ރާއްޖޭގައި ކޮވިޑް-19 ފެތުރިފައިވާ މިންވަރު ދެނެގަނެވޭނީ އެންޓިބޮޑީ ޓެސްޓް ހެދުމަށްފަހު

ރާއްޖޭގައި ބަލި ފެތުރިފައިވާ މިންވަރު އިނގޭނީ އެންޓިބޮޑީ ޓެސްޓް ހެދިގެން ކަމަށް ހެލްތް އެމަރޖެންސީ އޮޕަރޭސަން ސެންޓަރ (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.

ހޮނިހިރު ދުވަހު އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ނަޒްލާ ވިދާޅުވީ ރާއްޖޭގައި ކޮވިޑް-19 ޖެހުނު މީހުންގެ އެސްޓިމޭޓެއް އިނގޭނީ އެންޓިބޮޑީ ޓެސްޓް ހެދުމަށްފަހު ކަމަށެވެ. އަދި އެކަން ކުރަން ޓެސްޓް ހަދަން ފަށަން ތައްޔާރުވެފައިވާ ކަމަށާއި, ސާވޭ ހެދުމުން އެ އަދަދުތައް އެނގިގެންދާނެ ކަމަށެވެ. ޑރ. ނަޒްލާ ވިދާޅުވީ ސަރވޭއެއް ނަހަދާ ކޮވިޑް ޖެހުނު މީހުންގެ އެސްޓިމޭޓެއް ނުކުރެވޭނެ ކަމަށެވެ.

ޑރ. ނަޒްލާ ވިދާޅުވީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ހަދާފައިވާ ޕްރޮޓޮކޯލް އަށް ބެލުމަށްފަހު ސްޓަޑީއަށް ވަރަށް ބޮޑަށް ތައްޔާރުވެފައިވާ ކަމަށެވެ. އަދި އެކަމަށް ބޭނުންވާ ތަކެތި ހޯދައިގެން މަސައްކަތް ފެށުމަށް ތައްޔާރުވެފައިވާ ކަމަށެވެ.

ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) އާއި ގުޅިގެން އެޗްޕީއޭ އިން ކުރިޔަށް ގެންދާ އެންޓިބޮޑީ ޓެސްޓް ދިރާސާ ނުވަތަ ސިރޯ ޕްރިވިލެންސް ސާވޭގައި ސާމްޕަލް ނަގަނީ ގުރުއަތު ނަގައިގެން ހޮވޭ މީހުންގެ ކަމަށް އެކަމުގައި އިސްކޮށް އުޅުއްވާ އެމްއެންޔޫގެ ރިސަރޗް ފެކަލްޓީގެ ޑީން ޑރ. ރަހީމާ އަބްދުއްރަހީމް ހޮނިހިރު ދުވަހުގެ ނޫސްވެރިންގެ ބައްދަލުވުމުގައި ވަނީ ވިދާޅުވެފައެވެ.

މި ދިރާސާ ކުރަން ބޭނުން ކުރަނީ ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން އެކުލަވާލާފައިވާ މެތޮޑޮލަޖީ ކަމަށް ޑރ ރަހީމާ ވިދާޅުވިއެވެ. ސިރޯ ޕްރިވިލެންސް ސާވޭ ކުރިޔަށް ގެންދަނީ ހަތަރު އުމުރުފުރައަކަށް ބަހާލައިގެންނެވެ.

އެއީ 17 އަހަރުން ދަށުގެ ކުދިންނާއި 18 އަހަރާއި 34 އަހަރާ ދެމެދުގެ މީހުންނާއި 35 އަހަރާއި 59 އަހަރާ ދެމެދުގެ މީހުން އަދި އުމުރުން 60 އަހަރުން މަތީގެ އުމުރުފުރާތަކެވެ. މީގެ ތެރެއިން މިހާރު ކުރިޔަށްދަނީ އުމުރުން 17 އަހަރުން ދަށުގެ ކުދިންގެ ސާމްޕަލް ނެގުމުގެ ކަންކަން ކަމަށް ޑރ. ރަހީމާ ވިދާޅުވިއެވެ. މިއީ މިނިސްޓްރީ އޮފް އެޑިޔުކޭޝަންގެ އެހީތެރިކަމާ އެކު ސްކޫލްތަކާއި ގުޅިގެން ކުރިއަށް ގެންދާ މަސައްކަތެކެވެ.