ކޮވިޑަށް ޕޮޒިޓިވްވި ހުރިހާ ކުޑަކުދިންގެ ހާލުވެސް ރަނގަޅު ކަމަށް ޖެންޑާގެ އޮފިޝަލަކު ވިދާޅުވެއްޖެއެވެ.
ހުޅުމާލޭގައި ހުންނަ ކުޑަކުދިން ބަލަހައްޓާ މަރުކަޒުން ޖުމްލަ 17 ކުދިން ޕޮޒިޓިވް ވެފައިވާ އިރު ކުޑަކުދިންގެ ހިޔާއިން ދެ ކުއްޖަކު ވަނީ ޕޮޒިޓިވްވެފައެވެ. އަދި ހުރިހާ ކުދިންގެ ހާލު ވެސް ރަނގަޅު ކަމަށް ޖެންޑާއިން ބުނެފައި ވެއެވެ.
ޖެންޑާއިން އިތުރަށް ބުނެފައިވަނީ، ޕޮޒިޓިވްވި 19 ކުދިންގެ ހާލަތު ވަރަށް ގާތުން މޮނީޓަރ ކުރަމުން ގެންދާކަމަށެވެ. އަދި މި ވަގުތު ފިޔަވަތީގައި ކަރަންޓީނުވެ ތިބި 53 ކުދިންގެ ހާލަތާއި ކަންތައްތައް ވެސް ވަރަށް ގާތުން ބަލަމުން އަންނަ ކަމަށެވެ.
މީގެ އިތުރުން ހުކުރު ދުވަހު ހދ. ނޮޅިވަރަމްއިން ވެސް އެއް އަހަރުގެ ކުޑަ އަންހެން ކުއްޖަކު ޕޮޒިޓިވް ވެފައެވެ. މި ކުއްޖާގެ ހާލު ރަނގަޅު ކަމަށާއި އަދި ހުން ފަދަ ކޮވިޑްގެ އެއްވެސް އަލާމާތެއް އެ ކުއްޖާ ފަރާތުން ނުފެންނަ ކަމަށް އެ ރަށު ކައުންސިލްގެ ރައީސް އިބްރާހިމް ރަޝީދު ވިދާޅުވިއެވެ.
