އޭސީސީން ތަހުގީގު ކުރުމުގެ އިޖުރާއަތުގެ ގަވާއިދު އިސްލާހުކޮށް އާ ގަވާއިދު ގެޒެޓްކޮށްފި
16 އޮކްޓޯބަރު 2020 | ހުކުރު 00:16އޭސީސީއަށް ލިބިދޭ އެނޫން ވެސް ބާރުތައް ބޭނުން ކުރާނެ ގޮތުގެ އުސޫލުތައް ކަނޑައަޅާނެ
އެންޓި ކޮރަޕްޝަން ކޮމިޝަން (އޭސީސީ) މަޖިލީހުގެ މިނިވަން މުއައްސަސާތަކުގެ ކޮމިޓީގައި- މަޖިލިސް
އެންޓި ކޮރަޕްޝަން ކޮމިޝަން، (އޭސީސީ) އިން ތަހުގީގުކުރުމުގެ އިޖުރާއަތުގެ ގަވާއިދު އިސްލާހުކޮށް އާ ގަވައިދެއް އެ ކޮމިޝަނުން ގެޒެޓްކޮށްފި އެވެ.
އޭސީސީން ބުދަ ދުވަހު ގެޒެޓް ކުރީ "އެންޓި ކޮރަޕްޝަން ކޮމިޝަނުގެ ތަހުގީގު ކުރުމުގެ އިޖުރާއަތުގެ ގަވާއިދު" އެވެ.
މި ގަވާއިދަކީ އޭސީސީއަށް ލިބިފައިވާ ބާރުތަކާއި މަސްއޫލިއްޔަތުތަކުގެ ބޭނުން ހިފުމުގައި އަމަލު ކުރާނެ އިޖުރާއަތުތަކާއި، ކޮމިޝަނުގެ އިހްތިސާސްތަކުގެ ތެރޭގައި ހިމެނޭ ދާއިރާތަކާއި ކަންކަމުގެ ތެރެއިން ކޮރަޕްޝަނުގެ ކުށްތައް ތަހުގީގު ކުރުމުގެ އެންމެހައި މަރުހަލާތަކުގައި އަމަލު ކުރާނެ އިޖުރާއަތުތައް ބަޔާން ކުރުމަށް (ޖިނާއީ އިޖުރާއަތުގެ ގާނޫނު)ގެ 211 ވަނަ މާއްދާގެ (ހ) ގެ (1) ވަނަ މާއްދާއާއި (އެންޓި ކޮރަޕްޝަން ކޮމިޝަނުގެ ގާނޫނު)ގެ 36 ވަނަ މާއްދާއިން ބާރު ލިބިގެން ހަދާފައިވާ ގަވާއިދެކެވެ.
މި ގަވާއިދުގެ މަގުސަދަކީ އޭސީސީއަށް މައްސަލަ ހުށަހެޅޭނެ އުސޫލާއި ކޮމިޝަނުން ކުރިޔަށް ގެންދާ ތަހުގީގަށް މީހުން ހާޒިރުކުރާނެ އުސޫލާއި، ތަންތަނާއި މުދާ ބަލައި ފާސް ކުރުމާއި، ތަކެތި ހިފެހެއްޓުމުގަޔާއި، ތަހުގީގު ކުރުމާ ގުޅޭ ގޮތުން އޭސީސީ އަށް ލިބިދޭ އެނޫން ވެސް ބާރުތައް ބޭނުން ކުރާނެ ގޮތުގެ އުސޫލުތައް ކަނޑައެޅުމެވެ.
މީގެ އިތުރުން ކޮމިޝަނަށް ހާޒިރުވުމަށް ނުވަތަ މައުލޫމާތެއް ދިނުމަށް ނުވަތަ ލިޔުމެއް ހުށަހެޅުމަށް، ނުވަތަ ކޮމިޝަނުން އުފުލަންޖެހޭ މަސްއޫލިއްޔަތުތަކާ ގުޅިގެން ކޮމިޝަނަށް ލިބިދޭ ބާރެއްގެ ދަށުންކަމެއް ކުރުމަށް ނުވަތަ ނުކުރުމަށް އަންގާ އެންގުމަކަށް ޢަމަލު ކުރުމަކީ، ދިވެހި ރައްޔިތުންގެ މައްޗަށާއި، ދިވެހި ރާއްޖޭގެ ޖުމްހޫރިއްޔާގެ ގާނޫނު އަސާސީގެ ބާރު ހިނގާ ސަރަޙައްދުގައިވާ މީހުންގެ މައްޗަށް ލާޒިމް ކަމެކެވެ.
ކޮމިޝަނުން އަންގާ މިފަދަ އެންގުންތަކަށް އަމަލު ނުކުރާ ފަރާތްތަކާމެދު، (ދިވެހިރާއްޖޭގެ ގާނޫނުލްއުގޫބާތު) ގެ533 ވަނަ މާއްދާގެ ދަށުން ގާނޫނީ ފިޔަވަޅު އެޅުމުގެ ބާރު ކޮމިޝަނަށް ލިބިގެންވެއެވެ.
