އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ކުޅުނު މެޗުތަކުން މެންޗެސްޓާ ޔުނައިޓެޑާއި މެންޗެސްޓާ ސިޓީން މުހިންމު މޮޅެއް ހޯދައިފިއެވެ.

ލީގުގައި ހޮނިހިރު ދުވަހުގެރޭ ރަށުން ބޭރުގައި ޔުނައިޓެޑް ވަނީ ފަހު ވަގުތު ޖެހި ލަނޑުތަކާއެކު 4-1 ން ނިއުކާސަލް ޔުނައިޓެޑް ބަލިކޮށްފައެވެ.

ނިއުކާސަލުގެ ދަނޑުގައި ކުޅުނު މި މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ދެވަނަ މިނެޓުގައި ނިއުކާސަލުން ލީޑު ނެގީ ޔުނައިޓެޑުގެ ލޫކް ޝޯ އަތުން ބައިކޮޅަށް ވަން ލަނޑުންނެވެ.

މެޗުގެ 20 ވަނަ މިނެޓުގައި ބްރޫނޯ ފެނާންޑޭސް ޔުނައިޓެޑަށް އެއްވަރުކޮށްދިން ލަނޑު ޖެހި ނަމަވެސް، ހުއާން މަޓާ އޮފްސައިޑުގައި ހުރުމުން ވީޑިއޯ އެސިސްޓަންޓް ރެފުރީ (ވީއޭއާރް) އިން ވަނީ އެ ލަނޑު ބާތިލުކޮށްފައެވެ. އެކަމަކު އޭގެ ތިން މިނެޓު ފަހުން މަޓާ ނަގައިދިން ކޯނަރަކުން ކެޕްޓަން ހެރީ މެގުއާ ވަނީ ޔުނައިޓެޑަށް ނަތީޖާ އެއްވަރުކޮށްދީފައެވެ.

ދެވަނަ ހާފު ފަށައިގެން 13 ވަނަ މިނެޓުގައި ޔުނައިޓެޑަށް ޕެނަލްޓީ އަކުން ލީޑު ނަގައިދޭން ލިބުނު ފުރުސަތުގައި ފެނާންޑޭސް ޖެހި ބޯޅަ ނިއުކާސަލުގެ ގޯޅްކީޕަރު ކާލް ޑާލޯ ވަނީ މަތަކޮށްފައެވެ.

މި މެޗުން ޔުނައިޓެޑް މޮޅުވީ ފަހު ވަގުތު ޖެހި ލަނޑުތަކާއެކުއެވެ. އެގޮތުން މެޗުގެ 86 ވަނަ މިނެޓުގައި ޔުނައިޓެޑަށް ލީޑު ނަަގައިދިނީ ފެނާންޑޭސްއެވެ. އަދި އިތުރު ވަގުތުގެ ފުރަތަމަ މިނެޓުގައި އާރޮން ވަން ބިސާކާ ޔުނައިޓެޑަށް ލީޑު ފުޅާކޮށްދިންއިރު، ޔުނައިޓެޑްގެ ފަހު ލަނޑު ޖެހީ މާކަސް ރަޝްފޯޑެވެ.

މީގެ އިތުރުން ލީގުގައި ހޮނިހިރު ދުވަހުގެރޭ ސިޓީ ވަނީ އަމިއްލަ ދަނޑުގައި އާސެނަލް އަތުން 1-0 ން މޮޅުވެފައެވެ.

މި މެޗުގައި އަނިޔާގެ ސަބަބުން މިޑްފީލްޑަރު ކެވިން ޑި ބްރޭނާ ކުޅެފައި ނުވި ނަމަވެސް، ހަތަރު މަސް ދުވަހަށްފަހު ކުޅުމުގެ ތެރެއަށް އެނބުރި އައި ފޯވާޑް ސާޖިއޯ އަގުއޭރޯ ވަނީ މި މެޗުގައި ކުޅެފައެވެ.

މެޗުގައި ސިޓީން ޖެހި ހަަމައެކަނި ލަނޑު މެޗުގެ 23 ވަނަ މިނެޓުގައި އެ ޓީމަށް ކާމިޔާބުކޮށްދިނީ ކެޕްޓަން ބޭންޑް އަޅައިގެން ކުޅުނު ފޯވާޑް ރަހީމް ސްޓާލިންއެވެ.

މުޅި މެޗުގައިވެސް ދެ ޓީމުގެ ފަރާތުން އާދައިގެ ކުޅުމެއް ފެނިގެންދިޔަ ނަަމަވެސް، ލީޑު ފުޅާކުރަން ސިޓީގެ ރިޔާދު މާރޭޒާއި ފިލް ފޯޑެންއަށް ވަނީ ރަނގަޅު ފުރުސަތުތަކެއް ލިބި ބޭކާރުވެފައެވެ. އަދި މެޗުގައި ނަތީޖާ އެއްވަރުކުރަން އާސެނަލްގެ ބުކާޔޯ ސަކާ ފޮނުވާލި ނުރައްކާތެރި ހަމަލާއެއް ސިޓީގެ ގޯލްކީޕަރު އެޑަސަން ވަނީ މަތަކޮށްފައެވެ.

މި ނަތީޖާތަކާއެކު ސިޓީ އޮތީ ހަތަރު މެޗުން ހަތް ޕޮއިންޓާއެކު ތާވަލުގެ ނުވަވަނައިގައެވެ. އަދި ޔުނައިޓެޑް އޮތީ ހަތަރު މެޗުން ހަ ޕޮއިންޓާއެކު ތާވަލުގެ 14 ވަނައިގައެވެ.