނެއް ނުވަ މީހުންނަކީ އަތޮޅު ތެރޭގެ ރަށްތަކާއި ރިސޯޓްތަކުގައި ދިރިއުޅެމުން އަންނަ މީހުންނެވެ.
އެޗްޕީއޭގެ ތަފާސް ހިސާބުތަކަށް ބަލާއިރު، 919 އެކްޓިވް ކޭސް ހިމެނެއެވެ. އައިސޮލޭޝަން ފެސިލިޓީތަކުގައި 329 މީހުން ތިބި އިރު 38 މީހަކަށް ހޮސްޕިޓަލްގައި ދަނީ ފަރުވާ ދެމުންނެވެ. އަދި ފާއިތުވެ ދިޔަ 24 ގަޑިއިރުގެ ތެރޭގައި 1570 ސާމްޕަލެއްގައި ނަގާ ވަނީ ޓެސްޓު ކޮށްފައެވެ.
މިހާތަނަށް ރާއްޖޭގައި ޖުމްލަ 11،391 މީހަކު ކޮވިޑަށް ޕޮޒިޓިވްވެފައިވާ އިރު، 10،428 މީހުންގެ ބަލި ވަނީ ފަސޭހަވެފައެވެ. ބަލީގައި ނިޔާވެފައި ވަނީ 37 މީހުންނެވެ.
މި ވަގުތުގެ އެކްޓިވް ކޭސްތައް ބަލާ އިރު 21 ރަށަކުން، 23 ރިސޯޓެއްގައި މި ބަލީގެ އެކްޓިކް ކޭސްތައް އެބަހުއްޓެވެ. އަދި ރިސޯޓުތަކުގައި މަސައްކަތް ކުރާ 34 މުވައްޒަފުން ބައްޔަށް ޕޮޒިޓިވްވެފައިވާ އިރު، 22 ފަތުރުވެރިން ވެސް ވަނީ ބައްޔަށް ޕޮޒިޓިވްވެފައެވެ.
ކޮވިޑް-19 ގެ ކޭސްތައް މަދުވި ކަމުގައިވީ ނަމަވެސް ބަލީގެ ނުރައްކާ ކުޑަ ނުވާ ކަމަށް ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ވަނީ ބުނެފައެވެ. އެހެން ކަމުން ރައްކާތެރިކަމުގެ ގޮތުން އަޅާފައިވާ ފިޔަވަޅުތަކަށް ޚާއްސަ ސަމާލުކަމެއް ދިނުމަށް އިލްތިމާސް ކޮށްފައި ވެއެވެ.
