ޔުއެފާ ނޭޝަންސް ލީގުގައި ވާދަކުރަމުން އަންނަ އިންގްލެންޑުގެ ގައުމީ ފުޓްބޯޅަ ޓީމުގެ ސްކޮޑުން ދެ ޑިފެންޑަރުން ކަމަށްވާ ކިއެރަން ޓްރިޕިއޭ އާއި ބެން ޗިލްވެލް ވަކިވެއްޖެއެވެ.

މި ދެ ކުޅުންތެރިން ސްކޮޑުން ވަކިވި ސަބަބެއް އިނގިރޭސި އެފްއޭއިން ހާމަކޮށްފައެއް ނުވެއެވެ. އެކަމަކު ރިޕޯޓުތައް ބުނާ ގޮތުން ޓްރިޕިއޭ ސްކޮޑުން ވަކިވީ އަމިއްލަ ސަބަބަކާ ގުޅިގެންނެވެ. އަދި ސްކޮޑުން ވަކިވެ ޗިލްވެލް އެނބުރި ޗެލްސީއަށް ދިޔައީ ފަރިތަކުރުންތަކުގެ ތެރެއިން ލިބުނު އަނިޔާއަކާ ގުޅިގެންނެވެ.

މީގެ ތެރެއިން ޓްރިޕިއޭ ވަނީ ނޭޝަންސް ލީގުގެ ކުރިން އިންގްލެންޑުން ވޭލްސްއާ ދެކޮޅަށް ކުޅުނު ބައިނަލްއަގުވާމީ އެކުވެރިކަމުގެ މެޗުގައި އިންގްލެންޑުގެ ކެޕްޓަން ބޭންޑް އަޅާފައެވެ. އެ މެޗުން އިންގްލެންޑް މޮޅުވީ 3-0 ންނެވެ. އަދި ފަހުން ނޭޝަންސް ލީގުގައި ދުނިޔޭގެ ރޭންކިންގެ އެއްވަނައިގައި އޮތް ބެލްޖިއަމް އަތުން 2-1 ން އިންގްލެންޑް މޮޅުވި މެޗުގައިވެސް ޓްރިޕިއޭ ވަނީ ކުޅެފައެވެ. އެކަމަކު މި ދެ މެޗުގައިވެސް ޗިލްވެލް ކުޅެފައެއް ނުވެއެވެ.

އިންގްލެންޑުގެ ސްކޮޑުން ޓްރިޕިއޭ އާއި ޗިލްވެލް ވަކިވިއިރު، ނޭޝަންސް ލީގުގައި ބުދަ ދުވަހުގެރޭ އަމިއްލަ ގައުމުގައި އިންގްލެންޑުން ޑެންމާކާ ދެކޮޅަށް ނުކުންނާނެއެވެ.

ލީގު އޭ ގްރޫޕް ދޭއްގައި ހިމެނޭ އިންގްލެންޑުން އެންމެ ފަހުން ކުޅުނު މެޗުން ބެލްޖިއަމް އަތުން މޮޅުވިއިރު، އެ މޮޅާއެކު އިންގްލެންޑް ވަނީ ގްރޫޕުގެ އެއްވަނައަށް ޖެހިލާފައެވެ. އެގޮތުން އިންގްލެންޑަށް އެއްވަނަ ލިބެނީ ތިން މެޗުން ހަތް ޕޮއިންޓާއެކުއެވެ. ދެވަނައިގައި އޮތް ބެލްޖިއަމަށް ތިން މެޗުން ލިބިފައިވަނީ ހަ ޕޮއިންޓެވެ. ތިންވަނައިގައި ތިން މެޗުން ހަތަރު ޕޮއިންޓާއެކު ޑެންމާކް އޮތްއިރު، އައިސްލެންޑް އޮތީ ތިން މެޗުން ޕޮއިންޓެއް ނުލިބި ފުލުގައެވެ.