ކޮލިފައިންގެ ފުރަތަމަ މެޗުން އާޖެންޓީނާއަށް ހަނި މޮޅެއް

ދެކުނު އެމެރިކާގެ ފީފާ ވޯލްޑް ކަޕް ކޮލިފައިންގައި އާޖެންޓީނާއިން ކުޅުނު ފުރަތަމަ މެޗުން އެކުއެޑޯ އަތުން ހަނި ގޮތަކަށް މޮޅުވެއްޖެއެވެ.

އަމިއްލަ ގައުމުގައި ކުޅުނު މެޗުން އާޖެންޓީނާ މޮޅުވީ 1-0 ގެ ނަތީޖާއަކުންނެވެ.

މި މެޗުގައި އާޖެންޓީނާގެ ކެޕްޓަން ލިއޮނެލް މެސީ ކުޅުނުއިރު، މިއީ މިދިޔަ އަހަރު ބޭއްވި ކޮޕަ އެމެރިކާ ފުޓްބޯޅަ މުބާރާތުގެ ތިންވަނަ ހޮވި މެޗުގައި ރަތް ކާޑު ދެއްކި ފަހުން އާޖެންޓީނާގެ ރަސްމީ މެޗެއްގައި މެސީ ކުޅުނު ފުރަތަމަ ފަހަރެވެ. މިދިޔަ އަހަރުގެ ޖުލައި މަހު ކުޅުނު މެޗުގެ ފުރަތަމަ ހާފުގައި މެސީއަށް ރަތް ކާޑު ދެއްކީ ޗިލީގެ ގެރީ މެޑެލްއާ ދެމެދު ހިނގާދިޔަ ހަމަނުޖެހުމަކާ ގުޅިގެންނެވެ. އެ މައްސަލައިގައި މެސީ އެއް މެޗަށް ސަސްޕެންޑް ކުރުމުގެ އިތުރުން 1،500 ޑޮލަރުން ޖޫރިމަނާ ކުރަން ދެކުނު އެމެރިކާ ފުޓްބޯޅަ ފެޑެރޭޝަން، ކޮންމެބޯލުން ނިންމިއެވެ.

ކޮޕަ އެމެރިކާއަށް ފަހު އާޖެންޓީނާއިން މީގެ ކުރިން ރަސްމީ މެޗެއް ކުޅެފައި ނުވި ނަމަވެސް، މެސީގެ ސަސްޕެންޝަން އުވުނީ ސަސްޕެންޝަން ދިން މުއްދަތުގެ ތެރެއިން އެއް އަހަރު މިހާރު ފާއިތުވެފައި ވުމާއެކުއެވެ.

ހުކުރު ދުވަހުގެ ފަތިހު ކުޅުނު މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ފެނިގެންދިޔައީ އާދައިގެ ކުޅުމެކެވެ. އެކަމަކު މި ހާފުގައި އާޖެންޓީނާއިން ވަނީ ލީޑު ނަގާފައެވެ. މެޗުގެ 13 ވަނަ މިނެޓުގައި ލިބުނު ޕެނަލްޓީއަކުން މި ލަނޑު އާޖެންޓީނާއަށް ކާމިޔާބުކޮށްދިނީ މެސީއެވެ. މިއީ އޭރިއާ ތެރެއިން ލޫކަސް އޮކަމްޕޯސްއަށް އެކުއެޑޯގެ ކުޅުންތެރިއަކު ކުރި ފައުލަކަށް ރެފުރީ ދިން ޕެނަލްޓީއެކެވެ.

މެޗުގެ ދެވަނަ ހާފުގައި ލަނޑު ޖަހަން ދެ ޓީމަށްވެސް ފުރުސަތުތަކެއް ލިބިގެންދިޔައިރު، އެންމެ ހުސް ފުރުސަތެއް ލިބުނީ އާޖެންޓީނާގެ އޮކަމްޕޯސް އަށެވެ. އެކަމަކު އޭރިއާ ތެރެއިން އޭނާ ފޮނުވާލި ބޯޅަ އެކުއެޑޯގެ ގޯލްކީޕަރު ވަނީ ދިފާއުކޮށްފައެވެ.

ދެކުނު އެމެރިކާގެ ވޯލްޑް ކަޕް ކޮލިފައިންގެ މެޗުތައް ފެށިއިރު، ބުރާސްފަތި ދުވަހުގެރޭ ޕެރަގުއޭ އާއި ޕެރޫ ބައްދަލުކުރި މެޗު ނިމުނީ 2-2 ން އެއްވަރުވެގެންނެވެ. އަދި އުރުގުއޭ ވަނީ 2-1 ން ޗިލީ ބަލިކޮށްފަައެވެ.