ކުޅިވަރާ ބެހޭ ވަޒީރު ބިލިއާޑް ކުޅުންތެރިން އުފަލުން ހެއްވާލައިފި

މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އަށް ހުޅުމާލޭގައި ޒަމާނީ ފެންވަރުގެ ފެސިލިޓީއެއް ގާއިމުކޮށް، އެ ތަނުގައި ބިލްއާޑުގެ ގައުމީ ޓީމުގެ ކުޅުންތެރިންނަށް ކުޅެވޭނެ ގޮތް ހަމަޖައްސައި ފަރިތަކުންތައް ފަށައިފިއެވެ.

މީގެ ކުރިން ވަރަށް ދަތިކޮށް ވަސީލަތްތައް ގާއިމުކުރެވިފައިވާ ބިލްއާޑަށް ރަނގަޅު ފެންވަރުގެ ފެސިލިޓީއެއް ސަރުކާރުން ގާއިމްކޮށްފައިވާއިރު، ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވީ ސަރުކާރުން މަސައްކަތް ކުރަމުންދަނީ ވަކި ކުޅިވަރަކަށް ވަކި ގޮތަކަށް ނޫން ކަމަށާއި، ހުރިހާ ކުޅިވަރަކަށްވެސް ޒަމާނީ ވަސީލަތްތައް ގާއިމުކޮށް، އެ ކުޅިވަރެއްގެ ކުޅުންތެރިންނަށް ހޯދައިދެވޭނެ އެންމެ ރަނގަޅު ވަސީލަތް މި ސަރުކާރުން ހޯދައިދޭނެ ކަމަށެވެ.

ހުޅުމާލޭގައި ޒަމާނީ ފެންވަރުގެ ފެސިލިޓީއެއް ބިލިއާޑަށް ހަމަޖެއްސިއިރު، މާލޭގެ އެމްޕީބީއޭ ކުލަބު ހައުސް އަންނަނީ ދުނިޔޭގެ ފެންވަރުގެ ފެސިލިޓީއަކަށް ބަދަލުކުރުމަށް މަސައްކަތް ކުރަމުންނެވެ. ވަޒީރު ވިދާޅުވީ އެ މަސައްކަތް ނިމޭއިރު ވޯލްޑް ޗެމްޕިއަންޝިޕް އަދި ބައިނަލްއަގުވާމީ ފެންވަރުގެ ބިލްއާޑް މުބާރާތްތައް އެތަނުގައި ކުޅެވިގެންދާނެ ކަމަށެވެ.

ހުޅުމާލޭގައި އެމްޕީބީއޭއަށް ލިބުނު ފެސިލިޓީއަކީ މާލޭގައި ކުރިން އެ އެސޯސިއޭޝަނަށް ލިބުނު ފެސިލިޓީއަށް ވުރެންވެސް ބޮޑު އަދި ޖާގަވެސް ތަނަވަސް ތަނެއް ކަމަށް އެމްޕީބީއޭއިން ބުނެއެވެ. ކުރިން މާލޭގައި ހަތަރު މޭޒު ބަހައްޓައިގެން ބިލްއާޑް މުބާރާތްތައް ބާއްވަމުން އައިރު، އަލަށް ހުޅުމާލެއިން ލިބިގެންދިޔަ ފެސިލިޓީގައި ހަ މޭޒު ބެހެއްޓޭ ކަމަށް އެމްޕީބީއޭއިން ބުނެއެވެ.

ރާއްޖެޓީވީގެ "ކުޅިވަރު ފައިލް" ޕްރޮގްރާމިުގައި ވާހަކަ ދައްކަމުން އެމްޕީބީއޭގެ ނައިބު ރައީސް އަޙްމަދު މާހިދު ވިދާޅުވީ ސަރުކާރުން ހާއްސަކޮށް، ކުޅިވަރާ ބެހޭ ވަޒީރުގެ އިސްނެގުމާއެކު ބިލްއާޑަށް ލިބިގެންދިޔަ ވަސީލަތަކީ ދުވަހަކުވެސް މީގެ ކުރިން ލިބިގެންދިޔަ ވަސީލަތްތަކެއް ނޫން ކަމަށެވެ.

