ހެލްތް މިނިސްޓަރ ނަސީމް ތަފާތު ދައްކަވާނެ: ރައީސް ނަޝީދު

ހެލްތް މިނިސްޓަރުގެ މަގާމަށް އައްޔަން ކުރެއްވި އަހުމަދު ނަސީމް (ކެރަފާ ނަސީމް) އަކީ ހިންގުންތެރި ބޭފުޅެއް ކަމަށާއި ތަފާތު ދައްކަވާނެ ކަމަށް ވިދާޅުވެ، މިނިސްޓަރަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވަރަށް ބޮޑަށް ތައުރީފް ކުރައްވައިފިއެވެ.

ރައީސް ނަޝީދު ކުރެއްވި ޓްވީޓެއްގައި ވިދާޅުވީ، މިނިސްޓަރ ނަސީމްއަކީ، ރާއްޖޭގެ ސިއްހީ ދާއިރާއަށް ނުހަނު ބޮޑަށް ހިންގުންތެރި، ތަޖުރިބާ ހުރި ބޭފުޅަކު ބޭނުންވެފައިވާ މި ދަނޑިވަޅުގައި ހެލްތް މިނިސްޓަރުގެ މަގާމަށް އެންމެ އެކަށީގެންވާ ބޭފުޅާ ކަމަށެވެ. އަދި ހެލްތް މިނިސްޓަރުގެ މަގާމަށް ނަސީމު އައްޔަން ކުރެއްވުމަކީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ނިންމެވި ވަރަށް ވެސް ފުރިހަމަ ނިންމެވުމެއް ކަމަށެވެ.

ނަސީމްއަކީ ރާއްޖޭގެ ސިއްހީ ދާއިރާއިން ތަފާތު ދައްކަވާނެ ބޭފުޅެއް ކަމަށާއި އެކަމުގެ ޔަގީންކަން އެބަ އޮތް ކަމަށް ވެސް ރައީސް ނަޝީދު ވިދާޅުވިއެވެ.

ހެލްތް މިނިސްޓަރުގެ މަގާމަށް ނަސީމް އައްޔަން ކުރެއްވުމުގެ ކުރިން ހުންނެވީ ރައީސް އޮފީހުގެ މިނިސްޓަރު ކަމުގެ މަގާމުގައެވެ.

ރައީސް ނަޝީދުގެ ވެރިކަމުގައި ފޮރިން މިނިސްޓަރުކަން ވެސް ކުރެއްވި ނަސީމްއަކީ ހާރިޖީ ދާއިރާއަށް ފަރިތަ، އަދި ތަޖުރިބާކާރު ބޭފުޅެކެވެ. އެމްޑީޕީގެ ހާރިޖީ ކަންކަމުގައި ވެސް ނަސީމްއަކީ އިސް ސަފުގައި މަސައްކަތް ކުރެއްވި ތަޖުރިބާކާރު ބޭފުޅެކެވެ.

މީގެ އިތުރުން ނަސީމްއަކީ ރާއްޖެއަށް ފަތުރުވެރިކަން ތައާރަފް ކުރުމުގައި ވެސް އެންމެ އިސްކޮށް އުޅުއްވި އެއް ފަރާތެވެ. ނަސީމްއަކީ ދައުލަތުގެ އެކި ދާއިރާތަކުން މަތީ ފަންތީގެ މަގާމުތައް ފުރުއްވާ ޚިދުމަތް ކޮށްދެއްވާފައިވާ ބޭފުޅެކެވެ.

ހެލްތް މިނިސްޓަރު އަބްދުﷲ އަމީން މަގާމުން އިސްތިއުފާ ދެއްވީ، ކޮވިޑުގެ ހާލަތާއި ގުޅިގެން ރާއްޖެއަށް ބޭނުންވާ ވެންޓިލޭޓަރު ގެނައުމަށް ދުބާއީގެ އެކްޒިކިއުޓަރސް ކުންފުންޏާ ހަވާލު ކުރުމުގައި ކޮރަޕްޝަން ހިމެނޭ ކަމަށް އޭސީސީގެ ތަހުގީގުން ހާމަވެފައި ވަނިކޮށެވެ. އަދި، މި މައްސަލައިގައި ދައުވާ ކުރަން ފޮނުވި 11 މީހުންގެ ތެރެއިން އެންމެ އިސްކޮށް އުޅުއްވީ އަމީން ކަމަށް ވެސް އޭސީސީގެ ތަހުގީގަށް ވަނީ އެނގިފައެވެ.