2199 ފަރާތަކަށް ރިކަވަރީ ލޯނު ދީފި
21 އޮކްޓޯބަރު 2020 | ބުދަ 03:45ރިކަވަރީ ލޯން ސްކީމަށް 1 ބިލިން ރުފިޔާ ވަނީ ދޫކޮށްފައި
ފިނޭންސް މިނިސްޓްރީ؛ މިހާތަނަށް 2199 ފަރާތަކަށް ސަރުކާރުން ވަނީ އެހީތެރިވެފައި
ކޮވިޑް-19އާއި ގުޅިގެން އެކުލަވާލާފައިވާ އިގުތިސާދީ ރިލީފް ޕެކޭޖްގެ ދަށުން ކުދި އަދި މެދު ފަންތީގެ ވިޔަފާރިތަކަށާއި އަމިއްލަ މަސައްކަތްކުރާ ފަރާތްތަކަށް ހާއްސަކުރެވިގެން އެކުލަވައިލާފައިވާ ކޮވިޑް-19 ރިކަވަރީ ލޯނު ސްކީމް 2199 ފަރާތަކަށް ދީފިއެވެ.
ފިނޭންސް މިނިސްޓްރީގެ ތާފާސް ހިސާބުތައް ދައްކާގޮތުން ބީއެމްއެލް މެދުވެރިކޮށް 384 ފަރާތަކަށް 544.8 މިލިއަން ރުފިޔާ އަދި 8 މިލިއަން ޑޮލަރު ވަނީ ދޫކޮށްފައެވެ. އެސްޑީއެފްސީ މެދުވެރިކޮށް 1815 ފަރާތަކަށް 300 މިލިއަން ރުފިޔާ ވަނީ ދޫކޮށްފައެވެ.
މި ސްކީމް ތަންފީޒުކުރުމަށް ހަމަޖެހިފައިވަނީ "ކޮވިޑް-19 ވިޔަފާރި އެހީ" ގެ ނަމުގައި އެސްޑީއެފްސީ އަދި ބީއެމްއެލް މެދުވެރިކޮށެވެ. މި ލޯނު ހާއްސަކޮށްފައިވަނީ 2019 ވަނަ އަހަރު 10 މިލިއަން ރުފިޔާއަށްވުރެ މަދުން އާމްދަނީ ލިބިފައިވާ ކުދި އަދި މެދު ފަންތީގެ ވިޔަފާރިތަކުންނާއި 10 މިލިއަން ރުފިޔާއަށްވުރެ އިތުރަށް އާމްދަނީ ލިބިފައިވާ ބޮޑެތި ވިޔަފާރިތަކުން ވިޔަފާރިތަކުގެ ތެރެއިން ވިޔަފާރި ހިންގުމަށް ދުވަހުން ދުވަހަށް ކުރަންޖެހޭ ޚަރަދުތައް ހަމަޖެއްސުމުގައި ދަތިތަކާ ކުރިމަތިވެފައިވާ ވިޔަފާރިތަކަށެވެ.
ޝަރުތު ހަމަވާ ކުދި އަދި މެދު ފަންތީގެ ވިޔަފާރިތަކުން، އެ ވިޔަފާރިއަކަށް ފާއިތުވި އަހަރު ލިބިފައިވާ އާމްދަނީގެ %10 އާ ހަމައަށް (ޖުމުލަ ލޯނުގެ އަދަދު 500,000 ރުފިޔާއާ ހަމައަށް ކެޕްކުރެވިފައި) ލޯނަށް އެދި ހުށަހެޅިދާނެއެވެ. އަދި މި ސްކީމްގެ ދަށުން ލޯނު ދޫކުރުމަށް ހަމަޖެހިފައިވަނީ %6 އިންޓަރެސްޓްގައި، 6 މަސް ދުވަހުގެ ގްރޭސް ޕީރިއަޑްއަކާ އެކުއެވެ. ގްރޭސް ޕީރިއަޑް މުއްދަތުގެ ތެރޭގައި އިންޓަރެސްޓް އަދި ޕްރިންސިޕަލްވެސް އަނބުރާ ދައްކާކަށް ނުޖެހޭނެއެވެ.
އަދި ލޯނު އަނބުރާ ދައްކަންޖެހޭނީ 3 އަހަރުގެ މުއްދަތުގެ ތެރޭގައެވެ. ކޮވިޑް-19 އާއި ގުޅިގެންނާއި ލޯނު ނިސްބަތްވާ މުއްދަތުގައި ދިވެހި މުވައްޒަފުން ވަޒީފާއިން ވަކިކުރާނަމަ، މި ލޯނު ލިބުމަށް ޝަރުތުފުރިހަމައެއް ނުވާނެއެވެ.
ބޮޑެތި ވިޔަފާރިތަކަށް ލޯނު ދޫކުރުމަށް ހަމަޖެހިފައިވަނީ ރަހުނަކާ ނުލައި %6 އިންޓަރެސްޓްގައި، ގިނަވެގެން 6 މަސް ދުވަހުގެ ގްރޭސް ޕީރިއަޑްއަކާ އެކުއެވެ. ގްރޭސް ޕީރިއަޑް މުއްދަތުގެ ތެރޭގައި އިންޓަރެސްޓް އަދި ޕްރިންސިޕަލްވެސް އަނބުރާ ދައްކާކަށް ނުޖެހޭނެއެވެ. އަދި ލޯނު އަނބުރާ ދައްކަންޖެހޭނީ 3 އަހަރުގެ ތެރޭގައެވެ. ލޯނަށް އެދި ހުށަހަޅާއިރު، ކޮވިޑް-19 އާއި ގުޅިގެން ދިވެހި މުވައްޒަފުން ވަޒީފާއިން ވަކިކޮށްފައިވާނަމަ، މި ލޯނު ލިބުމަށް ޝަރުތުފުރިހަމައެއް ނުވާނެއެވެ.
އިކޮނަމިކް ރެސްޕޯންސްގެ ގޮތުގައި މިހާތަނަށް ސަރުކާރުން ވަނީ 1.1 ބިލިއަން ރުފިޔާ ހަރަދުކޮށްފައެވެ. އެގޮތުން ރިކަވަރީ ލޯން ސްކީމްގެ ދަށުން 1 ބިލިއަން ރުފިޔާ އަދި އިންކަމް ސަޕޯޓް އެލަވަންގެ ގޮތުގައި 110.5 މިލިއަން ރުފިޔާ އަދި ކަރަންޓް ޑިސްކައުންޓު ގޮތުގައި މިހާތަނަށް 36.5 މިލިއަން ރުފިޔާ ވަނީ ދީފައެވެ.
