ރަސްދޫގައި ފެނުގެ ނިޒާމް ޤާއިމްކުރުމުގެ މަސައްކަތް ނިންމާލައިފި

ރަސްދޫގައި ފެންޕްލާންޓެއް ގާއިމް ކުރުމުގެ އަމަލީ މަސައްކަތް ނިންމާލައިފިއެވެ.

ބުރާސްފަތި ދުވަހުގެރޭ ރާއްޖެ ޓީވީގެ ފަަލަސުރުހީ ޕްރޮގްރާމްގައި ވާހަކަދައްކަވަމުން މާލެ ވޯޓަރ އެންޑް ސީވެޖް ކޮމްޕެނީ (އެމްޑަބްލިއުއެސްސީ) ގެ މެނޭޖިން ޑިރެކްޓަރ ހަސަން ޝާހު ވިދާޅުވީ 22 އޮކްޓޯބަރ އެއީ އެކުންފުންޏަށް ވަރަށް ކާމިޔާބު އަދި ތާރީހީ ދުވަހެއްކަމަށެވެ. އެއީ އއ. ރަސްދޫގައި ފެން ޕްލާންޓެއް ގާއިމްކޮށް ކޮމިޝަން (ޓެސްޓް) ކުރުމުގެ މަސައްކަތް ވަރަށް ކާމިޔާބު ކަމާއެކު ނިންމާލެވިފައިވާތީކަމަށް ޝާހް ވިދާޅުވި އެވެ.

Advertisement

ފެންޕްލާންޓް ކޮމިޝަން ކުރުމުގެ މި ހަރަކާތުގައި އެމްޑަބްލިއުއެސްސީގެ ޗެއާޕާސަން އާއި މިނިސްޓަރ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާގެ އިތުރުން ސްޓެލަކޯގެ ބައެއް ބޭފުޅުންވެސް ބައިވެރިވެ ވަޑައިގަންނަވާފައިވާ ކަމަށް ޝަހް ވިދާޅުވިއެވެ.

ރަސްދޫއަކީ ފެން ފަށަލަ ތަގައްޔަރުވެފައިވާ ރަށެށްކަމުން އެރަށު ރައްޔިތުންގެ ވަރަށް ގިނަ ޝަކުވާތަކެއް ލިބޭކަމަށް ޝާހު ވިދާޅުވި އެވެ.

ފެންޕްލާންޓް ޓެސްޓުކުރުމުގެ ހުރިހާ ކަމެއް ނިމިފައިވުމާއެކު ދެން ކުރިޔަށްދާނީ ޕްލޭނިންގ މިނިސްޓްރީއާއި ހަވާލު ކުރުމުގެ މަސައްކަތް ކަމަށް ވިދާޅުވިއެވެ. އަދި އެތަން އޮޕޮރޭޓް ކުރުމަށް ހަވާލު ކުރާނީ ސްޓެލްކޯއަށް ކަމަށް ޝާހް ވިދާޅުވިއެވެ.

މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާއިން އެމްޑަބްލިއުއެސްސީއާ ހަވާލުކޮށްގެން ކުރިއަށްގެންދިޔަ މި މަޝްރޫއަކީ 30 މިލިއަން ރުފިޔާގެ މަޝްރޫއެއް ކަމަށް ވިދާޅުވިއެވެ. އަދި މިފެން ޕްލާންޓާއެކު ރަށުގައި 6288 މީޓަރުގެ ދިގު ފެން ހޮޅީގެ މައި ނެޓްވޯކެއް އަޅައިފައިވާނޭ ކަމަށާއި އަދި ރަށުގެ 297 ގެއެއްގައި ފެން މީޓަރު ބަހައްޓައި ގެތަކަށް ފެނުގެ ކަނެކްޝަން ވަނީ ގުޅައިދީފައި ކަމަށް ވިދާޅުވިއެވެ.

ފެން ޑީސެލިނޭޓް ކުރުުމުގެ 2 ޕްލާންޓް މިހާރުވެސް ރަސްދޫގައި ހުރެއެވެ. ޝާހު އިތުރަށް ވިދާޅުވީ ޕްލާންޓް ގާއިމްކޮށްފައިވީ ނަމަވެސް ފެނުގެ ޑިމާންޑް ހުރިވަރެއް އިގޭނީ ފެން ބޭނުން ކުރަން ފެށުމުން ކަމަށެވެ.

ވާރޭފެން ރައްކާކުރުމަށްޓަކައި 703 ޓަނުގެ އެއް ތާނގީ އާއި 263 ޓަނުގެ ފެން ރައްކާ ކުރެވޭ އިތުރު ދެ ތާނގީއެއް ބަހައްޓައިފައިވެއެވެ.