ޕޭޕަލްގެ ޚިދުމަތް ރާއްޖެ ގެނައުމުގައި މިހާރު ބޮޑަށް އޮތީ އެކުންފުނީގެ ޕްލޭންގައި ރާއްޖެ ހިމެނުން: ގަވަރުނަރު

ރާއްޖޭގެ ޕޭޕަލް އެކައުންޓްތަކަށް ފައިސާ ފޮނުވޭނޭ އިންތިޒާމް ހަމަޖައްސައި އެޚިދުމަތް ރާއްޖެ ގެނައުމުގައި މިހާރު ބޮޑަށް އޮތީ އެކުންފުނީގެ ސްޓްރެޓެޖިކް ޕްލޭންގައި ރާއްޖެ ހިމެނުން ކަމަށް އެމްއެމްއޭގެ ގަވަރުނަރު އަލީ ހާޝިމް ވިދާޅުވެއްޖެ އެވެ.

ޕޭމަންޓް ސިސްޓަމާއި ޕޭމަންޓް ހިދުމަތުގެ ބިލާ ގުޅޭ މައުލޫމާތު ރައްޔިތުންގެ މަޖިލީހާ ހިއްސާކުރެއްވުމަށް ބޭއްވި ޖަލްސާގައި ބައިވެރިވެ ވަޑައިގެން މައުލޫމާތު ދެއްވަމުން ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީގު ކުރެއްވި ސުވާލަކާ ގުޅިގެން ގަވަރުނަރު ވިދާޅުވީ ޕޭމަންޓް ސިސްޓަމް ގާއިމް ކުރަނީ އައިއެސްއޯ 222 ސްޓޭންޑަޑަށް ކަމަށެވެ. އަދި އިންތިޒާމް ހަމަޖައްސައި ދިނުމަށް އެދި އެމްއެމްއޭގެ ފަރާތުންނާއި ގައުމީ ބޭންކުގެ ފަރާތުން އެ ކުންފުނީގައި ރަސްމީކޮށް މިހާރު އެދިފައިވާ ކަމަށް ގަވަރުނަރު ވިދާޅުވިއެވެ.

ގަވަރުނަރު ވިދާޅުވީ މި ބިލު ގާނޫނަކަށްވުމުން ޕޭޕަލް ފަދަ ކުންފުނިތަކުން ބަލާނީ ރާއްޖޭގެ ގާނޫނުތަކާއި ގަވައިދުތަކަކީ އެ ފަރާތްތަކަށް ފަހި ގާނޫނާއި ގަވައިދުތައްތޯ ކަމަށެވެ. އެ ހިސާބުން ޕޭޕަލްއަށް ރާއްޖޭގައި ހިދުމަތް ދިނުމަށް އެއްވެސް ހުރަހެއް ނޯންނާނެ ކަމަށް ގަވަރުނަރު ވިދާޅުވި އެވެ.

ގަވަރުނަރު ވިދާޅުވީ މިކަމުގައި އެމްއެމްއޭގެ ޒިންމާއަކީ ސިސްޓަމާއި ހުރިހާ އެއްޗެއް އެކަމަށް ތައްޔާރުކުރުން ކަމަށެވެ.

ޕޭޕަލްގެ ޚިދުމަތް ރާއްޖެއަށް ނުލިބޭތީ އެކަމުގެ ޝަކުވާތައް ޒުވާނުން އަންނަނީ ކުރަމުންނެވެ. ގަވަރުނަރު ވަނީ މަޖިލީހުގައިވެސް އެޝަކުވާތައް އަންނަކަން ފާހަގަކުރައްވާފައެވެ.