ކުޅުދުއްފުށިން ޕޮޒިޓިވްވި މީހާއާއި ކޮންޓެކްޓްވި 8 މީހަކު ޕޮޒިޓިވް: އެޗްއީއޯސީ
8 އޮކްޓޯބަރު 2020 | ބުރާސްފަތި 08:14ކުޅުދުއްފުށިން ޕޮޒިޓިވްވި ފުލުސް މީހާ ވަނީ މަސައްކަތުގައި އެކި ރަށްރަށަށް ގޮސްފައި
ކުޅުދުއްފުށި ރީޖަނަލް ހޮސްޕިޓަލް؛ އެރަށުގައި މަސައްކަތް ކުރާ ފުލުހަކު ޕޮޒިޓިވްވެ އިތުރު ބަޔަކު ވަނީ ޕޮޒިޓިވްވެފައި
ކުޅުދުއްފުށި ސިޓީން ޕޮޒިޓިވްވި މީހާއާއި ކޮންޓެކްޓްވި 8 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށް ހެލްތް އެމަރޖެންސީ އޮޕަރޭޝަން ސެންޓަރުން ހާމަކޮށްފިއެވެ.
ބުދަ ދުވަހުގެރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ އުތުރުގެ ބައެއް ރަށްރަށުގައި އަދި ރާއްޖޭގެ ބައެއް އެހެން ހިސާބުތަކުގައި މިދިޔަ މަހުގެ 14 ވަނަ ދުވަހުން ފެށިގެން ފުލުހުން ވަނީ ހާއްސަ އޮޕަރޭޝަނެއް ހިންގާފައިވާ ކަމަށެވެ.
އޭގެ ތެރޭގައި މާލެއިން ދިޔަ ބައެއް ފުލުހުންނާއި ރަށްރަށުގެ ފުލުހުންގެ ބައިވެރިވެގެން މި އޮޕަރޭޝަން ހިންގާފައިވާ ކަމަށާއި، އެ އޮޕަރޭޝަންގައި ކުޅުދުއްފުށިން ބައިވެރިވި ފަރާތެއް ޕޮޒިޓިވްވެފައިވާ ކަމަށެވެ. އަދި އެ ކޭސްއާއި ގުޅިގެން ކޮންޓެކްޓް ޓްރޭސިންގެ މަސައްކަތް ކުރިއަށް ގެންދިޔަ ކަމަށާއި، އިތުރު ބައެއްގެ ސާމްޕަލްތައް ޕޮޒިޓިވްވެފައިވާ ކަަމަށެވެ.
އެގޮތުން 5 އޮކްޓޯބަރުގައި ޕޮލިސް މީހާ ޕޮޒިޓިވްވެ 6 އޮކްޓޯބަރުގައި އޭނާއާއި ކޮންޓެކްޓްވި 2 މީހަކު ޕޮޒިޓިވްވެފައިވާ ކަމަށެވެ. އަދި މުޅިއެކު ޖުމްލަ 8 ފަރާތެއް މި ކޭސްއާއި ގުޅިގެން ޕޮޒިޓިވްވެފައިވާ ކަމަށް ޑރ. ނަޒްލާ ވިދާޅުވިއެވެ.
ކުޅުދުއްފުށި ސިޓީގައި ހުންނަ ފުލުހުންގެ އިދާރާގައި މަސައްކަތްކުރާ ފުލުހަކު ކޮވިޑް-19 އަށް ޕޮޒިޓިވްވުމާއި ގުޅިގެން އުތުރުގެ ހަ ރަށުގެ މޮނިޓަރިންއަށް ލުމަށްފަހު އަންގާރަ ދުވަހު ވަނީ މޮނިޓަރިންގެ ހާލަތު އުވާލާފައެވެ. ކުޅުދުއްފުށިން ފުލުހަކު ޕޮޒިޓިވްވެގެން ހޯމަ ދުވަހުގެ ރޭ މޮނިޓަރިންގެ ހާލަތަށް ގެނައީ، ކުޅުދުއްފުށީގެ އިތުރުން، ހއ. ބާރަށް، ހއ. ދިއްދޫ، ހއ. ހޯރަފުށި، ހދ. ކުރިނބީ އާއި ށ. ފުނަދޫއެވެ.
