ކަސްޓަމްސްގެ ހިދުމަތްތަކާ ގުޅޭ މުއާހަދާ، އާރުކޭސީގައި ދިވެހިރާއްޖެއިން ބައިވެރިވެއްޖެ
ދިވެހިރާއްޖެއަކީ މި ކޮންވެންޝަންގެ 124 ވަނަ ކޮންޓްރެކްޓިންގ ޕާޓީ
މޯލްޑިވްސް ކަސްޓަމްސް ސަރވިސް
ދުނިޔޭގެ އެކި ގައުމުތަކުގެ ކަސްޓަމްސްގެ އިޖުރާއާތުތައް ފަސޭހަކޮށް އެއްގޮތްކުރުމާއިގުޅޭ މުއާހަދާ، އިންޓަރނޭޝަނަލް ކޮންވެންޝަން އޮން ދަ ސިމްޕްލިފިކޭޝަން އެންޑް ހާމަނައިޒޭޝަން އޮފް ކަސްޓަމްސް ޕްރޮސީޖަރސް ނުވަތަ ރިވައިޒްޑް ކިޔޯޓޯ ކޮންވެންޝަން (އާރުކޭސީ) ގައި ދިވެހިރާއްޖެއިން ބައިވެރިވެއްޖެއެވެ.
ބެލްޖިއަމްގެ ބްރެސަލްސްގައި ހުންނަ ދުނިޔޭގެ ކަސްޓަމްސް ޖަމުޢިއްޔާ (ޑަބްލިއުސީއޯ) ގެ މައި އިދާރާގައި ހޯމަ ދުވަހު އޮތް ބައްދަލުވުމެއްގައި ދިވެހިރާއްޖޭގެ ފަރާތުން ކޮންވެންޝަންގައި ބައިވެރިވުމުގެ ލިޔުން ޑަބްލިއުސީއޯގެ ސެކްރެޓްރީ ޖެނެރަލް މރ. ކުނިއޯ މިކްރިއާގެ އަތްޕުޅަށް އެރުވީ ދިވެހިރާއްޖެއިން ބެލްޖިއަމަށް ކަނޑައަޅުއްވާފައި ހުންނަވާ ސަފީރު، ޙަސަން ޞާބިރެވެ.
އާރުކޭސީއަކީ ކަސްޓަމުން ފޯރުކޮށްދޭ ޚިދުމަތްތަކުގެ މައިގަނޑު އަސާސްތަކާއި ސްޓޭންޑަރޑްތައް ބަޔާންކުރާ ދުނިޔޭގެ ކަސްޓަމްސް ޖަމުޢިއްޔާ (ޑަބްލިއުސީއޯ) ގެ މުޢާހަދާއެވެ. އާރުކޭސީގެ މަޤްޞަދަކީ، ދޭދޭ ޤައުމުތަކުގެ ކަސްޓަމްސްތަކުގެ އުސޫލުތަކާއި މިންގަނޑުތައް ވީހާވެސް އެއްގޮތްކޮށް، ލުއިފަސޭހަކޮށް، ކަސްޓަމްސްގެ ކޮންޓްރޯލް ހަރުދަނާކުރެވޭނެ ގޮތުގެމަތިން ވިޔަފާރިއަށް ވީހާވެސް ބޮޑަށް ލުއިފަސޭހަ ކޮށްދިނުމެވެ.
ޑަބްލިއުސީއޯއިން އަންދާޒާކުރާ ގޮތުގައި، ދުނިޔޭގެ ވިޔަފާރީގެ %70 ހިނގަނީ އާރުކޭސީ ކޮންޓްރެކްޓިންގ ޤައުމުތަކުގެ މެދުގައެވެ. ދިވެހިރާއްޖެއަކީ މި ކޮންވެންޝަންގެ 124 ވަނަ ކޮންޓްރެކްޓިންގ ޕާޓީއެވެ. އާރުކޭސީގައި ބައިވެރިވުމުން އެ ޤައުމަކީ ބައިނަލްއަޤްވާމީ ކަސްޓަމްސް ސްޓޭންޑަރޑްތައް ބޭނުންކުރާ ޤައުމެއްގެ ގޮތުގައި ބަލައިގަނެއެވެ.
މި މުއާހަދާއަކީ ބައިނަލްއަޤްވާމީ ބެސްޓް ޕްރެކްޓިސްގެ ގޮތުގައި ނަގާކިޔޭ މިންގަނޑެއް ކަމުގައިވާއިރު، މި މުޢާހަދާގައި ސޮއިކުރުމުގެ ސަބަބުން، ރާއްޖޭގެ ކަސްޓަމްސްގެ އުޞޫލުތައްވެސް ބިނާވެފައިވާނީ، އެހެން ޤައުމުތަކުގައިވެސް ބޭނުންކުރާ މިންގަނޑުތަކާ އެއްގޮތަށްކަމަށް ވެގެންދާނެއެވެ.
