ޖުޑިޝަރީ އިސްލާހު ކުރުމަށް މި ދައުރުގައި ކުރެވޭނެ އެންމެ މުހިންމު އެއް މަސައްކަތަކީ ހެއްކާއި ބެހޭ ބިލްގެ މަސައްކަތް
ހެއްކާ ބެހޭ ޤާނޫނެއް ނެތުމުން ދިމާވަމުންދާ ދަތިތަކަށް މި ޤާނޫނު ވުޖޫދަށް އައުމުން ހައްލުތަކެއް ލިބިގެންދާނެ
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ޖުޑީޝަރީ އިސްލާހު ކުރުމަށް ރައްޔިތުންގެ މަޖިލީހުގެ މި ދައުރުގެ ތެރޭގައި ވެސް މުހިންމު މަސައްކަތްތަކެއް ކުރާނެ ކަމަށާއި އެންމެ މުހިންމު އެއް މަސައްކަތެއްގެ ގޮތުގައި ކުރާނެ ކަމަކީ ސަރުކާރުގެ ފަރާތުން މަޖިލީހަށް ހުށަހަޅާނެ ކަމަށް ބުނެފައިވާ ހެއްކާ ބެހޭ ބިލްގެ މަސައްކަތް ކަމަށް ފޮނަދޫ ދާއިރާގެ މެމްބަރ މޫސާ ސިރާޖު ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި މަޖިލީހުން މިހާރު ޖުޑީޝަރީ އިސްލާހު ކުރުމަށް ކުރަމުންދާ މަސައްކަތްތަކާއި ގުޅޭގޮތުން ކުރެވުނު ސުވާލަށް ޖަވާބު ދެއްވަމުން ސިރާޖު ވިދާޅުވީ މި ދައުރުގެ ތެރޭގައި ހެއްކާ ބެހޭ ޤާނޫނުގެ މަސައްކަތް ފެށިގެންދާނެ ކަމަށާއި އެއާއެކު އަމަލު ކުރަން ޖެހޭނެ ގޮތްތައް ސާފުވެގެންދާނެ ކަމަށެވެ. އަދި މިހާރު ހެއްކާ ބެހޭ ޤާނޫނެއް ނެތުމުން ދިމާވަމުންދާ ދަތިތަކަށް މި ޤާނޫނު ވުޖޫދަށް އައުމުން ހައްލުތަކެއް ލިބިގެންދާނެ ކަމަށް ސިރާޖު ވިދާޅުވިއެވެ.
ހެއްކާ ބެހޭ ކަންކަމުގައި އަމަލު ކުރަންވީ ގޮތް އެކައްޗެއްގައި ނެތީމާ މިހާރު ދަތިތަކާ ދިމާވަމުންދާ ކަމަށް ސިރާޖު ވިދާޅުވިއެވެ.
ސިރާޖު ވިދާޅުވީ މިހާރު ބޮޑަށް މަސައްކަތް ކުރަމުންދަނީ މަދަނީ އިޖުރާތުގެ ބިލުގެ ކަމަށެވެ. ހަމައެއާއެކީގައި ކޯޓުތަކާއި ބެހޭ ޤާނޫނަށް މިދައުރުގެ ތެރޭގައި އިސްލާހުތަކެއް ގެންނާނެ ކަމަށާއި ފަނޑިޔާރުންނާއި ބެހޭ ޤާނޫނަށް ވެސް ބަދަލުތަކެއް އަންނާނެ ކަމަށް ސިރާޖު ވިދާޅުވިއެވެ.
ސިރާޖު ވިދާޅުވީ މަޖިލިސް ޗުއްޓީ އަށް ދިޔުމުގެ ކުރިންވެސް ބޮޑެތި މަސައްކަތްތަކެއް ކުރެވުނު ކަމަށެވެ. އޭގެތެރޭގައި ޖިނާއީ އިޖުރާތުގެ ޤާނޫނަށް ބޮޑެތި ބަދަލުތަކެއް ގެނެވިފައިވާ ކަމަށާއި އޭގެތެރޭގައި ރައްޔިތުން އެންމެ ބޮޑަށް ކަންބޮޑުވި އެއް ކަންތައް ކަމުގައިވާ ކުޑަކުދިންނަށް ޖިންސީ ގޯނާ ކުރުމުގެ އަމަލުތައް ބޮޑު ކުށަކަށް ހެދިއްޖެ ކަމަށް ސިރާޖު ވިދާޅުވިއެވެ.
ސިރާޖު ވިދާޅުވީ ޖުޑީޝަރީ އިސްލާހުކުމުގެ މަސައްކަތުގެ އިތުރުން މުއައްސަސާތައް ޒިންމާދާރު ކުރުވުމުގެ މަސަައްކަތްތައް ވެސް ކުރިޔަށްދާނެ ކަމަށެވެ.
