އަންނަ ސީޒަނުގައިވެސް ކުލަބު އީގަލްސްގައި މަޑުކުރަން އެ ޓީމުގެ ކޯޗު މުޙައްމަދު ޝިޔާޒް (މޯހަން) ނިންމައިފިއެވެ.
މޯހަން ވަނީ އީގަލްސްގައި މަޑުކުރަން ނިންމާފައިވާކަން "ރާއްޖެ.އެމްވީ" އަށް ކަށަވަރުކޮށްދީފައެވެ.
އީގަލްސްގެ ކޯޗުގެ މަގާމާ މޯހަން ހަވާލުވީ 2018 ވަނަ އަހަރުއެވެ. އޭނާއާއެކު އެ ޓީމުން ވަނީ މިދިޔަ ދެ ސީޒަނުގައިވެސް ލީގުގެ ދެވަނަ ހޯދާފައެވެ. އަދި އީގަލްސްއިން ވަނީ އެ ޓީމުގެ ތާރީޚުގައި މުޅިން އަލަށް އަންނަ އަހަރުގެ އޭއެފްސީ ކަޕުގެ ޕްލޭއޮފުން ޖާގައެއް ހޯދާފައެވެ. އީގަލްސްއަށް އޭއެފްސީ ކަޕުން ޖާގައެއް ލިބުނީ މިދިޔަ ސީޒަނުގެ އެފްއޭ ކަޕް ކެންސަލް ކުރުމާއެކު، ދިވެހި ޕްރިމިއާ ލީގުގެ ދެވަނަ ޓީމުގެ ހައިސިއްޔަތުންނެވެ.
އަންނަ ސީޒަނުގައިވެސް އީގަލްސްގެ ބެންޗުގައި މޯހަން މަޑުކުރާއިރު، ދާދި ފަހުން އޭނާ ވަނީ ފުޓްބޯޅައިގެ އެންމެ މަތީ ކޯޗިންގ ލައިސަންސް ކަމަށްވާ އޭއެފްސީ ޕްރޯ ލައިސަންސް ނަގާފައެވެ. އޭއެފްސީ ޕްރޯ ލައިސަންސް އަކީ ޔުއެފާ ޕްރޯ ލައިސަންސްއާ އެއް ފެންވަރެއްގެ ސެޓްފިކެޓެކެވެ. މިއީ އޭ ލައިސަންސަށް ފަހު ދެން އޮންނަ، އަދި ފުޓްބޯޅައިގައި މިވަގުތު ނެގެން އޮންނަ އެންމެ މަތީ ލައިސަންސެވެ.
ކްލަބު އީގަލްސްއަށް ކޯޗުކަން ކޮށްދެމުން އަންނަ މޯހަން ޕްރޯ ލައިސަންސް ނެގިއިރު، މިދިޔަ ސީޒަނުގެ ތެރޭގައި މި ކޯސް ހެދުމަށް ގައުމުން ބޭރަށް ދާން ޖެހުމުގެ ސަބަބުން އޭނާއަށް ވަނީ އީގަލްސްގެ ބައެއް މެޗުތައް ގެއްލިފައެވެ.
މީގެ ކުރިން 1997ން 2008ށް ގައުމީ ފުޓްބޯޅަ ޓީމުގެ އެސިސްޓަންޓް ކޯޗެއްގެ ގޮތުގައި މަސައްކަތް ކުރި މޯހަން ވަނީ ރާއްޖޭން 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރުމުގައި މުހިންމު ދައުރެއް އަދާކޮށްފައެވެ. ކްލަބު ކޯޗިން ކެރިއަރުގައި މޯހަން ވަނީ އީގަލްސްގެ އިތުރުން ނިއުރޭޑިއަންޓާއި، ވެލެންސިއާ އާއި، އދ. މަހިބަދޫގެ އިތުރުން ދ. ކުޑަހުވަދޫ ޓީމަށް ފުރަތަމަ ޑިވިޝަނުގައި ކޯޗުކޮށްދީފައެވެ.
އީގަލްސްގައި މޯހަން މަޑުކުރިއިރު، އައު ސީޒަނަށް ތައްޔާރުވުމަށް އަންނަ މަހުގެ އެއްވަނަ ދުވަހު ފަރިތަކުރުންތައް ފަށަން އީގަލްސްއިން އަންނަނީ މަސައްކަތް ކުރަމުންނެވެ. މިހާތަނަށް ފަރިތަކުރުންތައް ފަށާފައިވަނީ މާޒިޔާއިން އެކަންޏެވެ.
ކޮވިޑް-19 އާ ގުޅިގެން އައު ސީޒަން ފެށުން ލަސްވެފައިވާއިރު، އަންނަ ޑިސެމްބަރު މަހު ފުޓްބޯޅަ ސީޒަން ފަށަން އެފްއޭއެމުން އަންނަނީ މަސައްކަތް ކުރަމުންނެވެ. އެކަމަކު ދާދި ފަހުން ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ވަނީ މާލެ ސަރަހައްދުގައި އަޅާފައިވާ ފިޔަވަޅުތަކަށް ލުދިނުމުގެ ތެރެއިން ކުޅިވަރު ހަރަކާތްތަކަށް ހުއްދަ ދެވޭނީ ފެންނަ ކޭސްތަކުގެ އަދަދަށް ބެލުމަށްފަހުގައި ކަމަށް ވިދާޅުވެފައެވެ.
