ކޮވިޑް-19 ގެ ހާލަތުގައިވެސް 2022 ވަނަ އަހަރު ގަތަރުގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕަށް އެ ގައުމުން ވަމުންދާ ތައްޔާރީތަކަށް ފީފާގެ ރައީސް ޖިއާނީ އިންފަންޓީނޯ ތާރީފުކުރައްވައިފިއެވެ.

އާންމު ގޮތެއްގައި ވޯލްޑް ކަޕް ހޫނު މޫސުމުގައި ބާއްވަ ނަމަވެސް، ގަތަރުގައި ބާއްވާ ވޯލްޑް ކަޕް ކުރިއަށްދާނީ 2022 ވަނަ އަހަރުގެ ނޮވެމްބަރު މަހުގެ 21ން ޑިސެމްބަރު މަހުގެ 18ގެ ނިޔަލަށެވެ.

ކޮވިޑް-19 ގެ ހާލަތުގައިވެސް ގަތަރުން އަންނަނީ ވޯލްޑް ކަޕަށް ވަރަށް ފުރިހަމައަށް ތައްޔާރުވަމުންނެވެ. ދާދި ފަހުން އިންފަންޓީނޯ ވިދާޅުވީ ވޯލްޑް ކަޕަށް ގަތަރުން އެކުލަވާލި ޕްލޭން ވަރަށް ރަނގަޅަށް ދިރާސާ ކުރެއްވި ކަމަށާއި، މުބާރާތަށް ގަތަރުން ވަރަށް ފުރިހަމަކަމާއެކު ތައްޔާރުވަމުން އަންނަ ކަމަށެވެ. އަދި މުބާރާތުގެ ކުރިން މުބާރާތުގެ މެޗުތައް ކުޅުމަށް ހަމަޖެހިފައިވާ އަށް ސްޓޭޑިއަމުގެ މަސައްކަތް އެއްކޮށް ނިންމާލެވޭނެ ކަމުގެ ފުރިހަމަ ޔަގީންކަން އެބައޮތް ކަމަށާއި، ކޮވިޑް-19 ގެ މި ދަނޑިވަޅުގައިވެސް ގަތަރުން ކުރަމުން އަންނަ މަސައްކަތަށް ތާރީފު ހައްގު ކަމަށްވެސް ވިދާޅުވިއެވެ.

ގަތަރުގައި ބާއްވާ ވޯލްޑް ކަޕުގެ ގްރޫޕް ސްޓޭޖުގައި ކޮންމެ ދުވަހަކު ހަތަރު މެޗު ކުޅޭ ގޮތަށް ވަނީ ހަމަޖައްސާފައެވެ. އެހެންކަމުން ސަޕޯޓަރުންނާއި މީޑިއާއަށް އެއްފަހަރާ ބެލޭނީ ކޮންމެ ދުވަހަކުވެސް ދެ މެޗެވެ.

ވޯލްޑް ކަޕް ފެށުމަށް ހަމަޖެހިފައިވާ މެޗު ކުޅޭނީ ގަތަރުގެ ދޯހާގެ އަލް ބައިތު ސްޓޭޑިއަމުގައެވެ. އެ ދަނޑަކީ 60،000 މީހުންގެ ޖާގައިގެ ދަނޑެކެވެ. އަދި މުބާރާތުގެ ފައިނަލް މެޗު ޑިސެމްބަރު މަހުގެ 18 ވަނަ ދުވަހު ކުޅުމަށް ހަމަޖެހިފައިވާއިރު، އެ މެޗު ކުޅޭނީ 80،000 މީހުންގެ ޖާގައިގެ ލުސައިލް ސްޓޭޑިއަމުގައެވެ.

ގަތަރުގައި ބާއްވާ ވޯލްޑް ކަޕަކީ ތާރީޚީ ވޯލްޑް ކަޕަކަށް ހެދުމަށް ގަތަރުން އަންނަނީ މަސައްކަތް ކުރަމުންނެވެ. ގަތަރު ވޯލްޑް ކަޕްގެ ސީއީއޯ ނަސީރު އަލް ޚަތެރު މީގެ ކުރިން މީޑިއާއަށް ދިން އިންޓަވިއުއެއްގައި ވިދާޅުވީ ގަތަރު ވޯލްޑް ކަޕް ވެގެންދާނީ ސަޕޯޓަރުންނާއި ކުޅުންތެރިންނަށް ތަފާތު ތަޖުރިބާއަކަށް ކަމަށާއި، ސަޕޯޓަރުންނަށް ގަތަރު ވޯލްޑް ކަޕަކީ ތަފާތު ވޯލްޑް ކަޕަކަށް ހެދުމަށް ޕްލޭނެއް އެކުލަވާލަމުން އަންނަ ކަމަށެވެ.

ގަތަރުގައި 2022 ވަނަ އަހަރު ބާއްވާ ވޯލްޑް ކަޕް ކުޅޭނީ ފަސް ސިޓީއެއްގެ އަށް ދަނޑެއްގައެވެ. މުބާރާތުގައި ޖުމްލަ 32 ޓީމު ވާދަކުރާނެއެވެ. މުބާރާތް ހޯސްޓް ކުރުމުގެ ފުރުސަތު ގަތަރަށް ލިބުނީ އެމެރިކާ އާއި، ސައުތު ކޮރެއާ އާއި، ޖަޕާން އަދި އޮސްޓްރޭލިއާއާ ވާދަކޮށްގެންނެވެ.