ހުޅުމާލޭ ސްޕޯޓްސް ކޮމްޕްލެކްސްގައި އަލަށް ހެދިގެންދިޔަ ފެސިލިޓީގެ ބޭނުން ބިލްއާޑުގެ އާއިލާއަށް ހުޅުވާލާފައިވާއިރު، ތަން ބޭނުންކުރުމުގެ ފުރުސަތު ލިބިގެންދާނީ މެންބަރުންނަށް ކަމަށް އެމްޕީބީއޭއިން ބުނެއެވެ. ބިލްއާޑުގެ މެންބަރުކަން ސީރިއަސްކޮށް ކުޅެން ބޭނުންވާ ކޮންމެ މީހަކަށްވެސް ލިބިގެންދާނެ ކަމަށާއި، މެންބަރުންނަށް ކުޅެވޭ ގޮތަށް ހަދާފައިވަނީވެސް ސީރިއަސްކޮށް ބިލއާޑް ކުޅޭނެ ކުޅުންތެރިން ނެރުމަށް ކަމަށް މާހިދު ވިދާޅުވިއެވެ.

ގައުމީ ބިލިއާޑް ޓީމުގައި ހިމެނޭ ހުސައިން ސަނީފް ބުނީ ހުޅުމާލޭގައިވެސް ބިލްއާޑް ކުޅޭ ވިހި ވަރަކަށް ކުޅުންތެރިން ތިބިއިރު، އަލަށް ލިބުނު ފެސިލީޓީއާއެކު އެއީ ބިލްއާޑް ކުޅިވަރެއްގެ ގޮތުގައި ކުރިއަށް ގެންދިޔުމަށް ލިބިގެންދިޔަ ވަރަށް ބޮޑު ފުރުސަތެއް ކަމަށެވެ. އަދި ބުނީ މިއަދު ބިލްއާޑް އާއިލާ އޮތީ ވަރަށް އުފަލުން ކަމަށާއި، މީގެ ކުރިން ބިލްއާޑް ކުޅުމަށް ކުޅުންތެރިން އުފުލި ބުރަ ފިލައިގެން ގޮސް، އެންމެ ޒަމާނީ ވަސީލަތް ހުރި ކުޅިވަރަށް ބިލްއާޑް ވަމުންދާއިރު، މިއީ މުޅި ބިލްއާޑަށް ލިބިގެންދިޔަ ކުރިއެރުމެއް ކަމަށެވެ.

ގައުމީ ޓީމުގެ ކުޅުންތެރިން މިހާރު އެންމެ އެދެނީ މީގެ ކުރިން ގައުމީ ޓީމަށް އިރުޝާދުދިން ފެންވަރުގެ ބިދޭސީ ކޯޗެއް ދިގު މުއްދަތަކަށް ލިބިގެންދިޔުން ކަމަށާއި، އައު ވަސީލަތްތައް ލިބި، ގައުމީ ޓީމަށް އެފަދަ ކޯޗެއް ލިބިގެންދާނެ ކަމުގެ އުންމީދު ބޮޑު ކަމަށްވެސް ސަނީފް ބުންޏެވެ.

ބިލިއާޑް އެސޯސިއޭޝަނުގެ ހުޅުމާލެ ފެސިލީޓީ އަދި ބައިނަލްއަގުވާމީ ފެންވަރުގެ މުބާރާތްތައް ކުޅޭ ފެންވަރަށް މާލޭގައި ގާއިމުކުރަމުންދާ ބިލްއާޑް ހައުސް އަންނަ ނޮވެމްބަރު މަހުގެ 11 ވަނަ ދުވަހު ހުޅުވުމަށް މަސައްކަތް ކުރަމުންދާ ކަމަށް އެމްޕީބީއޭޭއިން ވަނީ ބުނެފައެވެ.

އަދި ރަސްމީކޮށް ހުޅުވުމާއެކު ބިލްއާޑް ފެސިިލިޓީތައް ބޭނުން ކުރުމަށް މެންބަރުންނަށް ހުޅުވާލެވިގެންދާނެ ކަމަށްވެސް އެ އެސޯސިއޭޝަނުން ބުނެއެވެ.