ސީވީއެފް ގައުމުތަކުގައި ޓެކްނޮލޮޖީ ހަބުތަކެއް ގާއިމުކުރުމަށް ރައީސް ނަޝީދު ގޮވާލައްވައިފި
7 އޮކްޓޯބަރު 2020 | ބުދަ 15:50ނަޝީދު ވަނީ ރާއްޖޭގެ ޕޯޓުތަކުގައި މިހާރުވެސް ޑީޒަލް އަންދަމުންދާ ކަން ފާހަގަކުރައްވާފަ
މީގެކުރިން ބޭއްވި ކްލައިމެޓް ވަލްނަރަބަލް ފޯރަމްގެ ބައްދަލުވުމެއްގައި ރައީސް ނަޝީދު ތަގުރީރުކުރައްވަނީ
ކްލައިމެޓް ޗޭންޖު ވަލްނަރަބަލް ފޯރަމް (ސީވީއެފް) ގެ ގައުމުތަކުގައި ތިމާވެއްޓާއި ރައްޓެހި ހަބުތަކެއް ގާއިމުކުރުމަށް ރައްޔިތުންގެ މަޖިލީހުގެ ރައީސް ގޮވާލައްވައިފިއެވެ.
ބުދަ ދުވަހު ބޭއްވުނު ސީވީއެފް ލީޑަރސް އިވެންޓެއް ބައްދަލުވުމުގައި ތަގުރީރުކުރައްވަމުން އެ ފޯރަމްގެ ތީމެޓިކް އެމްބެސެޑަރ ކަންވެސް ކުރައްވާ ނަޝީދު ވަނީ ރާއްޖޭގެ ޕޯޓުތަކުގައި މިހާރުވެސް ޑީޒަލް އަންދަމުން ދާކަން ފާހަގަކުރައްވާފައެވެ.
އެމަނިކުފާނު ވަނީ ޑީސަލް އެންދުމުގެ ބަދަލުގައި ސޯލާ ޕީވީއިން ބޮޑު އަދަދަކަށް ހައިޑްރޮޖެން އުފެއްދޭނީ ކިހިނެއްތޯ ސުވާލު އުފައްދަވާފައެވެ. އަދި ވިދާޅުވީ ޓެކްނޮލޮޖީ ހަބުތަކެއް ސީވީއެފް ގައުމުތަކުގައި ގާއިމުކުރެވުމުން ޖައްވަށް ދޫކުރާ ވިހާ މާއްދާތައް ބޮޑު އަދަދަކުން މަދު ކުރެވޭނެ ކަމަށް އުއްމީދު ކުރައްވާ ކަމަށެވެ.
މޫސުމީ ބަދަލުތަކުގެ ސަބަބުން ދުނިޔޭގެ ހުރިހާ ގައުމުތަކަށް ވެސް އަސަރުކުރަމުންދާ ކަން ފާހަގަކުރައްވާ ރައީސް ނަޝީދު ވިދާޅުވީ މިއީ އެއްވެސް ގައުމެއް އަނެއް ގައުމަކަށް އިނގިލި ދިގު ކުރަންވީ ވަގުތު ނޫން ކަމަށެވެ. އޭގެ ބަދަލުގައި ހުރިހާ ގައުމަކުން މަސައްކަތް ކުރަންވީ، ޒީރޯ ކާބަންގެ މިސްރާބަށް ކަމަށް އެމަނިކުފާނުގެ ވާހަކަފުޅު ނިންމަވާލައްވަމުން ވަނީ ވިދާޅުވެފައެވެ.
ކްލައިމެޓް ވަލްނަރަބަލް ފޯރަމް (ސީވީއެފް) އަކީ މޫސުމަށް އަންނަ ނޭދެވޭ ބަދަލުތަކުގެ ޝިކާރައަކަށްވުން ގާތް 48 ޤައުމު ބައިވެރިވާ ބައިނަލްއަޤުވާމީ ފޯރަމްއެކެވެ. މި ފޯރަމްގެ އެންމެ ފުރަތަމަ ބައްދަލުވުން ބޭއްވީ 2009 ވަނަ އަހަރު ދިވެހިރާއްޖޭގައެވެ.
މި ފޯރަމްގެ މައިގަނޑު މަޤްޞަދަކީ މޫސުމީ ބަދަލުތަކުގެ ސަބަބުން ކުރާ ނޭދެވޭ އަސަރުތަކާ ގުޅޭގޮތުން ޤައުމުތައް އަހުލުވެރިކޮށް، ތިމާވެށްޓާ ރަޙްމަތްތެރި ސިޔާސަތުތަކެއް ތަންފީޒުކޮށް މެންބަރު ޤައުމުތަކުން ބޭނުންކުރާ ހަކަތައަކީ 100 އިންސައްތަ އިޔާދަކުރަނިވި ހަކަތައަށް ބަދަލުކުރުމަށް މަސައްކަތްކުރުމެވެ.
