ވެރިކަމުގެ ނިޒާމު ބަދަލު ކުރުމަށް ޖާބިރު ހުށަހެޅުއްވި އިސްލާހުގެ ބިލްގެ ފުރަތަމަ ކިޔުން އިއްވުން ބުދަ ދުވަހުގެ ޖަލްސާގައި
ތިން ބިލެއްގެ ފުރަތަމަ ކިޔުން އިއްވުމަށް އެެޖެންޑާކޮށްފައިވޭ
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ވެރިކަމުގެ ނިޒާމަށް ބަދަލު ގެނައުމަށް ޤާނޫނު އަސާސީއަށް ކާށިދޫ ދާއިރާގެ މެމްބަރ އަބްދުﷲ ޖާބިރު ހުށަހަޅުއްވާފައިވާ އިސްލާހުގެ ބިލްގެ ފުރަތަމަ ކިޔުން ކުރިޔަށް ގެންދިޔުމަށް ބުދަ ދުވަހުގެ ޖަލްސާ އަށް އެޖެންޑާ ކޮށްފިއެވެ.
މި އިސްލާހާ ގުޅިގެން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވަނީ އަންގާރަ ދުވަހުގެ ޖަލްސާގައި ވާހަކަ ދައްކަވާފައެވެ. އެގޮތުން ވެރިކަމުގެ ނިޒާމަށް އިސްލާހެއް ގެނައުމަކީ އެމަނިކުފާނު ދައްކަވާ ވާހަކަފުޅެއްކަން އެންމެންނަށް ވެސް އެނގޭނެ ކަމަށާއި ނަމަވެސް އެމަނިކުފާނު ދެކެވަޑައިގަންނަވާ ގޮތުގައި މިއީ އެ ބަހުސް ފަށަންވީ ވަގުތު ނޫން ކަމަށް ވަނީ ވިދާޅުވެފައެވެ. އަދި ޖާބިރު ހުށަހަޅުއްވާފައިވާ އިސްލާހު އޮތީ އެ މަގަށް ކަމަ ށްވެސް ދެކެވަޑައިނުގަންނަވާ ކަމަށް ނަޝީދު ވިދާޅުވިއެވެ.
ވެރިކަމުގެ ނިޒާމު ބަދަލު ކުރުމަށް ޤާނޫނު އަސާސީއަށް ޖާބިރު ހުށަހެޅުއްވި އިސްލާހުގައި ވަނީ ގާނޫނު އަސާސީ ތަސްދީގު ކުރެވުނު ފަހުން ބޭއްވި ރިޔާސީ އިންތިހާބުތަކުގެ މައްޗަށް އަދި ރާއްޖޭގެ ވެރިކަން ހިންގަމުންދާ ގޮތަށް ބަލާއިރު، ރާއްޖޭގެ ވެރިކަން ހިންގަމުން ދަނީ ބަރުލަމާނީ ނިޒާމުގެ ސިފަތަކުގެ މައްޗަށް ކަމަށެވެ. ރާއްޖޭގައި ހިންގަމުން އަންނަ ވެރިކަމަކީ ރިޔާސީ ނިޒާމެއްގެ ފުރިހަމަ ސިފައިގައި ހިންގަމުން އަންނަ ވެރިކަމަކަށް ނުވާތީ، އެކަމުގެ ސަބަބުން ދިވެހި ރައްޔިތުންނަށް ލިބެމުންދާ ގެއްލުމާއި ނިކަމެތިކަން ދުވަހުން ދުވަހަށް ބޮޑުުވަމުން އަންނައިރު، ރައްޔިތުންނަށް އެ ލިބޭ ގެއްލުމުން ސަލާމަތްވާނީ ރާއްޖޭގެ ވެރިކަމުގެ ނިޒާމު 'ބަރުލަމާނީ ނިޒާމަކަށް' ބަދަލުވެގެން ދިޔުމުން ކަމަށް ގަބޫލު ކުރެވޭ ކަމަށް އެ އިސްލާހުގައި ބުނެފައިވެއެވެ.
ބުދަ ދުވަހުގެ ޖަލްސާއަށް ދެން ފުރަތަމަ ކިޔުން އިއްވުމަށް އެޖެންޑާ ކޮށްފައިވަނީ މަހިބަދޫ ދާއިރާގެ މެމްބަރ އަހުމަދު ތާރިޤް ޤާނޫނު އަސާސީއަށް އިސްލާހު ގެނައުމަށް ހުށަަހަޅުއްފައިވާ އިސްލާހެކެވެ. އެ އިސްލާހަކީ ޖުޑީޝަލް ސަރވިސް ކޮމިޝަންގެ ބާބަށް އިސްލާހު ގެނައުމަށް ހުށަހަޅުއްވާފައިވާ އިސްލާހެެކެވެ. މީގެއިތުރުން ފުވައްމުލަކު އުތުރު ދާއިރާ ގެ މެންބަރު މުޙައްމަދު ރަޝީދު ހުށަހަޅުއްވާފައިވާ އިފްލާސްވުމާއި އިފްލާސް ކުރުމުގެ ބިލުގެ ފުރަތަމަ ކިޔުން އިއްވުމަށް ވެސް ވަނީ އެޖެންޑާ ކޮށްފައެވެ.
ބުދަ ދުވަހުގެ ޖަލްސާ އަށް ހޯރަފުށި ދާއިރާގެ މެމްބަރ އަހުމަދު ސަލީމް މަޖިލީހުގެ ގަވާއިދުގެ 179 ވަނަ މާއްދާގެ ދަށުން ހުށަހަޅުއްވާ ކުއްލި މައްސަލައެއް ވެސް ވަނީ އެެޖެންޑާކޮށްފައެވެ.
އިބްތިދާއީ ބަހުސްގެ މަރުހަލާގައި ބުދަ ދުވަހުގެ ޖަލްސާއަށް ހުށަހަޅާ ބަހުސް ކުރުމަށް އެެޖެންޑާ ކޮށްފައިވަނީ ސަރުކާރުގެ ފަރާތުން ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ހުށަހަޅުއްވާފައިވާ ޓެކްސް ނެގުމާއި ބެހޭ އިދާރީ ޤާނޫނަށް އިސްލާހު ގެނައުމުގެ ބިލެވެ. މިއީ މި ދައުރަށް ސަރުކާރުން މަޖިލީހަށް ހުށަހަޅާނެ ކަމަށް ހާމަކޮށްފައިވާ ބިލްތަކުގެ ތެރެއިން ބިލެކެވެ.
ނުނިމި ހުރި މަސައްކަތުގެ ތެރެއިން ބިނާވެށި ޕްލޭން ކުރުމާއި ހިންގުމުގެ ބިލްގެ ބަހުސް ކުރިޔަށް ގެންދިޔުމަށް ވަނީ އެޖެންޑާ ކޮށްފައެވެ.
