އާބާދީގެ ނިސްބަތުން ހަނގުރާމަތަކުގައި ބައިވެރިވާން އެންމެ ގިނައިން ދަނީ ދިވެހިން

އާބާދީގެ ނިސްބަތުން ބޭރުގެ ގައުމުތަކުގައި ހިނގާ ދާހިލީ ހަނގުރާމަތަކުގައި ބައިވެރިން ވަނީ ދިވެހިން ކަމަށް ވިދާޅުވެވިދާނެ ކަމަށް، ނޭޝަނަލް ކައުންޓަރ ޓެރަރިޒަމް ސެންޓަރ (އެންސީޓީސީ) ގެ ޑިރެކްޓަރ ޖެނެރަލް ބްރިގޭޑިއަރ ޒަކަރިއްޔާ މަންސޫރު ވިދާޅުވެއްޖެއެވެ.

ޒަކަރިއްޔާ ކަންބޮޑުވުން ފާޅުކުރެއްވީ، އެންސީޓީސީ ކުރެވެމުންދާ މަސައްކަތްތަކާއި ގުޅޭ ގޮތުން ''ރާއްޖެ ޓީވީ'' އަށް ދެއްވި ހާއްސަ އިންޓަވިއު އެއްގައެވެ.

ރާއްޖޭގެ ކަމާއި ބެހޭ އިދާރާތަކުން ހާމަކޮށްފައިވާ މައުލޫމާތުތައް ބުނާ ގޮތުން ބޭރުގެ އެކި ގައުމުތަކުގައި ހިނގާ ދާހިލީ ހަނގުރާމަ ތަކުގައި 170 އެއްހާ ދިވެހިން ދަނީ ހަރަކާތްތެރި ވަމުންނެވެ. މީގެ ތެރެއިން ގިނަ ދިވެހިންނަކީ ސީރިޔާ ގައި ހިނގާ ހަނގުރާމަތަކުގައި އަމަލީ ގޮތުން ބައިވެރިވަމުން އަންނަ ފަރާތްތަކެވެ. މީގެ ތެރޭގައި ކުޑަކުދިން ވެސް ހިމެނެއެވެ.

އެ އަދަދުތަކަށް އިޝާރާތް ކުރައްވާ ޒަކަރިއްޔާ މަންސޫރު ވިދާޅުވީ، ރާއްޖޭގެ އާބާދީ އަށް އަޅައި ބަލާއިރު މަތީ އަދަދެއް ކަމަށެވެ.

ޒަކަރިއްޔާ ވިދާޅުވީ، ހަނގުރާމަތަކުގައި ބައިވެރިވާން ސީރިޔާ އަށް ދިޔަ މީހުންގެ ތެރެއިން ރާއްޖެ އަންނަން ވެގެން ބައެއް މީހުން ސަރުކާރުގައި އެދެމުން ދާތީވެ އެ މީހުން ގެނައުމުގެ މަސައްކަތް ފޮރިން މިނިސްޓްރީއާ ގުޅިގެން ކުރިޔަށްދާ ކަމަށެވެ. އެގޮތުން ފުރަތަމަ ކަމެއްގެ ގޮތުގައި ކުރަމުންދަނީ އެ ތަނުގައި ތިބި ދިވެހިން ދެނެގަތުން ކަމަށެވެ. އެކަމަކު އެކަމުގައި ގޮންޖެހުންތަކެއް ހުރި ކަމަށް ވިދާޅުވިއެވެ.

މިހާރު ކުރިޔަށްދާ 19 ވަނަ ރައްޔިތުންގެ މަޖިލީހުން ވަނީ ޓެރަރިޒަމް މަނާ ކުރުމުގެ ގާނޫނަށް ބޮޑެތި އިސްލާހުތަކެއް ގެނެސްފައެވެ. އަލަށް ގެނެވުނު އިސްލާހުގައިވާ ގޮތުން ހަނގުރާމަތަކުގައި ބައިވެރިވުމަށް ފަހު އަންނަ މީހުން، މުޖުތަމައު އިން އެކަހެރިކޮށް ރިހިބިލިޓޭޝަން ޕްރޮގްރާމެއް ހިންގަން ޖެހެއެވެ. އެ ޕްރޮގްރާމް ހިންގުމުގެ ޒިންމާ މަތިކޮށްފައިވަނީ ހޯމް މިނިސްޓްރީ އަށެވެ. އެންސީޓީސީ ބުނީ، ރިހިބިލިޓޭޝަން ޕްރޮގްރާމް ހިންގަން ތަނެއް ހެދުމުގެ މަސައްކަތް ހޯމް މިނިސްޓްރީން މިހާރު ވެސް ކުރަމުންދާ ކަމަށެވެ.