އާރުކޭސީގެ މިންގަނޑުތަކުގެ ތެރޭގައި، އައި.ޓީ ނިޒާމްތައް ފުޅާ ދާއިރާއެއްގައި ބޭނުންކުރުމާއި، ރިސްކް މެނޭޖްމެންޓް ޤާއިމްކުރުމާއި، ޕްރީ-އެރައިވަލް އިންފޮމޭޝަން ފަދަ ނިޒާމްތަކުން ކަސްޓަމުން މުދާ ކްލިއަރ ކުރުމުގެ ވަގުތު ކުޑަވެގެން ދާނެއެވެ. އަވަހަށް މުދާ ކްލިއަރ ކުރެވުމަކީ ކަސްޓަމްސްއަށާއި ވިޔަފާރިވެރިންނަށް އިންތިހާއަށް ފައިދާވާނެ ކަމެކެވެ.
އާރުކޭސީގައި ބައިވެރިވުމަށް ނިންމާފައިވާ ޑަބްލިއުސީއޯގެ މެމްބަރުންނަށް، އެ ޤައުމެއްގެ ޤާބިލްކަން އިތުރުކުރުމަށް ޑަބްލިއުސީއޯއާއި، ބައިނަލްއަޤްވާމީ ޖަމާއަތްތަކުންނާއި އެހީތެރިވެދޭ އެހެން ޤައުމުތަކުން އެހީތެރިކަން ފޯރުކޮށްދިނުމުގެ ފުރުސަތު ބޮޑުވެގެންދެއެވެ. މިގޮތުން ވަޞީލަތްތައް ޤާއިމުކުރުމާއި، މުވައްޒަފުން ތަމްރީނުކުރުމާއި އަދި ފަންނީ ގޮތުން ލިބޭ އެހީތެރިކަން އިތުރުވެގެންދާނެއެވެ.
އާރުކޭސީގެ ސްޓޭންޑަރޑެއް ކަމަށްވާ ކަސްޓަމްސް-ބިޒްނަސް ޕާޓްނަރޝިޕް، ޓްރާންސްޕެރަންސީ، އެޕީލް ޕްރޮސީޖަރގެ ސަބަބުން، ދިވެހިރާއްޖެއަށް އަންނަ ފޮރިން އިންވެސްޓްމަންޓް އިތުރުކުރެވި، ވާދަވެރި އިޤްތިސާދަކަށް ވެގެންދާނެއެވެ.
ވާލްޑް ބޭންކްއިން ހަދާފައިވާ ސަރވޭތަކުން ދައްކާގޮތުގައި، ޤައުމެއްގައި އިންވެސްޓް ކުރުމުގެ ކުރިން އިންވެސްޓަރުން ރިއާޔަތްކުރާ މުހިންމު ކަންތައްތަކުގެ ތެރެއިން އެއްކަމަކީ، އެ ޤައުމެއްގައި ހަރުދަނާ އަދި ފަސޭހަ ބޯޑަރުގެ އުސޫލުތަކެއް ވޭތޯ ކަމަށް ކަސްޓަމްސްއިން ބުންޏެވެ.
ކަސްޓަމްސްގެ އުޞޫލުތަކާއި މިންގަނޑުތަކަކީ ދުނިޔޭގެ އެހެން ޤައުމުތަކާ އެއްގޮތަށް އެކަށައެޅިފައިވާ އުޞޫލްތަކަށްވާނަމަ އިންވެސްޓަރުންގެ އިތުބާރު އިތުރުވެ، އިތުރު އިންވެސްޓްމެންޓްތައް އައުމަށް މަގުފަހިވެގެންދާނެއެވެ.
މީގެ އިތުރުން، ދެފުއް ފެންނަ، ފަސޭހައިން ދޭހަވާ ކަސްޓަމްސް އުސޫލުތަކުގެ ސަބަބުން، މުވައްޒަފުންގެ ނަޒާހަތްތެރިކަން ހިފެހެއްޓި، ޚިދުމަތުގެ ފެންވަރު ރަނގަޅު ކުރެވޭނެއެވެ. ހަމަ އެފަދައިން، ކަސްޓަމްސްގެ ތަންފީޒީ މަސައްކަތްތައް މިކަމުގެ ސަބަބުން ހަރުދަނާވެ، ދޮރޯށި ބެލެހެއްޓުމާއި ދައުލަތުގެ އާމްދަނީ ހިމާޔަތްކުރުމުގައި އިތުރު ކުރިއެރުން ލިބިގެންދާނެ ކަމަށްވެސް ކަސްޓަމްސްއިން ބުންޏެވެ.
