ނުއަގުގައި ވިއްކާފައި ހުރި ރަށްތަކުގެ މައްސަލައިގައި ދެން ފެންނާނީ ހައްލު: މައުސޫމް

އޮޅުވާލައިގެން އެއްބަޔަކަށް ދީފައި ހުރި ރިސޯޓުތަކާއި ނުހެދި ގިނަ ދުވަސްވެފައިވާ ރިސޯޓުތަކުގެ މައްސަލައިގައި ވަރަށް މަޝްވަރާ ކުރެވުނު ކަމަށާއި، ދެން ފެންނާނީ ހައްލު ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި، ކުރީ ސަރުކާރުން އެކަކަށް ވުރެ ގިނަ ފަރާތަށް ރުށް ވިއްކައި ފައިސާ ނަގާފައިވާ މައްސަލައާއި ނުއަގުގައި ރިސޯޓު ދީފައިވާ މައްސަލައިގައި އެންމެ ފަހުގެ މައުލޫމާތު ހިއްސާ ކުރައްވަމުން މިނިސްޓަރ ވިދާޅުވީ، އެ މައްސަލަ ހައްލުކޮށް އިންވެސްޓަރ ކޮންފިޑެންސް އަލުން ހޯދުމަކީ ރައީސް ސޯލިހު ވަރަށް ހާއްސަ އިސްކަމެއް ދެއްވާކަމެއް ކަމަށާއި އެ މަސައްކަތައް ވަރަށް ބޮޑު ކާމިޔާބީއެއް ލިބިފައިވާކަމަށެވެ.

އެގޮތުން، އެކަމާއި ގުޅިގެން އެކި ފަރާތްތަކާއި ގިނަ މަޝްވަރާތަކެއް ކުރެވި ވަރަށް ބޮޑު ކުރިއެރުމެއް ލިބިފައިވާކަން މިނިސްޓަރ ފާހަގަކުރެއްވިއެވެ. ދެން އެކަމުގައި ފެންނާނީ އަމަލީ މަސައްކަތް ފަށައި ބޮޑެތި ނިންމުންތައް ނިންމާތަން ކަމަށް މިނިސްޓަރ ވަނީ ވިދާޅުވެފައެވެ.

2000 ގެ ކުރީކޮޅުގައި ރިސޯޓު ހެދުމަށް ދޫކޮށްފައި ހުރި ރަށްތަކުގެ ތެރެއިން ބައެއް ރަށްތައް އަދިވެސް ތަރައްގީ ނުކުރެވި އެބަހުއްޓެވެ. މިނިސްޓަރގެ ވާހަކަފުޅުގައި ވަނީ ގިނަ ދުވަސްތައް ވަންދެން ތަރައްގީ ނުކުރެވި ހުރި ރިސޯޓުތަކުގެ މައްސަލައަށް އަލިއަޅުއްވާލައްވަމުން ވިދާޅުވީ، އެ ކަންބޮޑުވުން ވެސް ނިމުމަކަށް އަންނާނެ އިތުރަށް އެ ޝަކުވާ ކުރަން ޖެހޭނެ ދުވަހެއް ނާންނާނެ ކަމަށެވެ.

މިނިސްޓަރ މިހެން ވިދާޅުވެފައިވާއިރު، މިދިޔަ ސަރުކާރުން ވަނީ 60 އަށް ވުރެ ގިނަ ރަށް ކަނޑައަޅާފައިވާ އުސޫލުތަކާއި ހިލާފަށް ލިބެންޖެހޭ އަގަށްވުރެ ކުޑަކޮށް ދިގުމުއްދަތަށް ކުއްޔަށް ދޫކޮށްފައެވެ. މިހާތަަަނަށް ބެލި ބެލުމުގައި ރަށްތަކުގެ އެކުއިޒިޝަން ކޮސްޓް މިހާރުގެ ހަމަތަކުން ބަލާނަމަ ދޫކޮށްފައިހުރި ފަޅުތައް ނުހިމަނައި ވެސް 220 މިލިއަން ޑޮލަރަށް އަރާކަމަށް މީގެކުރިން ބޭއްވި ނޫސްވެރިންގެ ބައްދަލުވުމެއްގައި ރައީސް ސޯލިހު ވަނީ ވިދާޅުވެފައެވެ. ނުއަގުގައި ރަށްތައް ވިއްކާލައިގެން ދައުލަތަށް ލިބެންޖެހޭ 91 މިލިއަން ޑޮލަރެވެ.

ނުއަގުގައި ވިއްކާފައި ހުރި ރަށްތަކުގެ މަސަތްކަތް އެ ފަރާތްތަކުން ފަށާފައިވާކަމާއި އެ ފަރާތްތަކާއި މެދު ފިޔަވަޅެއް އަޅާއިރު ވަރަށް ބޮޑަށް ރާއްޖޭގެ އިންވެސްޓަރ ކޮންފިޑެންސް ނުގެއްލޭގޮތަކަށް ވިސްނަންޖެހޭ ކަމަށް ސަރުކާރުން ވަނީ ބުނެފައެވެ. މިހާތަނަށް ހާމަކޮށްފައިވާ މައުލޫމާތުތަކަށް ބަލާއިރު، މިތަނުން އެއް ރަށުގެ އެގްރީމަންޓް ވަނީ ބާތިލްކޮށްފައެވެ.