ސެންޓްރަލް އޭޝިއާ ޒޯނަލް ވޮލީބޯލް އެސޯސިއޭޝަނުގެ ރައީސްގެ މަގާމަށް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސް މުޙައްމަދު ލަތީފް އިންތިޚާބުކޮށްފިއެވެ.

ސެންޓްރަލް އޭޝިއާ ޒޯނަލް ވޮލީބޯލް އެސޯސިއޭޝަން ތަމްސީލުކުރަނީ ދެކުނު އޭޝިއާގެ އަށް ގައުމު ކަމަށްވާ ރާއްޖެ، ބަންގްލަދޭޝް، އިންޑިއާ، ސްރީ ލަންކާ، ޕާކިސްތާން، ނޭޕާލް، ބޫޓާން އަދި އަފްޣާނިސްތާންގެ އިތުރުން ސެންޓަރަލް އޭޝިއާގެ ފަސް ގައުމު ކަމަށްވާ ކަޒަކިސްތާން، ކިރްގިސްތާން، ތަޖަކިސްތާން، ތުރުކުމެނިސްތާން އަދި އުޒްބެކިސްތާނެވެ. މީގެ އިތުރުން ދެން ހިމެނެނީ އީރާނެވެ.

1993 ވަނަ އަހަރު އުފެދުނު ސެންޓްރަލް އޭޝިއާ ޒޯނަލް ވޮލީބޯލް އެސޯސިއޭޝަނުގައި ޖުމްލަ 14 ގައުމު ހިމެނޭއިރު، ކުރިއަށް އޮތް ދައުރަށް އެ އެސޯސިއޭޝަނުގެ ރައީސްގެ މަގާމަށް ލަތީފް އިންތިޚާބުކުރީ ވޯޓުގައި ބައިވެރިވި 13 ގައުމުގެ ތެރެއިން 12 ގައުމުގެ ވޯޓާއެކުއެވެ. ރައީސްގެ މަގާމަށް ލަތީފާ ވާދަކުރި ބަންގްލަދޭޝްގެ ކެންޑިޑޭޓް ވަނީ ވޯޓުގެ ކުރިން ނަން އަނބުރާ ނަގާފައެވެ.

މި އިންތިޚާބުގައި ނައިބު ރައީސްގެ މަގާމަށް އިންތިޚާބުކޮށްފައިވަނީ އިންޑިއާގެ ބޭފުޅެކެވެ. ހިންގާ ކޮމިޓީގެ ގޮނޑި ކާމިޔާބުކުރެއްވީ އީރާނާއި، ބަންގްލަދޭޝް އާއި، ކަޒަކިސްތާން އަދި ކިރްގިސްތާނުން ވާދަކުރި ކެންޑިޑޭޓުންނެވެ. ޖެނަރަލް ސެކްރެޓަރީ އަކީ ކިރްގިސްތާނުން ވާދަކުރި ކެންޑިޑޭޓެވެ.

ވޮލީބޯޅައިގެ އެންމެ އިސް ޖަމިއްޔާ އަކީ އެފްއައިވީބީ ކަމަށްވާއިރު، އޭޝިއާގެ ވޮލީބޯޅައިގެ އެއްމެ އިސް ޖަމިއްޔާ އަކީ އޭވީސީއެވެ. އޭވީސީން ވަނީ އޭޝިއާގެ ކަންކަން ކުރުމަށް ފަސް އެސޯސިއޭޝަނެއްގެ މައްޗަށް ބަހާލާފައެވެ. އެގޮތުން ސެންޓްރަލް އޭޝިއާ ޒޯނަލް ވޮލީބޯލް އެސޯސިއޭޝަނަކީ ދެކުނު އޭޝިއާގެ ވޮލީބޯޅައިގެ ހަރަކާތްތައް ކުރިއަށްގެންދާ އެއްމެ އިސް އެސޯސިއޭޝަނެވެ.

އޭވީސީ ބޯޑުގައިވެސް ހިމެނިވަޑައިގަންނަވާ ލަތީފް އެ މަގާމަށް އިންތިޚާބުވެފައި ވަނީ 2017 ވަނަ އަހަރުއެވެ. ސެންޓްރަލް އޭޝިއާ ޒޯނަލް ވޮލީބޯލް އެސޯސިއޭޝަނުގެ ރައީސްގެ މަގާމު ކާމިޔާބު ކުރެއްވުމަށްފަހު ލަތީފް ވިދާޅުވީ މިއީ މުޅިރާއްޖެއަށް އަދި ވޮލީބޯޅަ އާއިލާއަށް ލިބިގެންދިޔަ ވަރަށް ބޮޑު ކާމިޔާބެއް ކަމަށާއި، މި މަގާމާއެކު ބައިނަލްއަގުވާމީ މައިދާނުގައި ވޮލީބޯޅައިން ރާއްޖޭގެ އަޑު އިތުރަށް ގަދަވެގެންދާނެ ކަމަށެވެ.

އައު މަގާމާއެކު ލަތީފް ވަނީ ކުޅިވަރު ސިޔާސީ ނުކޮށް އެއްމެން ގުޅިގެން މަސައްކަތް ކުރުމަށް ހުރިހާ ފަރާތްތަކަށް ގޮވާލާފައެވެ. ސެންޓްރަލް އޭޝިއާ ޒޯނަލް ވޮލީބޯލް އެސޯސިއޭޝަނުގެ ރައީސްގެ އިތުރުން އެންމެން ގުޅިގެން މަސައްކަތްކޮށްފިނަމަ އޭޝިއާގެ ރައީސްކަންވެސް ރާއްޖެއަށް ހޯދޭނެ ކަމަށާއި، ވޮލީބޯޅައަށްޓަކައި އެންމެން ގުޅުމަށް ލަތީފް ވަނީ ގޮވާލާފައެވެ.

އޭވީސީގެ ބޯޑު މެންބަރުގެ އިތުރުން ސެންޓްރަލް އޭޝިއާ ޒޯނަލް ވޮލީބޯލް އެސޯސިއޭޝަނުގެ ރައީސްކަން ކާމިޔާބުކުރެއްވި ލަތީފުގެ ހިންގާ ކޮމިޓީ ވީއޭއެމްގެ މަސައްކަތުން ދުރުކޮށްފައިވާތާ އަހަރެއް ވުމާ ގާތަށް ގޮސްފައިވާއިރު، އެސޯސިއޭޝަނުގެ ކަންކަން މިހާރު ހިންގަމުން ގެންދަނީ އިންޓަރިމް ކޮމިޓީއަކުންނެވެ.