އެމް ސެވަން އިން 2021 ވަނަ އަހަރުގެ ދިވެހިވަންތަ ކަލަންޑަރެއް ނެރެފި
އެމް7 ގެ ކަލަންޑަރުގެ އަގަކީ 28 ރުފިޔާ
އެމްސެވަން އިން ނެރެފައިވާ ކަލަންޑަރު
އެމް ސެވަން ޕްރިންޓުން 2021 ވަނަ އަހަރަށް ދިވެހިވަންތަ ކަލަންޑަރެއް ނެރެފިއެވެ.
ދިވެހި ތަރިކަ އާއި ފަންނުވެރިކަން ފުރިހަމައަށް ދައްކުވައިދީފައިވާ މި ކަލަންޑަރުގައި އަލަށް ތައާރަފު ކުރާ 12 ވައްތަރެއްގެ ދިވެހި ފޮންޓު ވެސް ހިމެނެ އެވެ.
އެމް ސެވަން ގްރޫޕްގެ މެނޭޖިންގ ޑިރެކްޓަރު މުހައްމަދު އަބްދުއްސައްތާރު ވިދާޅުވީ ކަލަންޑަރު ފަރުމާ ކޮށްފައިވަނީ ތަރިކައަށް ވެސް އަހައްމިއްޔަތުކަން ދިނުމުގެ ގޮތުން ކަމަށެވެ.
ފާރުގައި އަޅުވާ މި ކަލަންޑަރު ފަރުމާ ކޮށްފައިވަނީ ދިވެހި ބަހުން ލިޔެފައިވާ ޙިކުމަތުގެ ބަހާއި، ނަމާދު ވަގުތާއި މީލާދީ އަދި ޙިޖުރީ ތާރީޚާއި ނަކަތާއި ސަރުކާރު ބަންދު ދުވަސްތައް އަދި މުހިންމު ތާރީޚުތައް އެނގޭ ގޮތަށެވެ. މި ކަލަންޑަރު ޑިޒައިންކޮށްފައި ވަނީ ވިޝުވަލް އާޓްސްގެ ދާއިރާއިން، ލިޔުމާއި ކުރެހުމާއި ފަރުމާ ކުރުމުގެ ރޮނގުން ހިތްވަރު ދިނުމުގެ ޤައުމީ އިނާމު ލިބިވަޑައިގެންފައިވާ ފަރުހާދު އިބްރާހިމެވެ. ފަރުހާދު ބުނީ މި ކަލަންޑަރު ފަރުމާ ކުރުމަށް ގިނަ މަސައްކަތެއް ކޮށްފައިވާނެ ކަމަށެވެ.
ކަލަންޑަރު ޑިޒައިން ކުރިއިރު، ބަހާފައިވަނީ މައިގަނޑު ތިން ބަޔަކަށް ކަމަށް ފަރުހާދު ބުންޏެއެވެ. އެއީ އިސްލާމީ މަރުކަޒުގެ އާކް އާއި ދިވެހި ލިޔެލާޖެހުމުގެ ކުރެހުންތަކަށް އަދި ހިރިގަލުގެ ކުރެހުންތައް ރަމްޒުކޮށް ދިނުމަށެވެ.
އެމް7 ގެ ކަލަންޑަރުގެ އަގަކީ އެންމެ 28 ރުފިޔާއެވެ. މި ކަލަންޑަރު އެހެން ފަރާތަކަށް ހަދިޔާ ކުރެއްވުމަށް ބޭނުންފުޅުވާނަމަ، ލިޔެލާޖެހި ކުރެހުން ދައްކުވައިދޭ ގޮތަށް ފަރުމާކޮށްފައިވާ ފޮއްޓެއްގައި ބަންދު ކޮށްފައި ދޭނެ ކަމަށް އެމް7 އިން ބުނެއެވެ.
