މި އަހަރުގެ ފްރެންޗް އޯޕަން ޓެނިސް މުބާރާތް ކާމިޔާބުކޮށް ޓެނިސް ލެޖެންޑް ރޮޖާ ފެޑެރާގެ ރިކޯޑާ ރަފައެލް ނަޑާލް ހަމަކޮށްފިއެވެ.

މީގެ ކުރިން 2018 ވަނަ އަހަރު ފެޑެރާ ވަނީ ގްރޭންޑް ސްލޭމް 20 ތަށި ކާމިޔާބުކޮށް، އެންމެ ގިނައިން ގްރޭންޑް ސްލޭމް މުބާރާތް ކާމިޔާބުކުރި ކުޅުންތެރިޔާގެ ރިކޯޑު ހަދާފައެވެ. އެ ރިކޯޑާ ފްރެންޗް އޯޕަނުގެ އެންމެ ކާމިޔާބު ކުޅުންތެރިޔާ ނަޑާލް އެއްވަރުކުރީ އާދީއްތަ ދުވަހު ކުޅުނު ފައިނަލް މެޗުގައި ދުނިޔޭގެ ރޭންކިން އެއްވަނައިގައި އޮތް ނޮވަކް ޖޮކޮވިޗް ބަލިކުރުމަށްފަހުއެވެ. އެއާއެކު އުމުރުން 34 އަހަރުގެ ނަޑާލްވެސް ވަނީ ގްރޭންޑް ސްލޭމް 20 ތަށި މިހާތަނަށް ކާމިޔާބުކޮށްފައެވެ.

އާދީއްތަ ދުވަހު ކުޅުނު ފްރެންޗް އޯޕަނުގެ ފައިނަލް މެޗުން ނަޑާލް މޮޅުވީ ޖޮކޮވިޗް އަތުން ފަސޭހަކަމާއެކު ސީދާ ތިން ސެޓުންނެވެ. އެގޮތުން މެޗުގެ ފުރަތަމަ ދެ ސެ ޓު ނަޑާލް ވަނީ ފަސޭހަކަމާއެކު ކާމިޔާބުކޮށްފައެވެ. އެ ދެ ސެޓު ނަޑާލް ގެންދިޔައީ 6-0 އަދި 6-2 ންނެވެ. މެޗުގެ ތިންވަނަ ސެޓުގައި ޖޮކޮވިޗް ކުޅުން ރަނގަޅުކުރި ނަމަވެސް، ނަޑާލް ވަނީ މި ސެޓު 7-5 ން ކާމިޔާބުކޮށް ޗެމްޕިއަންކަން ހޯދާފައެވެ.

ފައިނަލް މެޗަށްފަހު ނަޑާލް ބުނީ ފެޑެރާއާއެކު މިވީތަނަށް ތަފާތު ތަޖުރިބާތަކެއް ކުރެވިފައިވާ ކަމަށާއި، އޭނާގެ ރިކޯޑާ ހަމަކުރެވުމަކީ ފަޚުރެއް ކަމަށެވެ. އަދި އެހެން އަހަރުތަކާ ޚިލާފަށް މި އަހަރަކީ އޭނާއަށް އުދަނގޫ އަހަރެއް ކަމަށާއި، އެކަމަކު މި ލެވެލުގައި ހިފެހެއްޓުނީ ވަރަށް މަސައްކަތުން ކަމަށްވެސް ވަނީ ބުނެފައެވެ.

ޖޮކޮވިޗް ބަލިކޮށް ފްރެންޗް އޯޕަންގެ ޗެމްޕިއަންކަން ނަޑާލް 13 ވަނަ ފަހަރަށް ހޯދިއިރު، އޭނާ ވަނީ މިހާތަނަށް މި މުބާރާތުގެ ފައިނަލުގައި ސައްތަ އިން ސައްތަ ރިކޯޑެއް ދަމަހައްޓާފައެވެ. އަދި މިއީ ނަޑާލް މި މުބާރާތުގެ ފައިނަލުގައި ޖޮކޮވިޗް ބަލިކުރި ތިންވަނަ ފަހަރެވެ. މީގެ ކުރިން ނަޑާލް ވަނީ 2012 އަދި 2014 ވަނަ އަހަރުގެ ފައިނަލުގައި ޖޮކޮވިޗް ބަލިކޮށްފައެވެ.

އަދި އާދީއްތަ ދުވަހުގެރޭގެ މޮޅާއެކު ނަޑާލް ވަނީ ފްރެންޗް އޯޕަނުގައި 100 މޮޅު ހަމަކޮށްފައެވެ. އޭނާ މި މުބާރާތުގައި މިހާތަނަށް ބަލިވީ އެންމެ ދެ މެޗުންނެވެ.