ބޭރަށް ހިންގުން ޖެހިގެން ރިޕޯޓް ކޮށްފައިވާ އަދަދު ދަށަށް ގޮސްފި

ވޭތުވެދިޔަ އަހަރުތަކުގެ މި ދުވަސްވަރާ އަޅާ ބަލާއިރު މި އަހަރުގެ މިހާތަނަށް ބޭރަށް ހިންގުން ޖެހިގެން ރިޕޯޓް ކޮށްފައިވާ އަދަދު ދަށަށް ގޮސްފިއެވެ.

ހެލްތް މިނިސްޓްރީން އާންމު ކޮށްފައިވާ ''ރޯގާގެ ގޮތުގައި ފެތުރެމުންދާ ބަލިތަކުގެ ހާލަތު 2020''ން ދައްކާ ގޮތުން މި އަހަރުގެ ފުރަތަމަ 3 މަހާ އަޅާ ބަލާއިރު މި އަހަރުގެ މޭ މަހު ބޭރަށް ހިންގުން ޖެހިގެން ރިޕޯޓް ކޮށްފައިވާ އަދަދު އިތުރު ވެފައިވީ ނަމަވެސް ޖޫން މަހުން ފެށިގެން ރިޕޯރޓް ކުރެވުނު އަދަދު ދަށަށް ގޮސް ވެފައިވާ ކަމަށެވެ.

Advertisement

އެގޮތުން އޮގަސްޓް މަހު 919 ކޭސް، ސެޕްޓެންބަރު މަހު 767 ކޭސް ރިޕޯޓު ކޮށްފައިވެއެވެ.

ބޭރަށް ހިންގުމާއި ހޮޑުލުމުން ރައްކާތެރިވުމަށް އެޅުން މުހިންމު ފިޔަވަޅުތަކުގެ ތެރޭގައި ކެއުމުގެ ކުރިން އަދި ކާބޯތަކެތި ތައްޔާރުކުރުމުގެ ކުރިން ސައިބޯނި ލައިގެން ރަނގަޅަށް އަތް ދޮވުމާއި، ފާޚާނާ ކުރުމަށްފަހު އަދި ނެޕީ ބަދަލު ކުރުމަށްފަހު ސައިބޯނި ލައިގެން ރަނގަޅަށް އަތް ދޮވުމާއި، ކާބޯތަކެތި ރަނގަޅަށް ކައްކައިގެން ބޭނުން ކުރުމާއި ރޯ ތަރުކާރީ އާއި މޭވާ ރަނގަޅަށް ދޮވެގެން ބޭނުން ކުރުން ހިމެނެއެވެ.

މީގެ އިތުރުން ގޭގައި ކާބޯތަކެތި ރައްކާ ކުރާއިރު ރައްކާ ކުރާ ތަނަކީ ސާފު ތާހިރު ތަނެއްތޯ ބެލުމާއި ކާބޯތަކެތި ތައްޔާރު ކުރާ ތަންތަނާއި ތަކެތި ރަނގަޅަށް ދޮވެ ސާފު ކުރުމާއި، ކާބޯތަކެއްޗަށް ދިރޭ ސޫފާސޫތްޕަށް ނޭރެވޭނެހެން މަތި ޖަހާފައި ބެހެއްޓުމާއި، ކެއުމުގައި ވީހާ ވެސް ތާޒާ ކާނާ ބޭނުން ކުރުމާއި ކާބޯތަކެތި ހަލާކުނުވާނޭހެން ރައްކާ ކުރުމުގެ އިތުރުން ކެއްކުމަށާއި ފެން ބުއިމަށް ފުޅީގައި ބަންދު ކޮށްފައިވާ ފެން ނުވަތަ ކޮލޮރިނޭޓް ކޮށްފައިވާ ފެން ނުވަތަ ވޯޓާރ ސަޕްލައި ފެންނުވަތަ ފެން ކައްކާއިގެން ބޭނުން ކުރުން މުހިންމެވެ.

ބޭރަށް ހިންގުމާއި ހޮޑުލުން ޖެހިއްޖެނަމަ އަމަލު ކުރާނެ ގޮތާއި ބެހޭ ގޮތުން މިނިސްޓްރީން ބުނީ ގިނަގިނައިން ލޮނުޕެކެޓު (އޯ.އާރ.އެސް)، ފެން އަދި ސޫޕް، ކުރުނބާ ފެންފަދަ ދިޔާތަކެތި ބޭނުން ކުރުމާއި ތުއްތު ކުދިންނަށް ގާތުން ކިރު ދިނުން މުހިންމު ކަމަށެވެ.

ބޭރަށް ހިންގުމުގެ އިތުރުން އާދަޔާ ޚިލާފަށް ކަރު ހިއްކުމާއެކު ބޮލަށް އެނބުރުން އެރުމާއި، މާބޮޑަށް ވަރުދެރަވުމާއި، ކުޑަކަމުދެވޭ މިންވަރު މަދުވުމާއި، ގިނަގިނައިން ހޮޑުލެވުން އަދި ލެވޭ ހޮޑުގައި ލޭގެ އަސަރު ހުރުމާއި، ބޮޑުކަމުދެވޭ ތަކެތީގައި ލޭގެ އަސަރު ހުރުން އަދި އާދަޔާ ޚިލާފަށް ބަނޑުގައި ރިއްސާ ނަމަ އަވަހަށް ޑޮކްޓަރަށް ދެއްކުމަށް ވެސް ހެލްތް މިނިސްޓްރީން ވަނީ އިލްތިމާސް ކޮށްފައެވެ.

މީގެ އިތުރުން މިނިސްޓްރީން ބުނީ ބޭރަށް ހިންގުމުގެ އަލާމާތްތައް ނުފެންނަތާ 2 ދުވަސް ވަންދެން ސްކޫލު ކުދިން ސްކޫލަށް ނުފޮނުވުމާއި، މަސައްކަތަށް ނުނިކުމެ ގޭގައި އަރާމު ކުރުމުގެ އިތުރުން އާންމުން އެއްވެ އުޅޭ ސަރަހައްދުތަކަށް ނިކުމެ އުޅުން މަދު ކުރުމަށް އެދޭ ކަމަށެވެ.

ހެލްތް މިނިސްޓްރީން ބުނީ ވައިރަލް ހުން، ފާނަ ބަސަންދު އަދި ލޮލުރޯގާ ފަދަ ބަލިތައް އާއްމުކޮށް އުޅޭ މިންވަރަށް ވުރެ އިތުރުވެފައި ނުވާ ކަމަށެވެ.