އަގުބޮޑުކޮށް ކާބޯތަކެތި ވިއްކާ ވިޔަފާރިތައް ޖޫރިމަނާކުރާނަން: ވެލިދޫ ކައުންސިލް
7 އޮކްޓޯބަރު 2020 | ބުދަ 18:35އަގޮބޮޑުކޮށް ތަކެތި ވިއްކާ ވިޔަފާރިތަކުގެ މައުލޫމާތު ހިއްސާކުރުމަށް ވަނީ އެދިފައި
އާންމުކޮށް ބޭނުންކުރާ ކާބޯތަކެތީގެ އަގު ސަރުކާރުން ވަނީ ކޮންޓްރޯލް ކޮށްފައި
ސަރުކާރުން އަގު ކޮންޓްރޯލް ކޮށްފައިވާ ކާބޯތަކެތި އަގުބޮޑުކޮށް ވިއްކާ ފަރާތްތަކާއި މެދު ފިޔަވަޅު އަޅާނެ ކަމަށް ވެލިދޫ ކައުންސިލުން ބުނެފިއެވެ.
ބުދަ ދުވަހު ވެލިދޫ ކައުންސިލުން ނެރެފައިވާ އިއުލާނެއްގައި ވަނީ ކަނޑައަޅާފައިވާ އަގަށްވުރެ ބޮޑުކޮށް ކާޑުގެ ބާވަތްތަކާއި، ފިޔާ، އަލުވި، ކުކުޅުބިސް، އަދި ރީނދޫމުގު ބައެއް ވިފަރާތި ތަކުން ވިއްކަމުންދާ ކަމުގެ ޝަކުވާ އެ ކައުންސިލަށް ލިބެމުންދާ ކަމަށެވެ.
ފާއިތުވި ދުވަސްތަކުގައި ކަނޑައަޅާފައިވާ އަގަށްވުރެ ބޮޑުކޮށް އެތަކެތި ވިއްކާފައިވާނަމަ އެ ވިޔަފާރިތަކުގެ މައުލޫމާތު ކައުންސިލަށް ހިއްސާކުރުމަށް ވަނީ އެދިފަައެވެ. ވެލިދޫ ކައުންސިލުން ބުނީ ކޮންޓްރޯލް އަގަށްވުރެ ބޮޑުކޮށް އެތަކެތި ވިއްކަމުންދާ ކަމުގެ ޝަކުވާ އިތުރަށް ލިބެމުންދާނަމަ އެ ވިޔަފާރިތައް ޖޫރިމަނާ ކުރާނެ ކަމަށެވެ.
ރާއްޖޭގައި ފިޔާ، އަލުވި، ބިސް، އަދި ރީނދޫ މުގު ވިއްކޭނެ އެންމެ ބޮޑުއަގު ސަރުކާރުން ވަނީ ކަނޑައަޅާފައެވެ. އެގޮތުން މިދިޔަ އެޕްރީލް މަހުގެ ހަވަނަ ދުވަހުން ފެށިގެން މީހުން ދިރިއުޅޭ ރަށްރަށުގައި ފިޔާ އަދި އަލުވި ކިލޯއެއް ވިއްކޭނެ އެންމެ ބޮޑު އަގަކީ 20 ރުފިޔާއެވެ. ބިހެއް ވިއްކޭނެ އެންމެ ބޮޑު އަގަކީ 1.80 ރުފިޔާއެވެ. އަދި ރީނދޫ މުގު ކިލޯއެއް ވިއްކޭނެ އެންމެ ބޮޑު އަގަކީ 45 ރުފިޔާއެވެ.
ކޮންޓްރޯލް ކޮށްފައިވާ އަގަށްވުރެ ބޮޑުއަގުގައި މުދާ ވިއްކާާ ފަރާތްތައް ފުރަތަމަ ފަހަރު ގިނަވެގެން 100,000ރ. އިން ޖޫރިމަނާ ކުރާނެ ކަމަށާ ކުށް ތަކުރާރު ކުރާ ކޮންމެ ފަހަރަކު ގިނަވެގެން 100,000ރ. ޖޫރިމަނާކޮށް، ހަ މަސް ދުވަހަށްވުރެ ދިގުނޫން މުއްދަތަކަށް ވިޔަފާރިކުރާ ތަން ބަންދު ކުރުމަށް އިކޮނިމިކް މިނިސްޓްރީން ވަނީ ނިންމާފައެވެ.