އެ އިންޓަވިއު ގައި ޒަަކަރިއްޔާ މަންސޫރު ވަނީ، ހަރުކަށި ފިކުރާއި ޓެރަރިޒަމް ހުއްޓުވަން ހުރިހާ ފަރާތެއް އެކަތިގަނޑަކަށް ވެގެން މަސައްކަތް ކުރުމުގެ މުހިއްމު ކަމުގެ މައްޗަށް އަލިއަޅުއްވާލައްވާފައެވެ.

އޭނާ ވިދާޅުވީ، މުޖުތަމައުގައި ހިނގާ ކުދި ކުދި ބައިބައިވުންތައް ނަފްރަތަށް ބަދަލުވެގެންދާ ކަމަށާއި، އޭގެ ސަބަބުން މީހުންނަށް ގެއްލުމެއް ދިނުމާއި އަނިޔާތަކަށް މަގުފަހިވާ ކަމަށެވެ. ދުނިޔޭގެ ސަލަމާތާއި ރައްކާތެރި މިންގަނޑުން ބެލިޔަސް ޓެރަރިޒަމްގެ ހަމަލާތަކަކީ މަތީ ކެޓަގަރީއެއް ގައި އޮންނަ ކަމަކަށްވާއިރު އދ. ގެ އިތުރުން ދޭދޭ ގައުމުތަކުގެ ތެރޭގައިވެސް ޓެރަރިސްޓު ހަމަލާއެއް ދީފާނެ ކަމަށްޓަކާއި ވަރަށް ބޮޑަށް ތައްޔާރުވަމުން އަންނަައިރު ރާއްޖެއިން ވެސް އެފަދަ ކަންކަން ހުއްޓުވަން ނުވަތަ ''ޕްރިވެންޝަން'' އާ ދިމާލަށް މިހާރަށްވުރެ ބޮޑަށް އަމާޒު ހިފައިގެން މަސައްކަތް ކުރަން ޖެހޭ ކަމަށް ވިދާޅުވިއެވެ.

އެންސީޓީސީން ދަނީ މިހާރުވެސް އެކި ފެންވަރުގައި ޓެރަރިޒަމްގެ އިތުރުން ހަަރުކަށި ފިކުރާއި ދެކޮޅަށް އެކި ކަހަލަ މަސައްކަތްތައް ކުރަމުންނެވެ. އެގޮތުން ބޭރުގެ އެކި ގައުމުތަކާއި، ޓެރަރިޒަމްއާ ދެކޮޅަށް މަސައްކަތް ކުރާ ޖަމިއްޔާތަކުން ކުރަމުންދާ މަސައްކަތްތައް ހިމެނެއެވެ. ޒަކަރިއްޔާ މަންސޫރު ވިދާޅުވާ ގޮތުގައި ޓެރަރިޒަމް މަނާކުރުމުގެ ގާނޫނަށް ގެނެވުނު އިސްލާހާ އެކު މިހާރަށްވުރެ ހަރުދަނާކޮށް އެކަންކަން ކުރެވިގެންދާނެއެވެ.

ރާއްޖެއިން ބޭރުގެ ހަނގުރާމަ ތަކުގައި ބައިވެރިވަ ދިވެހިންގެ އަދަދު ގިނަ ކަމަށް އެންސީޓީސީން ބުނެފައިވާއިރު، ފަސްޖެހުމެއްނެތި މީހުންގެ ފުރާނައަށް ގެއްލުން ދިނުމަށް ފަސްނުޖެހޭ 1400 އަށްވުރެ ގިނަ ދިވެހިން ރާއްޖޭގެ މުޖުތަމައުގެ ތެރޭގައި އުޅޭ ކަމަށް ކޮމިޝަނާ އޮފް ޕޮލިސް މުހައްމަދު ވަނީ މީގެ ކުރިން ވިދާޅުވެފައެވެ. ހަރުކަށި ފިކުރުގެ މީހުން ހޯދުމުގެ ގޮތުން ދޭތެރެ ދޭތެރެ އިން ފުލުހުން ދަނީ އެކި ކަހަލަ އޮޕަރޭޝަންތައް ހިންގައި ކާމިޔާބީތަކެއް ހޯދަމުންނެވެ. ފުލުހުން ލިބުނު މައުލޫމާތަކާއި ގުޅިގެން ސީރިޔާގެ ހަނގުރާމާގައި ބައިވެރިވުމަށް ފަހު ރާއްޖެ އައި ދިވެއްސަކު ވަނީ ފުލުހުންގެ ބެލުމުގެ ދަށަށް ދާދި ފަހުން ގެންގޮސްފައެވެ.