އަލަށް ފުލުހުންގެ ހިދުމަތް ގާއިމް ކުރެވޭނެ ރަށްތައް ކަނޑައެޅުމުގެ މަސައްކަތް ފަށައިފި
21 އޮކްޓޯބަރު 2020 | ބުދަ 19:32މި އަހަރު ތެރޭގައި ޕޮޮލިސް ސްޓޭޝަންތައް އެޅުމަށް ބިން ހަމަޖެހިފައިވާ ފަންސާހަކަށް ރަށުގައި އެ މަސައްކަތް ފެށޭނެ ކަމަށް އުންމީދު ކުރެއްވި ކަމަށް ވިދާޅުވި
ފުލުހުންގެ ރަސްމިއްޔާތެއްގައި އެސްއޯ ފުލުހުންތަކެއް ބައިވެރި ވަނީ
އަންނަ އަހަރު އަލަށް ފުލުހުން ގާއިމު ކުރެވިގެން ދާނެ ކަމަށް ބެލެވޭ އަދަދަކާއި މެދުގައި ބަޖެޓްގެ ތެރެއިން ފުރުސަތު ލިބޭ އަދަދަކާއި މެދުގައި މަޝްވަރާ ކުރެެވި ރަށްރަށް ކަނޑައެޅުމުގެ މަސައްކަތްތައް ފަށާފައިވާ ކަމަށް ހޯމް މިނިސްޓަރ އައްޝެއިޚް އިމްރާން އަބްދުﷲ ވިދާޅުވެއްޖެއެވެ.
ބުދަ ދުވަހުގެ ޖަލްސާގައި ހޯމް މިނިސްޓަރަށް ސުވާލު ކުރުމަށް ހުޅުވާލި ފުރުސަތުގައި ގިނަ މެމްބަރުންގެ ސުވާލުތައް މިނިސްޓަރަށް އަމާޒު ކުރެއްވީ އެ މެމްބަރެއް ނިސްބަތްވެ ވަޑައިގަންނަވާ ދާއިރާއެއްގެ ރަށެއްގައި ފުލުހުންގެ ޚިދުމަތް ފެށޭނެ ތާރީޚަކާއި ގުޅޭ ގޮތުންނެވެ. ފުލުހުންގެ ޚިދުމަތް ފެށުމަށް މި އަހަރުގެ ބަޖެޓްގައި ޖެހި އެ މަސައްކަތް ނުފެށި ދާތީ އެކަމާއި ގުޅޭ ގޮތުން މައުލޫމާތު ސާފު ކުރެއްވުމަށް މެމްބަރުން ވަނީ މިނިސްޓަރާ ސުވާލު ކުރައްވާފައެވެ.
އެ ސުވާލުތަކަށް ޖަވާބު ދެއްވަމުން މިނިސްޓަރ ވިދާޅުވީ މި އަހަރު ތެރޭގައި ޕޮޮލިސް ސްޓޭޝަންތައް އެޅުމަށް ބިން ހަމަޖެހި އެކަމަށް އިންތިޒާރު ކުރަމުން އަންނަ ގާތްގަޑަކަށް ފަންސާހަކަށް ރަށުގައި މި އަހަރު އެ މަސައްކަތް ކުރެވޭނެ ކަމަށް ވަރަށް ބޮޑަށް އުންމީދު ކުރެއްވި ކަމަށެވެ.
މިނިސްޓަރ ވިދާޅުވީ ކޮވިޑްގެ ހާލަތާާއި ގުޅިގެން ރާއްޖޭގެ އިގްތިޞާދަށް ވެސް އެކަމުގެ ނޭދެވޭ އަސަރުތައް ކުރުމުގެ ސަބަބުން ރަށްރަށުގައި ޕޮލިސް ސްޓޭޝަން އެޅުމުގެ މަސައްކަތް ކުރިޔަށް ނުގޮސް އެބަހުރި ކަމަށެވެ. އެހެން ނަމަވެސް އަންނަ އަހަރުގެ ކުރީކޮޅު މި ޕްރޮޖެކްޓައިގެން ކުރިޔަށް ދެވޭނެ ކަމަށް އުއްމީދު ކުރައްވާ ކަމަށް މިނިސްޓަރ ވިދާޅުވިއެވެ. އަދި ކުރިޔަށް އޮތް ތަނުގައި ވެސް މެމްބަރުންގެ ފަރާތުން މި ސުވާލުތައް އަމާޒު ވާނެ ކަން އެނގިވަޑައިގަންނަވާ ކަމަށް ވިދާޅުވެ މިނިސްޓަރ ވަނީ މި ކަމަށް ޚަރަދު ވާނެ ބަޖެޓާއި ގުޅޭ ގޮތުން ވެސް ވާހަކަ ދައްކަވާފައެވެ.
މިނިސްޓަރ ވިދާޅުވީ ރަށުގެ އާބާދީ އާއި ކުށުގެ ވެއްޓާއި އަދި އެ ރަށަށް މައްސަލަތައް އަންނަ މިންވަރާއި އެ ރަށާ އެންމެ ކައިރީގައި ޕޮލިސް ސްޓޭޝަނެއް އޮންނަ އެންމެ ކައިރި މިނަކީ ރަށްރަށުގައި އަލަށް ޕޮލިސް ސްޓޭޝަންތައް ގާއިމު ކުރެވޭ އިރު ބަލާނެ ކަންތައްތައް ކަމަަށެވެ.
މިނިސްޓަރ ވިދާޅުވީ މީހުން ދިރިއުޅޭ ހުރިހާ ރަށެއްގައި ވެސް ފުލުހުންގެ ޚިދުމަތް ދޭން ޖެހޭ ކަމަށް ގަބޫލު ކުރައްވާ ކަމަށެވެ. އެހެން ނަމަވެސް ފުލުހުން ގާއިމުކުރުމުގައި ހިނގާ ޚަރަދުތަކާއި، ފުލުހުން ގާއިމު ކުރެވުމުން ކުރަން ޖެހޭ ޚަަރަދުތަކާއި އެ ހުރިހާ ކަމަކަށް ވެސް ބަލަން ޖެހޭ ކަަމަށް މިނިސްޓަރ ވިދާޅުވިއެވެ.
