ސިއްޙީ މަސައްކަތްތެރިންގެ ހިދުމަތްތައް ޕްރޮފެޝަނަލް މިންގަޑުތަކަށް ފެތޭނެ: އެޗްޕީއޭ
10 އޮކްޓޯބަރު 2020 | ހޮނިހިރު 16:21މަސައްކަތްތެރިންގެ ސަލާމަތާއި ރައްކާތެރިކަން ކަށަވަރު ކުރާނެ ކަމުގެ ޔަގީން ކަން އެ އޭޖެންސީއިން ވަނީ ދީފަ
ފްރޮންޓްލައިންގަ މަސައްކަތް ކުރަމުންދާ އާރުއާރުޓީ އިން މަގުމަތީގައި ސާމްޕަލްނެގުމަށް ހަރަކާތްތެރިވަނީ
ކޮވިޑް-19 ކޮންޓްރޯލް ކުރުމަށް ކުރަމުންދާ މަސައްކަތުގައި ސިއްޙީ މަސައްކަތްތެރިން ދެމުންދާ ހިދުމަތްތަކަކީ ޕްރޮފެޝަނަލް މިންގަޑުތަކާ އެއްގޮތްވާ ގޮތުގެމަތިން ދެމުންގެންދާ ޚިދުމަތްތަކެއް ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން މިހެން ބުނެފައިވަނީ މާފަންނު މަދަރުސާގައި ދިއްގަރު ދާއިރާގެ މެމްބަރު އިކްރާމް ހަސަންގެ ކޮވިޑް-19 ސާމްޕަލް ނެގި މީހާއަށް އޭނާ ޙަމަލާ ދިން ކަމަށް ބުނާ މައްސަލަ ފުލުހުން ތަހުޤީޤު ކުރަން ފަށައިފައިވަނިކޮށެވެ.
އެ އޭޖެންސީގެ ބަޔާނުގައި ވަނީ ކޮވިޑް-19 ކޮންޓްރޯލް ކުރުމަށް ކުރަމުންދާ މަސައްކަތުގައި އެޗް.އީ.އޯ.ސީއާއި ސިއްޙީ ޚިދުމަތް ދޭ މަރުކަޒުތަކުގައި އަދި ކޯވިޑް-19 އަށް ޓެސްޓު ކުރުމުގައި ދެމުންދާ ޚިދުމަތްތަކަކީ ޕްރޮފެޝަނަލް މިންގަޑުތަކާ އެއްގޮތްވާ ގޮތުގެމަތިން ދެމުންގެންދާ ޚިދުމަތްތަކެއް ކަމަށެވެ.
އަދި މި ޚިދުމަތްތައް ދިނުމުގައި ކަންކަން އޮޅުން ފިލުވައިދީ އާންމު ފަރާތްތަކުން ކަންބޮޑުވާ ކަންތައްތަކަށް ވެސް އިޖާބަދީ ޚިދުމަތް ފޯރުކޮށްދެމުންދަނީ މި މިންގަނޑާއި އެއްގޮތަށް ކަމަށެވެ.
އެޗްޕީއޭ އިން ބުނީ މި މަސައްކަތްތަކުގައި ސިއްހީ ޚިދުމަތްތެރިންނާއި ވޮލަންޓިއަރުން ރެއާ ދުވާލު މަސައްކަތް ކުރަމުން ދަނީ އެންމެންގެ ސަލާމަތާއި ރައްކާތެރިކަމަށް އިސްކަންދީގެން ކަމަށެވެ. އަދި އެ ފަރާތްތަކުން ފޯރުކޮށްދޭ ޚިދުމަތް ދިނުމުގައި އަމަލު ކުރުމަށް ކަނޑައެޅިފައިވާ މިންގަނޑުތަކާ އެއްގޮތްވާ ގޮތުގެ މަތިން އަދި އޯގާތެރިކަމާއެކު ކަމަށެވެ.
މީގެއިތުރުން މި ވައިރަސް ކޮންޓްރޯލް ކުރުމަށް ކުރަމުންދާ މަސައްކަތުގައި ހަރަކާތްތެރިވާ ސިއްހީ ޚިދުމަތްތެރިންނާ، ވޮލަންޓިއަރުންގެ ސަލާމަތާއި ރައްކާތެރިކަން ކަށަވަރު ކުރާނެ ކަމުގެ ޔަގީންކަން އެ އޭޖެންސީއިން ވަނީ ދީފައެވެ. އަދި މިކަން ކަށަވަރު ކުރުމަށް އާންމު ރައްޔިތުންނާއި ޚިދުމަތް ލިބިގަންނަ ފަރާތްތަކުގެ އެހީތެރި ކަމަށް އެޗްޕީއޭ އިން ވަނީ އެދިފައެވެ.
