ބޮންޑާ ބަންދުން ދޫކޮށްލައިފި
ބޮންޑާ ހައްޔަރުކުރީ މިދިޔަ ހޮނިހިރު ދުވަހު، މަސްތުވާތަކެތީގެ މައްސަލާގައި ފުލުހުން ހިންގި ހާއްސަ އޮޕަރޭޝަނުގެ ދަށުން
ކުރީގެ މަޝްހޫރު ފުޓްބޯޅަ ކުޅުންތެރިޔާ ޝަމްވީލް ގާސިމް (ބޮންޑާ): މިދިއަ ހޮނިހިރު ދުވަހު ފުލުހުން ހިންގި މަސްތުވާތަކެތީގެ ބޮޑު އޮަޕަރޭޝަނެއްގައި ހައްޔަރުކުރި، ނަމަވެސް މިހާރު މިވަނީ ދޫކޮށްލާފައި
މިދިއަ ހޮނިހިރު ދުވަހު އައްޑޫ ސިޓީގައި ފުލުހުން ހިންގި ހާއްސަ އޮޕަރޭޝަނެއްގައި ހައްޔަރުކުރި ކުރީގެ މަޝްހޫރު ފުޓްބޯޅަ ކުޅުންތެރިޔާ ޝަމްވީލް ގާސިމް (ބޮންޑާ) ބަންދުން ދޫކޮށްލައިފިއެވެ.
ބޮންޑާ ހައްޔަރުކޮށްފައިވަނީ މި މަހުގެ ތިންވަނަ ދުވަހު އައްޑޫގައި ފުލުހުން މަސްތުވާތަކެއްޗާއި ދެކޮޅަށް ހިންގި ހާއްސަ އޮޕަރޭޝަނެއްގެ ތެރެއިންނެވެ. އެ އޮޕަރޭޝަނުގައި ފުލުހުން ވަނީ 98.6 ކިލޯގެ މަސްތުވާތަކެތި އަތުލައިގަނެ، 14 މީހަކު ހައްޔަރުކޮށްފައެވެ.
ފުލުހުން ހައްޔަރުކުރި މީހުންގެ ތެރޭގައި ހިމެނެނީ 23 އަހަރާއި 40 އަހަރާ ދެމެދުގެ ފިރިހެނުންނެވެ. ހައްޔަރުކުރި މީހުންގެ ތެރެއިން ދެ މީހަކު ޝަރީއަތް ނިމެންދެން ބަންދުގައި ބައިތިއްބަން އަމުރުކުރިއިރު ދެން ތިބި ގިނަ މީހުންގެ ބަންދަށް ޖެހީ ފަސް ދުވަހެވެ.
ބޮންޑާގެ ބަންދަށް ޖެހި ފަސް ދުވަސް ހުކުރު ދުވަހަށް (މިއަދަށް) ހަމަވެފައިވާއިރު، އޭނާ ދޫކޮށްލީ ބަންދުގެ މުއްދަތު އިތުރުކުރުމަށް ކޯޓަށް ގެންދިޔުމަކާ ނުލައި ކަމަށް ވެއެވެ. ބޮންޑާ ދޫކޮށްލާފައިވާކަން އޭނާގެ ގާނޫނީ ވަކީލު އިބްރާހީމް ޝަމްވީލް ވަނީ ރާއްޖެއެމްވީއަށް ކަށަވަރު ކޮށްދެއްވާފައެވެ.
ބޮންޑާ ހައްޔަރުކުރި ދުވަހު، އޭނާގެ ގާނޫނީ ވަކީލު ޝަމީލް ވިދާޅުވެފައިވަނީ، ބޮންޑާ ހައްޔަރު ކޮށްފައިވަނީ "ގިނަ ޢަދަދެއްގެ މަސްތުވާތަކެއްޗާއެކު" ކަމަށް ބައެއް މީޑިއާތަކުގައި ފަތުރާގައިވާ ޚަބަރަކީ ކަނޑައެޅިގެން ޙަޤީޤަތާ ޚިލާފު ވާހަކައެއްކަމުގައެވެ. އަދި ބޮންޑާ ހައްޔަރުކޮށްފައިވަނީ ހިތަދޫއިން ކަމަށާއި، އޭނާ ހައްޔަރުކުރިއިރު އޭނާގެ އަތުން ނުވަތަ ގުޅުންހުރި އެއްވެސް ތަނަކުންވެސް އެއްވެސް ޒާތެއްގެ މަސްތުވާއެއްޗެއް ފެނިފައި ނުވާ ކަމަށް ގާނޫނީ ވަކީލު ވިދާޅުވެފައި ވެއެވެ. ޝަމީލް އިތުރަށް ވިދާޅުވީ، މަސްތުވާތަކެއްޗާ އެއްވެސް އިރެއްގައި ބޮންޑާއާ އެއްވެސް ގުޅުމެއް ނޯންނާނެކަމުގެ ޔަޤީންކަން ބޮންޑާގެ ފަރާތުން އަރުވާ ކަމަށެވެ.
އައްޑޫ ސިޓީ ކައިރިން އަތުލައިގަތް މަސްތުވާތަކެތީގެ މައްސަލާގައި މިހާތަނަށް ފުލުހުން އާންމުކޮށްފައިވާ މައުލޫމާތުތަކަށް ބަލާއިރު، ހާއްސަ އޮޕަރޭޝަނުގައި ހައްޔަރުކޮށްފައިވަނީ، އައްޑޫގައި ހަރަކާތްތެރިވާ ޑްރަގް ނެޓްވޯކްގެ ބައެއް ޔަކަށް ފުލުހުން ބުނެއެވެ. މި މައްސަލައިގައި އައްޑޫގެ ވަރުގަދަ ޑްރަގް ޑީލަރެއް ކަމަށް ފުލުހުން ކުރިން ވެސް ތުހުމަތުކޮށް އެތައް ފަހަރަކު އެކި ކުށްތަކުގައި ހައްޔަރުކޮށްފައިވާ އިބްރާހިމް ރަޝީދު (އަބުޗާ) ވެސް ހިމެނެއެވެ.
