ސްޓޭޓް މިނިސްޓަރ ޝާހު މާހިރުގެ ސަސްޕެންޝަން އުވާލައިފި
15 އޮކްޓޯބަރު 2020 | ބުރާސްފަތި 17:32ޝާހުގެ މައްސަލަ ތަހުގީގުކުރީ ވެންޓިލޭޓަރު ގެނައުމުގައި ދިވެހި ދެ ކުންފުނިކަމަށްވާ މެޑްޓެކާއި ނާޑަށް ދިން މުއްދަތު އިތުރުކުރި މައްސަލައާ ގުޅިގެން
ހެލްތް މިނިސްޓްރީގެ ސްޓޭޓް މިނިސްޓަރު ޝާހު މާހިރު: އޭސީސީން ވަނީ ވެލްޓިލޭޓަރުގެ މައްސަލާގައި ޝާހު ކޮރަޕްޝަނުގެ އަމަލެއް ނުހިންގާކަމަށް ނިންމާފައި
ކޮވިޑް-19 އާ ގުޅިގެން ރާއްޖެއަށް ވެންޓިލޭޓަރު ގެނައުމުގައި ހެލްތު މިނިސްޓްރީން މާލިއްޔަތު ގަވާއިދާ ހިލާފުވި މައްސަލާގައި ސަސްޕެންޑްކުރި ހެލްތު މިނިސްޓްރީގެ ސްޓޭޓް މިނިސްޓަރު ޑރ. ޝާހު މާހިރުގެ ސަސްޕެންޝަން އުވާލައިފިއެވެ.
ރައީސް އޮފީހުން ބުރާސްފަތި ދުވަހު، ޝާހުގެ ސަސްޕެންޝަން އުވާލުމަށްފަހު، ވަޒީފާގެ މަސްއޫލިއްޔަތާ ހަވާލުވުމަށް އަންގަވާފައިވާއިރު، ބުދަ ދުވަހު އެނޓި ކޮރަޕްޝަން ކޮމިޝަން (އޭސީސީ) އިން ވަނީ ހެލްތް މިނިސްޓްރީން ހިންގާފައިވާ ކޮރަޕްޝަނުގެ އެ މައްސަލައިގެ ތަހުގީގު ނިންމުމަށްފަހު، ހެލްތް މިނިސްރު އަބްދުﷲ އަމީން ހިމެނޭގޮތަށް 11 ބޭފުޅެއްގެ މައްޗަށް ދައުވާ ކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައެވެ. ނަމަވެސް އެ ލިސްޓުގައި ޝާހުގެ ނަމެއް ނުހިމެނެއެވެ.
ވެންޓިލޭޓަރު ގަތުމުގައި ހިންގާފައިވާ ކޮރަޕްޝަން މައްސަލަ ފެންމަތިވުމާއެކު ޝަހު ވަނީ، ދުބާއީގެ އެގްޒެކިއުޓާރސް ޖެނެރަލް ޓްރޭޑިންގ ކުންފުންނާއެކު ހެލްތް މިނިސްޓްރީން ހިންގާފައިވާ މުއާމަލާތްތަކުގައި އޭނާ އެކަމުގައި ބައިވެރިވެވަޑައި ނުގަންނަވާކަން ހާމަ ކުރައްވާފައެެވެ. މައުލޫމާތު ލިބިފައިވާ ގޮތުގައި، ޝާހަކީ ހެލްތް މިނިސްޓްރީގެ ބިޑް ކޮމެޓީގެ މެމްބަރެއް ނަމަވެސް، އެގްޒެކިއުޓާރސް ޖެނެރަލް ޓްރޭޑިންގއިން ވެންޓިލޭޓަރު ގަތުމުގެ މުއާމަލާތްތަކުގައި ޝާހުގެ އެއްވެސް ދައުރެއް ނުވެއެވެ.
ޝާހުގެ މައްސަލަ ތަހުގީގުކުރީ ވެންޓިލޭޓަރު ގެނައުމުގައި ދިވެހި ދެ ކުންފުނިކަމަށްވާ މެޑްޓެކާއި ނާޑަށް ދިން މުއްދަތު އިތުރުކުރި މައްސަލައާ ގުޅިގެންނެވެ.
އޭސީސީން ބުނެފައިވަނީ، ހެލްތު މިނިސްޓްރީގެ ބިޑް ކޮމިޓީން އެއްބަސްވުންތަކުގެ މުއްދަތު އިތުރުކުރުމަށް ނިންމުމުގައި ރިއާޔަތްކޮށްފައިވާ ސަބަބުތައްކަމަށް މުއްދަތު އިތުރުކުރުމަށް ނިންމި ނިންމުންތަކުގައިވާ ސަބަބުތަކަކީ އެހާލަތަށް އެކަށީގެންވާ ސަބަބުތަކެއް ކަމަށް ތަހުގީގަށް ފެންނަ ކަމަށެވެ. އަދި އެއްބަސްވުންތަކުގައި ސޮއިކުރިއިރު ރާއްޖޭގެ ބޯޑަރު ބަންދުކޮށްފައިނުވި ނަމަވެސް، މުއްދަތު އިތުރުކުރުމަށް ނިންމިއިރު ރާއްޖޭގެ ބޯޑަރުވަނީ ބަންދުކޮށްފައިކަމާއި، ހެލްތު މިނިސްޓްރީން އެ ދުވަސްވަރު ކުރިއަށް ގެންދިޔަ ވަރަށް ގިނަ ޕްރޮކިއުމެންޓްތަކާ ގުޅިގެން މުއްދަތު އިތުރުކޮށް ދީފައިވާ ކަން ތަހުގީގަށް ފާހަގަވާ ކަމަށް ވެސް އޭސީސީން ބުނެއެވެ.
އެހެންކަމުން، އޭސީސީން ފޮނުވި ލިޔުމުގައި ވަނީ ޝާހުގެ މައްޗަށް ކުރާ ތުހުމަތުތަކާއި ގުޅިގެން ކޮރަޕްޝަނުގެ އަމަލެއް އެކުލެވިގެން ނުވާކަމަށް ކަނޑައަޅާ ކަމަށެވެ.
