ޕީސީބީ ބޯޑުގެ މަސްއޫލިއްޔަތު އަދާކުރަމުންދޭތޯ ބެލުމަށް ކޮމިޓީއަށް މައްސަލައެއް ހުށައަޅައިފި
ޕްރޮކިއުމެންޓް ސިޔާސަތު ހިންގުމުގެ ޤަވާއިދުތައް އެކުލަވާލާ އާންމު ކޮށްފައިވޭތޯ ބެލުމަށް ވެސް ވަނީ ހުށައަޅާފަ
ފިނޭންސް މިނިސްޓްރީ
ދައުލަތުގެ ވިޔަފާރި ތަންތަން މޮނިޓަރކޮށް އިވެލުއޭޓް ކުރުމުގެ ޤާނޫނުން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އަށް މަތިކޮށްފައިވާ ޒިންމާތައް ޤާނޫނުގައި ބުނާ ގޮތަށް އަމަލު ކުރަމުންދޭތޯ ބަލާ ކަށަވަރު ކުރުމަށް ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒެސް (އެސް.އޯ.އީ) ކޮމިޓީއަށް މައްސަލައެއް ހުށަހަޅައިފިއެވެ.
މާފަންނު މެދު ދާއިރާގެ މެމްބަރު އިބްރާހިމް ރަޝީދު ހުށައެޅުއްވި މި މައްސަލައިގައި ވަނީ ސަރުކާރު ކުންފުނިތަކާއި އަދި ސަރުކާރު ބައިވެރިވާ ކުންފުނިތަކާއި ވިޔަފާރި އުސޫލުން ހިންގާ ތަންތަނުގެ ބޯޑަށް ސަރުކާރުން އައްޔަން ކުރާ ފަރާތްތަކަކީ ޤާނޫނުގައި ބުނާ ޝަރުތުތައް ހަމަވާ މީހުންތޯ ބެލުމާއި ބޯޑަށް އައްޔަނުކުރާ ފަރާތްތައް ސްކްރީން ކުރަމުންދާކަމުގައި ކަށަވަރުކުރުން އަދި މީހުން އައްޔަނު ކުރުމާއި ވަކި ކުރުމުގައި އަމަލު ކުރަންޖެހޭނީ ބައިނަލްއަޤްވާމީ ބެސްޓް ޕްރެކްޓިސް ކަމުގައި ގާނޫނު ބަޔާންކޮށްފައިވާ ކަމަށެވެ.
ގާނޫނުގައި މިހެން ބަޔާންކޮށްފައިވާއިރު ޕީސީބީ ބޯޑުން ސަރުކާރު ކުންފުނިތައް ހިނގުމަށް އެކުލަވާލަން ޖެހޭ ޤަވާއިދު އެކުލަވާލާ ހިނގަމުންދަނީ ދިވެހިރާއްޖޭގެ ޤާނޫނުތަކާ ބައިނަލްއަގުވާމީ ބެސްޓް ޕްރެކްޓިސް އާއި އެއްގޮތަށްތޯ ބަލާ ކަށަވަރު ކުރުމާއި ދައުލަތް ހިއްސާވާ ކުންފުނިތަކުގެ ޕްރޮކިއުމެންޓް ސިޔާސަތު ހިންގުމުގެ ޤަވާއިދުތައް އެކުލަވާލާ އާންމު ކޮށްފައިވޭތޯ ބެލުމަށް މެމްބަރު ވަނީ ކޮމިޓީއަށް ހުށައަޅާފައެވެ.
މީގެއިތުރުން ޤާނޫނުގައި ބަޔާން ކުރާ އެއްވެސް ގަވާއިދެއް އެކުލަވާނުލާ ބޯޑުން އަމަލު ކުރަމުންދޭތޯ ބެލުމާއި ދައުލަތުގެ ވިޔަފާރި ތަންތަން މޮނިޓަރކޮށް އިވެލުއޭޓް ކުރުމުގެ ޤާނޫނުގެ 14 ވަނަ މާއްދާގައި ބަޔާން ކުރާ ޔައުމިއްޔާ ރެކޯޑިންތައް ބެލެއްޓިފައިވޭތޯ ކަށަވަރު ކުރުމަށް ވެސް ކޮމިޓީއަށް ހުށައަޅާފައިވެއެވެ. އަދި ސަރުކާރު ކުންފުނިތައް މޮނިޓަރ ކުރުމުގައި ބައިނަލްއަގްވާމީ ބެސްޓް ޕްރެކްޓިސްއާއި އެއްގޮތަށް ބޯޑުން އަމަލު ކޮއްފައިފައިވޭތޯ ބަލާ ދިނުމަށް ވެސް އެސްއޯއީ ކޮމިޓީއަށް ވަނީ ހުށައަޅާފައެވެ.
