2020 ވަނަ އަހަރުގެ ފުރަތަަމަ 6 މަސް ދުވަހުގެ ރިޕޯޓް ހުށަހެޅި ކައުންސިލްތައް އާންމުކޮށްފި
79 ރަށު ކައުންސިލަކުން ވަނީ މި މުއްދަތުގައި ރިޕޯޓް ހުށަހަޅާފައި
ލޯކަލް ގަވަރމެޓް އޮތޯރިޓީގެ ބައްދަލުވުމެއްގެ ތެރެއިން
2020 ވަނަ އަހަރުގެ ފުރަތަަމަ 6 މަސް ދުވަހުގެ ރިޕޯޓް ހުށަހެޅި ކައުންސިލްތައް އާންމުކޮށްފި އެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ 108 ވަނަ މާއްދާއާއި 109 ވަނަ މާއްދާގައި ވާ ގޮތުގެ މަތިން ކޮންމެ އަހަރެއްގެ ޖުލައި މަހުގެ 10 ވަނަ ދުވަހުގެ ކުރިން އެ އަހަރެއްގެ ފުރަތަމަ 6 މަސް ދުވަހު ކައުންސިލުން ހިންގި ހަރަކާތްތަކުގެ ތަފްސީލީ ރިޕޯޓް ހުށަހަޅަން ޖެހެއެވެ.
މި ރިޕޯޓް ހުށަހަޅަން ޖެހެނީ ރަށު ކައުންސިލްތަކުން އަތޮޅު ކައުންސިލްތަކަށެވެ. އަދި ކޮންމެ އަހަރެއްގެ ޖުލައި މަހުގެ 20 ވަނަ ދުވަހުގެ ކުރިން، އެ އަހަރެއްގެ ފުރަތަމަ 6 މަސްދުވަހު ކައުންސިލުން ހިންގި ހަރަކާތްތަކުގެ ތަފްސީލީ ރިޕޯޓް އަތޮޅު ކައުންސިލްތަކުންނާއި ސިޓީ ކައުންސިލްތަކުން ލޯކަލް ގަވަރމެންޓް އޮތޯރިޓީ އަށް ހުށަހެޅުމަކީ ޤާނޫނުން މަތިކޮށްފައިވާ ކަމެކެވެ.
އެގޮތުން ސިޓީ ކައުންސިލްތަކުގެ ތެރެއިން މާލެ ސިޓީ ކައުންސިލް، އައްޑޫ ސިޓީ ކައުންސިލް އަދި ފުވައްމުލަކު ސިޓީ ކައުންސިލް ވަނީ ރިޕޯޓް ހުށަހަޅާފައެވެ.
އަތޮޅު ކައުންސިލްތަކުގެ ތެރެއިން 15 އަތޮޅު ކައުންސިލަކުން ރިޕޯޓް ހުށަހަޅާފައިވާއިރު، 79 ރަށު ކައުންސިލަކުން ވަނީ މި މުއްދަތުގައި ރިޕޯޓް ހުށަހަޅާފައެވެ. ކައުންސިލްތަކުން ޤާނޫނީ ޒިންމާ އަދާކޮށްފައިވާ އެލްޖީއޭ އިން ވަނީ އެކަން ފާހަގަކޮށްފައެވެ.
މީގެ އިތުރުން މި އަހަރުގެ ފުރަތަމަ 6 މަސް ދުވަހުގެ ރިޕޯޓް ތައްޔާރުކޮށް އަތޮޅު ކައުންސިލްތަކަށް ފޮނުވި ނަމަވެސް އެ ރިޕޯޓް އަތޮޅު ކައުންސިލުން އެލްޖީއޭ އަށް ލިބިފައިވާ ނުވާ ރަށު ކައުންސިލްތައް ހުރި ކަމަށް އެ އޮތޯރިޓީން ވަނީ ބުނެފައެވެ.
