ނަރުދަމާގެ ނިޒާމް ޤާއިމް ކޮށްފައި ވަނީ 50،000 މީހުންގެ އާބާދީއެއް ކަމަށް ބަލައިގެން ކަމަށް ވިދާޅުވި
މާލޭ ސިޓީގެ މަގެއްގެ މަތީގައި ފެން ބޮޑުވެފައި. ބޯކޮށް ވާރޭ ވެހޭ ކޮންމެ ފަހަރަކު މާލޭގެ މަގުތަކުގައި ފެން ބޮޑުވޭ
މާލޭ ސިޓީގައި ފެނާއި ނަރުދަމާގެ މައްސަލަ ދިމާވަނީ އާބާދީއަށް ނުކަތާތީ ކަމަށް އެމްޑަބްލިއުއެސްސީގެ މެނޭޖިން ޑިރެކްޓަރ ހަސަން ޝާހު ވިދާޅުވެއްޖެއެވެ.
ބުރާސްފަތި ދުވަހުގެރޭ ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން ޝާހު ވިދާޅުވީ މާލޭގެ ނަރުދަމާގެ ނިޒާމް ޤާއިމްކޮށްފައި ވަނީ 50،000 މީހުންގެ އަބާދީއެއް އޮންނާނެ ކަމަށް ބަލައިގެން ނަމަވެސް، މާލޭގައި 200،000 އެއްހާ މީހުން ދިރިއުޅޭ ކަމަށެވެ. އެހެން ކަމުން މި ނިޒާމް މިއޮތީ މާ ބޮޑު ތަނުން ވެސް މާލެއަށް ކުޑަވެފައި ކަމަށް ވިދާޅުވިއެވެ.
އެކަމުގެ ސަބަބުން ކޮންމެ ވަގުތެއްގައި ވެސް ސިއްޚީ ނުރައްކަލެއް ދިމާވުމަކީ އެކަށީގެންވާ ކަމެއް ކަމަށާއި އެކަމަށްޓަކައި އެ ކުންފުނީގެ އިމަަރޖެންސީ ޓީމް އަބަދު ވެސް ތިބެނީ ތައްޔާރަށް ކަމަށް ވިދާޅުވިއެވެ. އަދި މިހާރު ނަރުދަމާގެ މައްސަލަތައް މަދީ ވެސް، އެ ފަރާތްތަކުގެ ބުރަ މަސައްކަތުން ކަން ފާހަގަ ކުރައްވާ ޝާހު ވަނީ އެ މަސައްކަތުގައި ހަރަކާތްތެރިވާ މުވައްޒަފުންނަށް ޝުކުރު އަދާކުރައްވާފައެވެ.
މާލޭގެ ނަރުދަމާ ނިޒާމަށް ދިމާވެފައިވާ މައްސަލަތައް އިތުރަށް ތަފްސީލު ކޮށް ދެއްވަމުން ޝާހު ވިދާޅުވީ،ނަރުދަމާ ނިޒާމުގައި ބޭނުން ކޮށްފައި ހުރި ޔޫޕީވީސީ ހޮޅިތައް މުރަނަ ވެފައި ހުރުމުގެ ސަބަބުން ޕަމްޕް ބަދަލު ކޮށްފައި ޖެއްސުމުން ހޮޅިތައް ފަޅައިގެން ދާ ކަމަށެވެ. އެހެން ކަމުން މަސައްކަތް ކުރަން ޖެހެނީ ސަރަހައްދު އެއްކޮށް ކޮނެގެން ކަމަށް ވިދާޅުވިއެވެ.
އެ މަސައްކަތް ކުރަން ބަލާ އިރު، ހޮޅި ބަދަލު ކުރުމުގެ މަސައްކަތް ކުރަން ޖެހެނީ މާލޭގައި ބާރު ބޮޑު ހިސާބުތަކުގައި ކަމަށް ޝާހު ފާހަގަ ކުރެއްވިއެވެ. އެގޮތުން، ސަރުކާރުގެ ގިނަ އޮފީސްތަކާއި މަޖިލިސް ކުރާގެ ހުންނަ ސަރަހައްދު މީގެ ތެރޭގައި ހިމެނޭ ކަމަށް ވިދާޅުވިއެވެ.
މި އަހަރުގެ ތެރޭގައި ވެސް ހޮޅި ފަޅައިގެން ގޮސް ނަޖިސް ބޭރުވުމުގެ މައްސަލަތަކެއް ވަނީ ފެންމަތިވެފައެވެ. މިއީ އިންތިހާއަށް ރައްޔިތުންނަށް ދަތިވާ ކަމަކަށް ވެފައި، މިކަން ހައްލު ކުރުމަކީ މުހިއްމު ކަމެއް ކަމަށް ޝާހު ވިދާޅުވިއެވެ. އަދި އެ ހައްލު ހޯދުމަށްޓަކައި މަސްލަހަތުވެރިންނާއި އެކިއެކި އޮފީސްތަކާ މަޝްވަރާ ކުރަމުން އަންނަ ކަމަށް ވިދާޅުވިއެވެ.
ޝާހު އިތުރަށް ވިދާޅުވީ، މާލެ ސިޓީ ކައުންސިލުން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާ ހަވާލު ކޮށްގެން ކުރިއަށް ގެންދާ މާލޭގެ މަގުތައް ތަރައްގީ ކުރުމުގެ މަޝްރޫއު ނިމުމުން މި މައްސަލައިގެ ބޮޑު ބައި ހައްލު ވެގެން ދާނެ ކަަމަށެވެ. މާލޭގެ މަގުތައް ތަރައްގީ ކުރުމުގެ މަޝްރޫއަކީ 462 މިލިއަން ރުފިޔާގެ މަޝްރޫއެކެވެ.
