މިނުވަންގޮޑާ ކްލަސްޓަރއާ ގުޅިގެން ޕޮޒިޓިވްވި މީހުންގެ އަދަދު 2000 އިން މައްޗަށް
މިނުވަންގޮޑާ ކްލަސްޓަރ އާ ގުޅިގެން މިހާތަނަށް 2014 މީހަކު ވަނީ ޕޮޒިޓިވްވެފައި
ކޮވިޑް ސާމްޕަލްތަކެއް ޓެސްޓް ކުރަނީ
މިނުވަންގޮޑާ ގާމެންޓް ފެކްޓްރީ ކްލަސްޓަރއާ ގުޅިގެން ޕޮޒިޓިވްވި މީހުންގެ އަދަދު 2014 އަށް އަރައިފިއެވެ.
ރިޕޯޓްތައް ބުނާ ގޮތުން ހޮނިހިރު ދުވަހު އެ ގައުމުން ޕޮޒިޓިވްވި 121 މީހުންގެ ތެރެއިން 115 މީހުންނަކީ މި ކްލަސްޓަރއާ ގުޅުން ހުރި މީހުންނެވެ. ޕޮޒިޓިވްވި އަނެއް ހަ މީހުންނަކީ ލަންކާއަށް އެހެން ގައުމުތަކުން އެތެރެވީ މީހުންނެވެ. އެހެންކަމުން މި ވަގުތު ލަންކާގައި ކޮމިއުނިޓީ ޓްރާންމިޝަންއެއް އޮތީ މިނުވަންގޮޑާގައި އެކަންޏެވެ.
ލަންކާއިން މި ފެނުނު ބޮޑު ކްލަސްޓަރ އެންމެ ފުރަތަމަ ފެށިގެން އައީ މިނުވަންގޮޑާގައި ހުންނަ ގާމެންޓް ފެކްޓްރީ އެއްގައި މަސައްކަތް ކުރާ އުމުުރުން 39 އަހަރުގެ އަންހެނަކާއި އޭނާގެ 16 އަހަރުގެ އަންހެން ދަރިފުޅު ކޮވިޑަށް ޕޮޒިޓިވް ވުމާއި ގުޅިގެންނެވެ.
މިހާތަނަށް ލަންކާގައި މި ބަލި ޖެހުނު 5475 މީހުންގެ ތެރެއިން 3395 މީހެއްގެ ބަލި ވަނީ ފަސޭހަވެފައެވެ. މި ބަލީގައި ލަންކާއިން މަރުވެފައިވަނީ 13 މީހެކެވެ. ލަންކާއަކީ ދެކުނު އޭޝިއާގެ ގައުމުތަކުގެ ތެރެއިން ބޫޓާން ނަގާފައި މި ބަލި ފެތުރުން ކޮންޓްރޯލް ކުރުމުގައި އެންމެ ބޮޑެތި ކުރިއެރުންތަކެއް ހޯދާފައިވާ ގައުމެވެ.
